Tim jo-Lawi 17 - MUMA MALER 2015

Misengni nyaka tim kamoro achiel kende

¹ Ruoth Nyasaye nowacho ni Musa

² ni mondo onyis Harun gi yawuote kaachiel gi jo-Israel duto ni Ruoth Nyasaye ochiko kama:

³ Ka ja-Israel moro amora onego dhiang’ kata rombo kata diel ei kambi kata oko mar kambi,

⁴ to ok okelo e dho Hemb Romo mondo otimgo ni Ruoth Nyasaye misango e nyim Hema Maler mar Ruoth Nyasaye, to nokwane ka ng’ama oneko. Osechuero remo, omiyo nyaka ng’ad kare oko kuom ogandagi.

⁵ Chikni oketi mondo jo-Israel okel ni Ruoth Nyasaye jamni ma ginego oko. Nyaka gikelgi ni jadolo e dho Hemb Romo, mondo gitim kodgi misengni mag sawo ni Ruoth Nyasaye.

⁶ Jadolo nokir remo e kendo-mar-misango mar Ruoth Nyasaye man e dho Hemb Romo, kendo nowang’ boche mondo odum mamit ni Ruoth Nyasaye.

⁷ Ka jo-Israel nego jamni, to kik gimed timo misengni ni jochiende ma gilamo, ka gidwanyorego mana kaka dhako moweyo chwore dwanyore gi chwo mamoko, mano nobed chik momakogi kaachiel gi nyikwagi nyaka chieng’.

⁸ Ruoth Nyasaye nomedo wacho ni Musa mondo owach ni jo-Israel niya, “Ka ja-Israel moro amora kata japiny moro modak kuomu otimo misango miwang’o pep kata misango moro amora,

⁹ to ok okelo e dho Hemb Romo mondo otimnigo Ruoth Nyasaye misango, nong’ad kare oko kuom ogandagi.

Ruoth Nyasaye okwero chamo remo

¹⁰ “Ka ja-Israel moro amora kata japiny moro modak kuomu ochamo remo to anabed jasike, mi nang’ad kare oko kuom ogandagi,

¹¹ nikech ngima gimoro ni e rembe. Achiwo remo mondo otimgo misango e kendo-mar-misango mondo upwodhrugo, nimar remo, tiende ni ngima, ema ipwodhogo richo.

¹² Mano emomiyo asekwero jo-Israel kaachiel gi jopinje moko modak kuomgi ni kik gicham remo.

¹³ “Ka ja-Isarel moro amora kata japiny moro modak kuomu odhi dwar, momako le kata winyo minyalo chamo, to nyaka ool rembe piny, kendo oik gi lowo,

¹⁴ nikech ngima gimoro ni e rembe. Mano emomiyo asekwero jo-Isarel mondo kik ocham remb gimoro, nikech ngima gino ni e rembe. Ng’at mochamo remo nong’ad kare oko.

¹⁵ “Ng’ato ang’ata, bed ni en ja-Israel kata japiny moro modak kuomu, mochamo gimoro motho athoya kende, kata ma ondiek onego, nolwok lepe kendo nolwokre, to nosik kogak nyaka odhiambo, eka bang’e nobed maler.

¹⁶ To ka ok olwoko lepe, kendo ok olwokore, to noyud kum kuom kethone.”