Tim jo-Lawi 27 - MUMA MALER 2015

Chike mag walo gik moko ni Ruoth Nyasaye

¹ Ruoth Nyasaye nowacho ni Musa

² ni mondo onyis jo-Israel niya, “Ka ng’ato okuong’ore ni obiro chiwo ng’ato ni Ruoth Nyasaye, eka bang’e oyudo ni ok onyal chopo kuong’ruokno, to nengo monego owargo ng’atno e ma:

³ Ng’ama dichwo ma hike ni e kind piero ariyo gi piero auchiel nowar gi shekel piero abich mag fedha, (ma gin shekel mitiyogo e tich Nyasaye.)

⁴ To ng’ama dhako ma hike rom kamano nowar gi shekel piero adek.

⁵ To ka hik ng’atno ni e kind higni abich gi higni piero ariyo, to noware gi shekel piero ariyo ka en ng’ama dichwo, to shekel apar ka en dhako.

⁶ Ka hike pok ochopo abich, to osekadho due achiel, to noware gi shekel abich ka en nyathi ma wuowi to nyako, shekel adek.

⁷ Ka ng’atno hike piero auchiel kata mokadho kanyo, kendo en ng’ama dichwo, to noware gi shekel apar gabich. Ka en dhako, to shekel apar.

⁸ Ka ng’at mokuong’oreno odhier ahinya ma ok nyal chulo nengo moketne, to noter ng’at ma nokuong’ore ni ochiwono e nyim jadolo, mi jadolo nogo nengone maromre gi pesa ma ng’at mokuong’ore nyalo chulo.

⁹ “Ka ng’ato okuong’ore ni obiro chiwo ni Ruoth Nyasaye chiayo minyalo timogo misango, to gima ochiwono doko mowal ni Ruoth Nyasaye.

¹⁰ Ng’atno ok nyal wile mondo oket moro kare, bed ni orach kata ober, bende ok onyal wile gi gimoro nono. To kapo ni olok chiayo moro kar ma nochiw, to chiayo mokwongo, kaachiel gi mowilego nodok mowal ni Ruoth Nyasaye.

¹¹ Ka chiayo ma ng’atno okuong’ore ni obiro chiwo ogak, ma ok nyal timgo misango ni Ruoth Nyasaye,

¹² to chiayono nyaka kel e nyim jadolo, mi jadolo nogo nengo moromo kode.

¹³ Nengo ma jadolo oketo ema oromo. Ka ng’atno dwaro waro chiayono, to nyaka omedie achiel kuom abich mar nengone.

¹⁴ “Ka ng’ato ochiwo ode mondo obed moyang ni Ruoth Nyasaye, to jadolo nyaka go nengo moromo kode, kendo nengo ma jadolo ogoyono ema oromo.

¹⁵ To ka ng’ato mane ochiwo ode dwaro waro odeno, to nyaka omed achiel kuom abich mar nengone, eka ot nodong’ne.

¹⁶ “To ka ng’ato ochiwo ni Ruoth Nyasaye lope moro, to nyaka go nengone maromre gi kodhi michwoyego. Nengo lowo minyalo chwoyo gi kodhi moromo kilo abiriyo nobed shekel piero abich.

¹⁷ Ka ochiwo lopeno e higa mar mor, to nengone nosiki mana kamano.

¹⁸ To ka ochiwe ka higa mar mor oserumo, to jadolo nokwan higni modong’ nyaka higa mar mor chak chop, mi nogo nengo maromre gi higni modong’go.

¹⁹ Ka ng’at mane ochiwo puothe dwaro waro puotheno, to nyaka ochul nengo mogoneno, komedoe achiel kuom abich. Eka puodhono nodong’ne.

²⁰ To ka ok odwar waro puodhono, kata ka oseuse ni ng’at machielo, to ok nyal ware.

²¹ Ka higa mar mor ochopo mi owe puodhono, to nobed gima ler, ka puodho moyang ni Ruoth Nyasaye chuth. Nodong ni jadolo ka mwandune.

²² “Ka ng’ato ochiwo ni Ruoth Nyasaye puodho moro moseng’iewo, to chutho puodhono ok mare owuon,

²³ to jadolo nogo nengo maromre gi higni modong’ nyaka higa mar mor chopi, mi ng’atno nochiw pesago mana odiechieng’no. En pesa mowal ni Ruoth Nyasaye.

²⁴ Ka higa mar mor osechopo, to puodhono nodog ni ng’at mane ong’iewe kuome, ma en wuon lowo hie.

²⁵ (Nengo ka nengo nopim gi shekel mitiyogo e tich Nyasaye. Shekel achiel romre gi gera piero ariyo.)

²⁶ “To chiayo mokwong nywolo kik ng’ato chiw ni Ruoth Nyasaye, nikech gik moko duto mokwong nywolo gin mag Ruoth Nyasaye. Bed ni gin dhok kata rombe, to gin mag Ruoth Nyasaye.

²⁷ To ka en chiayo mogak ma ok nyal timgo misango ni Ruoth Nyasaye, to enoware e nengo migoyone, komedoe achiel kuom abich mar nengone. Kata ka ok oware, to nyaka ng’iewe e nengo miketo.

²⁸ “To kata kamano gima ng’ato oweyo ni Ruoth Nyasaye chuth kuom gik moko ma en go, bed ni en dhano kata chiayo kata lowo, ok onyal waro kata ng’iewo nikech gima owe ni Ruoth Nyasaye chuth en gima ler moloyo.

²⁹ Ng’ato ang’ata mowe ni Ruoth Nyasaye chuth ok nowar, to nyaka nege anega.

³⁰ “Achiel kuom apar mag gik moko duto ma piny onyago, bed ni gin cham, kata olembe, gin mag Ruoth Nyasaye, kendo gin gik maler mowalne.

³¹ Ka ng’ato dwaro waro gimoro kuom achiel kuom apar mag gige, to nyaka omedie achiel kuom abich mag gigo.

³² Bende chiayo mar apar ka chiayo mar apar mokalo e bwo ludh jakwath kokwanogi, nobed mowal ni Ruoth Nyasaye, bed ni gin dhok kata rombe.

³³ Kik ng’ato non ni gibeyo kata giricho, bende ok nolokgi gi moko. To kapo ni owilo chiayo moro gi machielo, to chiayo mar aparno, kaachiel gi mowilegono, nobed gik maler chuth, kendo ok nowargi.”

³⁴ Mago e chike mane Ruoth Nyasaye omiyo Musa e got Sinai mondo Musa omi jo-Israel.