Tim jo-Lawi 20 - MUMA MALER 2015

Kum miyudo kuom ketho chik

¹ Ruoth Nyasaye nowacho ni Musa

² ni mondo onyis jo-Israel niya, “Ka ja-Israel moro amora kata japiny moro modak kuomgi ochiwo nyathine moro ni nyasaye moro manono miluongo ni Molek, to nyaka neg ng’atno. Jo-Israel duto nogoye gi kite, nyaka otho,

³ kendo an awuon nabed jasike, mi nang’ad kare oko kuom ogandagi, nikech osechiwo nyathine ni Molek, kodwanyogo Kama Ler mara, kendo kochayo nyinga maler.

⁴ To ka ji otemo fwayo wach ng’at mochiwo nyathine ni Molek, mi ok ginege,

⁵ to an awuon nabed jasik ng’atno, kaachiel gi dhoodgi duto. Anang’ad kargi oko kuom ogandagi, kaachiel gi jogo duto maluwe kendo madwanyore ka lamo Molek.

⁶ “Ka ng’ato oweya, modwanyore gi jonyakalondo kod ajuoke ma moko kaka dhako weyo chwore kendo dwanyore gi chwo mamoko, to nabed jasik ng’atno, kendo nang’ad kare oko kuom ogandagi.

⁷ Kuom mano pwodhreuru ubed maler, nikech an Ruoth Nyasaye ma Nyasachu aler.

⁸ Nyaka urit chikena kendo uluwgi, nimar an e Ruoth Nyasaye mapwodhou.

⁹ “Ka ng’ato oyanyo wuon mare kata min mare, to nyaka nege. Rembe nodong’ e wiye, nikech oseyanyo wuon gi min.

¹⁰ Ka ng’at oterore gi chi wadgi, to ng’atno kaachiel gi dhakono nyaka negi.

¹¹ Ng’at moterore gi chi wuon, oelo dug wuon mare. Giduto ji ariyogo, nyaka neggi kendo rembgi nodong’ e wigi.

¹² Ka ng’ato oterore gi chi wuode, to nyaka neggi giduto ji ariyogo, nikech gisetimo gima mono. Rembgi nodong’ e wigi.

¹³ Ka ng’ato onindo gi dichwo wadgi ka ng’ama terore gi dhako, giduto gitimo gima kuero. Nyaka neggi, kendo rembgi nodong’ e wigi.

¹⁴ Ka ng’ato okendo nyako moro, kaachiel gi min nyakono to mano richo maduong’. Nyaka wang’gi gi mach giduto, mondo richo maduong makamano kik bed kuomu.

¹⁵ Ng’at moterore gi chiayo moro amora nyaka negi. Chiayono bende nyaka negi.

¹⁶ Ka dhako moro odhi ir chiayo moro mondo oterre kode, to nyaka neg dhakono kaachiel gi chiayono. Noneggi duto, kendo rembgi nodong’ e wigi.

¹⁷ “Ka ng’ato okawo nyamin mare ma nyar wuon kata ma nyar min, mi giterore, to mano en wichkuot marach. Nyaka neggi ka ji duto neno. Ng’atno oseterore gi nyamin, omiyo nyaka kume.

¹⁸ Ka ng’ato oriwore gi dhako ka nie due, to okuodo wi dhakono, nikech oseelo kama rembe wuokie; dhako bende oseelo kama rembe wuokie. Giduto nyaka ng’ad kargi oko kuom ogandagi.

¹⁹ Kik iterri gi nyamin meru kata gi wayu, nikech mano en ketho wat. Joma timo kamano nyaka yud kum.

²⁰ Ng’at moterore gi chi owadgi wuon mare, okuodo wi wuon mareno, omiyo giniyud kum. Noneggi, kendo nyinggi nolal nono kuom ogandagi.

²¹ Ka ng’ato oterore gi chi owadgi, otimo gima ogak, kendo okuodo wi owadgi. Nyinggi nolal nono kuom ogandagi.

²² “Nyaka urit chikena gi buchena duto, kendo uluwgi, mi piny ma akelou mondo udagie kik ng’ogu oko.

²³ Kik uluw timbe ogendini ma ariembonu mondo owenu thuolo.

²⁴ Ne gitimo gik marichogo duto, mi asin kodgi, omiyo nawachonu ni abiro miyou pinygi maber kendo momewno mondo ukaw. An e Ruoth Nyasaye ma Nyasachu mosepogou gi ogendini mamoko,

²⁵ omiyo un bende nyaka upog le michamo gi le makuero kod winy michamo gi winy makuero. Kik udok mogak nikech le kata winy, kata gimoro amora mamol, nimar aseketo pogruok e kindu kodgi, ka ahulonu ni gin gik makuero.

²⁶ Unubed jogo maler, nikech an Ruoth Nyasaye aler. Asepogou gi ogendini mamoko mondo ubed joga.

²⁷ “Ng’ato ang’ata kuomu ma dichwo kata ma dhako ma janyakalondo kata ma ajuoga moro amora nyaka go gi kite mi otho, kendo rembe nodong e wiye owuon.”