Zaburi 17 - MUMA MALER 2015

Lemo mar siro wasigu

¹ A Ruoth Nyasaye, winj kwayona makare, kendo chik iti ni ywakna. Yie iwinj lemona, nimar aonge gi miganga.

² Ibiro ng’adona bura maber, nikech ing’eyo gima kare.

³ Ing’eyo chunya, kendo iranga gotieno, bende isenona malong’o, minwang’o ni aonge gi gombo mar timo gima rach. Ok awach weche maricho

⁴ kaka ji mamoko, to aserito chikni, kendo ok aseluwo timbe mag mahundu.

⁵ Pile asewuotho e yori, kendo ok asebaro maweye.

⁶ A Nyasaye, aywakni nikech ang’eyo ni ibiro winja, omiyo koro chik iti ni wechena.

⁷ In miwaro joma obiro iri, karingo wasikgi, nyisa herani malich miwuoro.

⁸ Rita mana kaka dirit wengeni iwuon, kendo panda e tipo bwombeni,

⁹ mondo kik joricho monja, mi loya. Wasika olwora koni gi koni kamon koda malich!

¹⁰ Gionge gi miwafu kendo giwuoyo gi sunga.

¹¹ Gilwora kamoro amora madhiye, kendo girito mondo gigoya piny.

¹² Gichalo sibuoche madwaro kidha matindo tindo, kendo gikiya mana ka nyithi sibuoche.

¹³ A Ruoth Nyasaye, bi mondo iked gi wasika kod ilogi. Resa gi liganglani e lwet joricho.

¹⁴ Ee, resa gi tekoni kuom joma nigi gik moko duto mag pinyni. Kumgi gi masiche ma isechano ni ibiro kumogigo. Mad nyithindgi bende yud kum moromogi, mi moko dong’ ni nyikwagi!

¹⁵ An to, ananeni nikech in ng’at makare, kendo ka achiew, to chunya nopong’ gi ilo, nikech ananwang’ ka in koda.