Wer Mamit 2 - MUMA MALER 2015

¹ An to, an mana maup thim mar Sharon, kata ondanyo madongo e pap.”

Wuowi:

² “Ooyo jaherana, iber e kind nyiri weteu, mana kaka ondanyo ber e kind kuthe.”

Nyako:

³ “To in bende jaherana, iber e kind yawuowi weteu, mana kaka yadh olemo ber e kind yien mamoko duto. Ahero bet e tiponi ka achamo olembi mamit.

⁴ Ne itera e odi mar chiemo, mi iliero bandech hera kuoma.

⁵ Hera nega, omiyo duog chunya gi gik mamit.

⁶ Badi ma kor acham oteno wiya, to badi ma korachwich okwaka.”

Wuowi:

⁷ “Un nyi Jerusalem, kuongreuru gi nying le mae thim ni ok unuchoch herawa.”

Wer mar ariyo Nyako:

⁸ Awinjo dwond jaherana. Ero obiro, ka ochikore e gode. Adier, odum e kor gode kobiro ira!

⁹ Jaherana chalo gi apol kendo ochalo gi ngau ma pod dongo. Echagocha, ochung’ e tok ohingawa, ka ong’icho gie dirisa.

¹⁰ Awinjo ka jaherana wuoyo koda, kawacho niya, ‘A malo, jaherana! Wuog wadhi, yaye jaber.

¹¹ Ndalo chwiri koro osekadho, omiyo koth oserumo,

¹² kendo maupe thiewo e piny duto. Koro ma e kinde ma ji werie, kendo ma dwond akuru winjore e piny.

¹³ Olemo bende ochako chiek, kendo mzabibu mamoyo dum mamit. A malo jaherana, Wuog wadhi, yaye jaber.

¹⁴ Ilalna mana ka winyo ma ode ni kama orokore e kor got mabor. We aneye wang’i, kendo awinjie dwondi, nikech ijaber, kendo dwondi mit.’

¹⁵ Yaye jowadwa, maknauru nyithind bwe ma ketho puothe mag mzabibu, nikech dipo ka giketho mzabipwa mamoyo.”

Nyako:

¹⁶ Jaherana en mara, kendo an bende an mare. Okwayo e chuny ondanyo.

¹⁷ Nyaka koch okinyi kudhi, mi piny yawre. Duogi e gode mang’ue ng’ar, yaye jaherana, mana ka gima in apol kata ka ngau ma pod dongo modak e gode.