Zaburi 12 - MUMA MALER 2015

Weche mikwayogo Nyasaye mondo olo joricho

¹ Ruoth Nyasaye, yie iresa, nimar onge joma oluori ma pod odong’, kendo adiera onge kuom ji.

² Ji duto riambo ni jowetegi, kendo ng’ato ka ng’ato wuondo wadgi gi weche manono.

³ A Ruoth Nyasaye, tiek lep mawacho weche mag wuondgo, kaachiel gi dhok duto mawacho weche mag sunga,

⁴ Giwacho niya, “Wabiro loso kaka wan ema wahero, kendo onge ng’ama nyalo nyisowa gima onego wawachi?”

⁵ To Ruoth Nyasaye wacho niya, “Koro abiro biro nikech ithiro jochan, kendo joma isando chur malit nikech rem. Abiro miyogi kue ma gigombo.”

⁶ Weche Nyasaye gin weche migeno, nikech giliw ka fedha moleny e mach dibiriyo.

⁷ A Ruoth Nyasaye, rit ngimawa pile, kendo reswa kuom joricho.

⁸ Joricho luro kuonde duto, kendo ng’ato ka ng’ato pako mana gima rach.