Tim jo-Lawi 15 - MUMA MALER 2015

Gik machuer e dend ng’ato mamiyo obedo mogak

¹ Ruoth Nyasaye nowacho ni Musa gi Harun

² ni mondo onyis jo-Israel ni: Ka nyot ng’ato owuok, kata koyudo tuo nyach machuer, to gima chuerno bedo mogak.

³ Kata ka nyajno chuer kata kodinore, to ng’atno ogak kendo chik mar gakne kuom chuer kamano chalo kama:

⁴ Kitanda ma ng’at ma dende chuer kamano onindoe, kata gimoro amora mobetie bedo mogak,

⁵ ng’ato ang’ata momulo kitandano nyaka lwok lepe, kendo lwokre, to nosik kogak nyaka odhiambo.

⁶ Bende ng’ato ang’ata mobet kama ng’at ma dende chuer osebetie, nyaka lwok lepe, kendo lwokre, to nosik kogak nyaka odhiambo.

⁷ Ng’ato ang’ata momulo ng’at ma dende chuer nyaka lwok lepe, kendo lwokre, to nosik kogak nyaka odhiambo.

⁸ Ka ng’at ma dende chuer ong’ulo olawo kuom ng’ato, to ng’at mong’ul kuome olawno nyaka lwok lepe, kendo lwokre, to nosik kogak nyaka odhiambo.

⁹ Gimoro amora ma ng’at ma dende chuerno obetie ka en e wuoth bedo mogak.

¹⁰ Ng’ato ang’ata momulo gima ng’atno osebetie nobed mogak nyaka odhiambo kendo ng’ato moting’o gik ma kamago nyaka lwok lepe, kendo lwokre, to nosik kogak nyaka odhiambo.

¹¹ Ng’ato ang’ata ma ng’at ma dende chuer omulo ka pok ologo nyaka lwok lepe kendo lwokre, to nosik kogak nyaka odhiambo.

¹² Gimoro amora mochue gi lowo ma ng’at ma dende chuer omulo nyaka negi, to ka en gima olos gi bawo, to nyaka lawe gi pi.

¹³ Ka ng’at ma dende chuerno ochango, to nyaka owe ndalo abiriyo kadhi kopwodhore. Nolwok lepe, kendo nolwokre gi pi maler, eka nopwodhre.

¹⁴ Chieng’ mar aboro nokaw akuch odugla ariyo kata nyithi akuru ariyo, mi nobigo e dho Hemb Romo e nyim Ruoth Nyasaye, kendo nomigi jadolo.

¹⁵ Jadolo nokaw akuru achiel, mi notimgo misango mar golo richo, to machielo notimgo misango miwang’o pep. Kamano nopwodh ng’atno e nyim Ruoth Nyasaye, kaka chik dwaro kuom gak mar chuer.

¹⁶ Ka nyot ng’ato owuok, to nyaka olwok dende duto gi pi, kendo nosik kogak nyaka odhiambo.

¹⁷ Nanga moro amora kata pien moro amora ma nyodo otonie nyaka lwoki, kendo nobed mogak nyaka odhiambo.

¹⁸ Chikno bende omako dhako ma ng’ato oriworego. Giduto ji ariyogo nyaka gilwokre, to ginisik ka gigak nyaka odhiambo.

¹⁹ Ka dhako odhi e due, to nobed mogak kuom ndalo abiriyo, kendo ng’ato ang’ata momule nobed mogak nyaka odhiambo.

²⁰ Gimoro amora monindoe kata mobetie e kindego nobed mogak.

²¹ Ng’ato ang’ata momulo kitanda dhakono,

²² kata momulo gimoro mosebetie nyaka lwok lepe, kendo lwokre, to nosik kogak nyaka odhiambo.

²³ Kata ka omulo gima nie kitanda dhakono, kata man kama obetie, to nobed mogak nyaka odhiambo.

²⁴ Ka ng’ato oriwore gi dhakono mi rembe omiene, to nobed mogak.

²⁵ Ka dhako moro chuer kuom ndalo mogwarore e kinde ma ok odhi e due, kata ka ochuer aming’a mokadho kaka ojadhi e due, to nobed mogak e kinde mochwerieno duto, mana kaka ndalo modhi e due.

²⁶ Kitanda moro amora monindoe kata gimoro amora mobetie e kindeno nobed mogak mana ka kitanda monindoe kodhi e due.

²⁷ Ng’ato ang’ata momulo gigo nobed mogak, omiyo nyaka olwok lepe, kendo olwokre, to nosik kogak nyaka odhiambo.

²⁸ Ka dhakono ochango, to nyaka owe ndalo abiriyo kadhi, bang’e nobed maler.

²⁹ To chieng’ mar aboro nyaka okaw akuch odugla ariyo kata nyithi akuru abiriyo, mi oter ni jodolo e dho Hemb Romo.

³⁰ Jadolo nokaw akuru achiel, mi notimgo misango mar golo richo, to machielo notimgo misango miwang’o pep, kopwodho dhakono e nyim Ruoth Nyasaye kaka chik dwaro kuom gak mar chuer.

³¹ Kamano e kaka unusiem jo-Israel kuom bet mogak, nimar dipo ka gidwanyo Kar Dakna Maler manie kindgi, mi githo nikech gakgino.

³² Mano en chik momako ng’at moyudo nyach machuer kata ma nyote owuok mi odoko mogak.

³³ Bende en chik mamako dhako modhi e due, kaachiel gi ng’ato ang’ata bed ni en dichuo kata dhako, ma dende chuer, kod ng’at moriwore gi dhako mogak.