Tim jo-Lawi 23 - MUMA MALER 2015

Sewni moketi

¹ Ruoth Nyasaye nowacho ni Musa mondo onyis jo-Israel niya,

² “Sewni ma Ruoth Nyasaye oketo e magi: Gin chokruok maler, ma nyaka ogonigi milome nikech gin sewni maga ma aseketo.

³ Unuti tijeu kuom ndalo auchiel, to chieng’ mar abiriyo en chieng’ yueyo moyiedhi. En odiechieng chokruok maler, ma kik utimie tich moro amora, nikech en sabato mar Ruoth Nyasaye kuonde duto mudakie.

⁴ “Sewni ma Ruoth Nyasaye oketo e magi: Gin chokruok maler ma ka kindegi ochopo to nyaka ugo milome maggi.

⁵ “Due apar gang’wen, due mokwongo chakre odhiambo, en chieng’ Pasaka mar Ruoth Nyasaye.

⁶ To Sap Makati ma ok ketie thowi mar Ruoth Nyasaye chakore tarik apar gabich mar dueno. Unucham makati ma ok ketie thowi kuom ndalo abiriyo.

⁷ Chieng’ mokwongo mar jumano, unubed gi chokruok maler, kendo ok unuti tijeu ma pile.

⁸ Unuchiw ni Ruoth Nyasaye misengni miwang’o kuom ndalo abiriyo. Chieng’ mar abiriyo bende nobedie chokruok maler, kendo ok unuti tijeu mapile.”

⁹ Ruoth Nyasaye nowacho ni Musa mondo onyis jo-Israel niya,

¹⁰ “Ka uchopo e piny ma abiro miyou, mi ukayoe cham, to nyaka ukel ni jadolo cham mukwongo kayo higa ka higa.

¹¹ Jadolo nochiwgi e nyim Ruoth Nyasaye ka mich moyiedhi chieng’ moluwo sabato mondo Ruoth Nyasaye oyie kodu.

¹² To chieng’ onogo muchiwoe michno, nyaka uchiw ni Ruoth Nyasaye nyaim ma hike achiel maonge songa mondo otimgo misango miwang’o pep.

¹³ To misango mar cham michiwo gi imno nobed mogo mayom moromo kilo abiriyo, moruw gi mo. Misango nyaka wang’ mondo odum tik mamit ni Ruoth Nyasaye. To misango miolo piny nobed divai moromo lita achiel.

¹⁴ Kik ucham makati, kata cham molodi kata manumu, ka pok ochopo chieng’ michiwoe ni Nyasachu michne.”

¹⁵ Chakre chieng’ maluwo sabato mukeloe cham mar mich moyiedhi, nyaka ukwan jumbe abiriyo,

¹⁶ to chieng’ maluwo sabato mar abiriyo nobed chieng’ mar piero abich. Chiengno unutim misango mar cham gi cham mar higa manyien.

¹⁷ Nyaka ukel makati ariyo mugolo e miechu kaka mich moyiedhi. Nyaka losgi gi mogo mayom moromo kilo abiriyo moketie thowi, kendo nyaka chiwgi ni Ruoth Nyasaye ka chamb agwela.

¹⁸ Bende nyaka uchiw makati gi nyirombe abiriyo maonge songa, kendo ma hikgi achiel achiel, gi nyarwath achiel kod imbe ariyo. Ginibed misango miwang’o pep mitimo ni Ruoth Nyasaye. Unuchiwgi kaachiel gi misango mar cham kod misango miolo piny mondo obed misango miwango ma dum tik mamit ni Ruoth Nyasaye.

¹⁹ Bende nyaka uchiw nywok achiel mitimogo misango mar golo richo, kod nyiimbe ariyo ma hikgi achiel achiel mitimogo misengni mag sawo.

²⁰ Jadolo nyaka chiwgi e nyim Ruoth Nyasaye ka mich moyiedhi, kaachiel gi makati mag chamb gwel. Ginibed mich moyiedhi michiwo e nyim Ruoth Nyasaye, kendo ginidong’ ni jadolo.

²¹ Unugo milome mar chokruok maler chieng’ onogo, kendo ok unuti tijeu mapile. Mano en chik momakou gi nyikwau nyaka chieng’, kamoro amora mudakie.

²² “Ka ukayo cham e puotheu, to kik uke nyaka giko puotheu, kata kik uhul abang’ tiang’. Nyaka uwegi ni joma odhier kod jodak. An e Ruoth Nyasaye ma Nyasachu.”

²³ Ruoth Nyasaye nowacho ni Musa

²⁴ mondo onyis jo-Israel niya, “Due achiel mar due mar abiriyo nobednu chieng’ yueyo ma unugoe milome gi tung’ mondo obed chokruok maler.

²⁵ Kik utim tijeu mapile, to chiwuru ni Ruoth Nyasaye misango miwang’o.”

²⁶ Ruoth Nyasaye nowacho ni Musa

²⁷ mondo onyis jo-Isarel niya, “Due apar due mar abiriyono nobednu chieng’ migolonue richo. Enobed chokruok maler ma nyaka uriye kech, kendo uchiwie ni Ruoth Nyasaye misango miwang’o.

²⁸ Chieng’ onogo kik uti tich moro amora nikech en chieng’ pwodhruok, migolonue richo e nyim Ruoth Nyasaye ma Nyasachu.

²⁹ Emomiyo ng’ato ka ng’ato ma ok oriyo kech chiengno nyaka ng’ad kare oko kuom ogandagi.

³⁰ Anatiek ng’at motiyo tich moro amora chieng’no kang’ade oko kuom ogandagi.

³¹ Kik uti tich moro. Mano en chik momakou gi nyikwau nyaka chieng’, kamoro amora mudakie.

³² Chieng’ono nobednu sabato mar yueyo maber, omiyo nyaka uri kech. Chakre odhiambo mar due ochiko nyaka odhiambo mar due apar kik uti.”

³³ Ruoth Nyasaye nowacho ni Musa

³⁴ mondo onyis jo-Israel bende ni, chakre due apar gabich mar due abiriyono, Sap Kiche mar Ruoth Nyasaye nobedie kuom ndalo abiriyo.

³⁵ Chieng’ mokwongo nobedie chokruok maler ma kik utiye tijeu mapile.

³⁶ Kuom ndalo abiriyogo nyaka uchiw ni Ruoth Nyasaye misengni miwang’o, to chieng’ mar aboro chokruok maler nobedie. Chieng’no bende unuchiw ni Ruoth Nyasaye misango miwang’o. En chokruok mitiekogo nyasi, omiyo kik uti tijeu mapile.

³⁷ Mago e sewni ma Ruoth Nyasaye oketo ma nyaka ogoe milome ni gin e chokruok maler michiwoe ni Ruoth Nyasaye misengni miwang’o kod misengni miwang’o pep, kod misengni mag cham gi misengni mag sawo gi misengni miolo piny, moro ka moro gi chieng’e.

³⁸ To ewi mago nitie sabato mag Ruoth Nyasaye kod chiwou moko duto gi mich muchopogo kuong’ruok mau, kod mago muchiwo ni Ruoth Nyasaye kuom herou.

³⁹ “To chakre due apar gabich nogo, due mar abiriyo, bang’ keyo, nyaka utim sap Ruoth Nyasaye kuom ndalo abiriyo. Chieng’ mokwongo nobed chieng’ yueyo mowal, to chieng’ mar aboro bende kamano.

⁴⁰ Chieng’ mokwongono unukaw olembe mag yien mabeyo gi bede othidhe kod bede yien motimo otie, kaachiel gi bede yien matwi e tiend aore, mi unubed mamor e nyim Ruoth Nyasaye ma Nyasachu kuom ndalo abiriyo.

⁴¹ Nyaka utim sawoni ni Ruoth Nyasaye kuom ndalo abiriyo higa ka higa. En chik momakou gi nyikwau nyaka chieng’. E due mar abiriyo nyaka utimie sawoni.

⁴² Uduto ma un jo-Israel nyaka ubed e kiche kuom ndalo abiriyo.

⁴³ Mondo omi nyikwau opar kaka namiyo jo-Israel odak e kiche ka ne agologi e piny Misri. An e Ruoth Nyasaye ma Nyasachu.”

⁴⁴ Mano e kaka Musa nonyiso jo-Israel sewni ma Ruoth Nyasaye oketo.