Tim jo-Lawi 16 - MUMA MALER 2015

Chieng’ pwodhruok mar oganda jo-Israel

¹ Kane yawuot Harun ariyo kande osetho kuom chiwo mach ma ok ni kare e nyim Ruoth Nyasaye,

² Ruoth Nyasaye nowacho ni Musa niya, “Nyis Harun owadu ni kik okadh pasia, mi odonj e Kama Ler e nyim raum Sandug Muma miluongo ni kar ng’wono, mak mana e kinde moketi, nono to otho, nikech afwenyora gi e bor polo man ewi raum.

³ E kinde ka kinde ma Harun donjoe Kama Ler, to nyaka okel nyarwath mondo otimgo misango mar golo richo, kod im mondo otimgo misango miwang’o pep.”

⁴ Enorwak law dolo mabor gi sirwari mondo ogeng’go duge, kendo notue misip e nungone, kendo nosidh kilemba e wiye, mago duto nobed mag katana maber. Gin lep dolo, omiyo Harun nyaka lwokre ka pok orwakogi.

⁵ Enokaw nyuogi ariyo kuom oganda jo-Israel mondo otimgo misango mar golo richo, kendo im achiel mondo otimgo misango miwang’o pep.

⁶ Nyaka otim misango mar golo richo gi rwath mondo opwodhrego kaachiel gi joode.

⁷ Bang’ mano, nokaw nyuogi ariyo kande, kendo nokelgi e nyim Ruoth Nyasaye e dho Hemb Romo.

⁸ Nyaka ogo ombulu kuomgi mondo diel achiel obed mar Ruoth Nyasaye, to machielo obed mar Azazel.

⁹ Eka nokaw diel ma ombuch Ruoth Nyasaye olwar kuome mi notimgo misango mar golo richo.

¹⁰ Diel ma ombuch Azazel olwar kuome to nokel ka ngima e nyim Ruoth Nyasaye, mi nopwodhe. Eka noriembe odhi e thim ir Azazel.

¹¹ Harun nyaka chiw rwath mondo otimgo misango mar golo richo, kopwodhorego kaachiel gi joode.

¹² Enokaw tap mach moketie mach mogol e kendo-mar-misango manie nyim Ruoth Nyasaye kaachiel gi ubani mang’ue ng’ar moromo lwedo ariyo, mi nokel ei kama nogeng’ gi pasia.

¹³ Eka nool ubani e majno e nyim Ruoth Nyasaye mondo ich ubani oim Sandug Rapar, mondo kik otho.

¹⁴ Enokaw remb rwath, mi nokir gi lith lwete e bath raum koma ochomo yo wuokchieng’ kendo nokir remono nyadibiriyo gi lith lwete e nyim raum.

¹⁵ Bang’ mano noyang’ diel mitimogo misango mar golo richo ni oganda jo-Israel, mi noter rembe ei kama ogeng’ gi pasia, kendo nokir remono ewi raum, kendo e nyim raum, mana kaka nokiro remb rwath.

¹⁶ Mano e kaka enopwodh Kama Ler kuom timbe mogak ma jo-Israel osedwanyego, kendo kuom timbe mane giweyogo Ruoth Nyasaye, tiende ni richogo duto. Kamano bende e kaka nopwodh Hemb Romo manie diergi, kama timbegi ogakie.

¹⁷ Ong’e ng’at moro machielo manobed ei Hemb Romo chakre sa ma Harun donjo ei Kama Ler mondo opwodhre owuon, kendo opwodh joode kod oganda duto mar jo-Israel nyaka sa ma owuokie, kosetieko tich pwodhruok duto.

¹⁸ Bang’e nowuog oko e kendo-mar-misango manie nyim Ruoth Nyasaye, mi nopwodh kendono. Nokaw remb rwath moko kod remb diel moko mi nomien-go tunge duto mag kendo-mar-misango,

¹⁹ kendo nokir remo moko nyadibirioyo gi lith lwete e kendo-mar-misango. Kamano nopuodhe kuom timbe mogak mag jo-Israel mi nomi obed maler.

²⁰ Ka Harun osetieko pwodho Kama Ler gi Hemb Romo kendo-mar-misango, to nokel diel mangima e nyim oganda.

²¹ Enoket lwetene duto ewi diendno, kendo nohul richo duto mag jo-Israel gi timbe mane giweyogo Ruoth Nyasaye, tiende ni richogi duto. Enowe richogo duto ewi diendno, eka nomiye ng’at ma noyud obet ka rito mondo otere e thim.

²² Kamano diendno noting’ richo duto mag jo-Israel e thim kuma bor. Ng’atno noweye kuno mondo odhi adhiya.

²³ Bang’ mano, Harun nodonj e Hemb Romo, mi nolony lep katana mane orwako kodonjo e Kama Ler kendo nowegi kanyo.

²⁴ Eka nolwokre gi pi, kamoro moyang ni Nyasaye, kendo norwak lepe mag dolo, mi nowuog oko mondo otim misangone owuon miwang’o pep, kod mar oganda jo-Israel. Kamano nopwodhre, kendo nopwodh ji bende.

²⁵ Enowang’ boche chiayo motimogo misango mar golo richo e kendo-mar-misango.

²⁶ To ng’at mane oriembo diel, ka tero ir Azazel kik donj e kambi nyaka chop olwok lepe kendo olwokre.

²⁷ Rwath gi diel motimgo misengni mag golo richo, kendo ma rembgi oseter ei Kama Ler mondo opwodhgo richo, nogol ringgi gi piendegi kod owuochgi oko e tok kambi, kama nyaka wang’gie pep.

²⁸ Ng’at ma owang’ogi nyaka lwok lepe kendo lwokre, eka bang’e onyalo duogo e kambi.

²⁹ Koro chik momakou nyaka chieng’ e ma: Due apar mar due mar abiriyo, un jo-Israel kaachiel gi jopinje mamoko modak kuomu, nyaka utue chiemo, kendo kik uti tich moro,

³⁰ nikech chieng’no ema nogolnue richou mondo upwodhru. Kamano unupwodhru kuom richou duto e nyim Ruoth Nyasaye.

³¹ Chieng’no en chieng’ Sabato moyiedhi ma nyaka uyueye, kendo nyaka utueye chiemo. En chik momakou nyaka chieng’.

³² Jadolo mowir kendo moketi kar wuon mare e tij dolo ema notimnu pwodhruok. Enorwak lep dolo mag katana maber.

³³ Kendo enopwodh Kama Ler gi Hemb Romo kod kendo-mar-misango. Eka nopwodh jodolo kod oganda jo-Israel duto.

³⁴ Mano nobed chik momakou nyaka chieng’ mondo upwodh jo-Israel dichiel e higa kuom richogi. Kamano Musa nochopo chike mag Ruoth Nyasaye.