Rieko 4 - MUMA MALER 2015

¹ Ber bedo ng’a kare moloyo bedo gi nyithindo, nikech humb ng’ama kare osiko nyaka chieng’, kendo en gima Nyasaye gi ji ong’eyo.

² Ka ng’ama kare nitie, to waluwo timbene, to ka osedhi, to wagombe. Enobed gi osimbo mar loch nyaka chieng’, nikech noringo nguech maber, mi olocho.

³ To nyithindo mang’eny ma joricho onywolo onge ohala, nimar gichal gi udi ma onge mise motegno.

⁴ Gichal gi yien ma obokegi loth ndalo moko, to ka yamo biro, to yiengogi kendo ka auka obiro, to gipodho, nikech tiendegi othanyore.

⁵ Kapok gidongo, to bedegi tur, kendo olembegi kech ma ok chamre. Chutho, gionge gi ohala.

⁶ Ka Nyasaye yalo nyithindo monywol e yo ma ok ni kare, to mano nyiso richo mag jonywol e lela.

Gimomiyo ng’ama ber tho chon

⁷ Ng’ama kare kata ka otho chon to nobed gi kue.

⁸ Higni mang’eny ma ng’ato odakgo e piny ok ema kelne pak, kendo kar romb higni ma ng’ato otieko ok ema nyis ber mar ngimane.

⁹ Bedo gi rieko ber mana ka wich moti lwar, kendo bedo gi ngima maler ber mana ka higni mang’eny.

¹⁰ Ng’ama kare temo bedo malong’o e nyim Nyasaye, omiyo Nyasaye ohere, kendo otere e polo, nikech odak e kind joketho.

¹¹ Nyasaye kawe mondo kik richo keth parone, kata kik galruok mar richo keth chunye,

¹² nikech galruok mar richo chido gik mabeyo, kendo tungni mar gombo ketho chuny mobolore.

¹³ Odoko ng’ama kare chutho piyopiyo, omiyo ngimane okwan ka ngima mar ng’ama hike ng’eny.

¹⁴ Chunye long’o e nyim Nyasaye, omiyo Nyasaye gole mapiyo e kind joricho.

¹⁵ Ji neno gima otimorene, to ok giwinj tiende, kendo ok ginyal fwenyo ni Ruoth Nyasaye kecho jomoyier mowalne, kotimonigi ng’wono kendo koritogi.

¹⁶ Ng’ama kare kata tho, to ngimane miyo richo mag joma ok oluoro Nyasaye mapod ngima nenore, kendo ng’at motho ka hike pod nok bende timo kamano ni joma richo ma hikgi ng’eny.

¹⁷ Ji neno giko mar ng’ama riek, to ok ging’eyo gima Ruoth Nyasaye paro kuome, kata gimomiyo okete kama ber.

¹⁸ Ka gineno gima otimorene, to gijare, to gin ema Ruoth Nyasaye nonyiergi!

¹⁹ Bang’ ndalo matin, ginibed jomotho maonge pak, kendo ginibed e piny jomotho ka gin gi wichkuot. Ruoth Nyasaye nobolgi piny ka dhogi omoko, kendo notiekgi mana ka ot momuk mise mare. Adier, ginichal gi dala moketh, modong’ gunda, mi chunygi nobed malit ahinya, to onge ng’ama nopargi.

Buch joma beyo gi joma richo

²⁰ Ginibi ka gikirni nikech richogi, nimar chieng’ bura, richogi nochung’ kadonjonigi.