Rieko 3 - MUMA MALER 2015

Giko mar joma beyo gi mar joma richo

¹ To chuny joma beyo nie lwet Nyasaye, kendo onge gima nohinygi.

² Joma ofuwo to ne galo ni joma beyo osetho, kendo ne gigalo ni tho mane githogo ne nyiso ni ologi,

³ kendo ni gilal chuth, to kara ginie ngima mar kue.

⁴ Ji ne neno ni giyudo sand malit, to ne gin gi geno mogundho mar yudo ngima mochwere.

⁵ Kum mane giyudo ne tin, to gueth ema ne giyudo mathoth. Nyasaye notemogi, kendo noyudo ni giwinjore bet kode.

⁶ Notemogi kaka itemo dhahabu e mach kendo noyie kawogi mana kaka oyie gi misango miwang’one pep.

⁷ Ka Nyasaye obiro mondo olimgi, to girieny ka sulue marieny e polo.

⁸ Gining’ad bura ni ogendini, kendo ginibed gi loch kuom ji duto manie piny, kendo Ruoth Nyasaye nobed Ruodhgi nyaka chieng

⁹ Joma ogeno kuome nong’e adierane, kendo joma oserito chikene notine gi hera, nikech ng’wono gi miwafu ema nobed pok joma oyier.

¹⁰ To joma ok oluoro Nyasaye noyud sand mowinjore gi timbegi maricho, nikech ne ok gidewo ng’ama kare, kendo nikech ne giweyo Ruoth Nyasaye.

¹¹ Mano kaka joma chayo rieko gi ngima makare none malit! Gionge gi gima ginyalo geno; tijgi bende ok kelnigi gimoro, kendo timbegi dhi mana nono.

¹² Mondegi onge gi rieko, to nyithindgi bende gin joricho, kendo nyikwagi gin joma okuong’.

Ber bedo migumba moloyo nywolo nyithindo maricho

¹³ Dhako ma migumba ma timbene long’o, kendo ma ok terre gi ng’ato, en jahawi, nimar timne maber nonenre chieng minonoe chuny ji.

¹⁴ Ng’ama bwoch bende en jahawi kapo ni ok otim richo, kata ka ok opar marach kuom Ruoth Nyasaye. Enoyud mich miwuoro nikech dimbruokne,

¹⁵ nikech timbe makare ma ng’ato timo nokelne duong’ kendo rieko ok tow.

¹⁶ To nyithind joma terore ok nodhi nyime maber. Adier, nyithindo monywol e yo ma ok ni kare nolal nono.

¹⁷ Kata ka gidak aming’a to ok nokwan-gi ka gimoro, kendo kata ka githo ka hikgi ng’eny, to hikgi mang’enyno ok nokelnigi pak.

¹⁸ To ka githo ka hikgi nok, to ok ginibed gi geno kata kue chieng’ bura!

¹⁹ Chutho, joma timbegi mono none malit moloyo.