Rieko 2 - MUMA MALER 2015

¹ Parogi olal, omiyo giwacho niya, “Ngimawa chwok kendo nigi thagruok mathoth, kendo onge ng’ama nyalo golo ng’ato e piny jomotho.

² Ne wapo apoya konywolwa, kendo bang’ thowa wanabed ka joma ne ok osebetie. Muchwa chal gi iro makadho, kendo riekowa en mach maliel ka adundowa guecho,

³ to ka majno otho, to ringrewa lokore buru, kendo muchwa lal nono mana ka yamo.

⁴ Bang’ ndalo moko wi ji wil kodwa, kendo onge ng’ama paro gimoro amora mane watimo. Adier, ngimawa leny mana ka boche polo matindo kata ka ong’wengo ma duono ka chieng’ otegno.

⁵ Ndalowa chalo gi tipo makadho, kendo ok wanyal ringo tho, nikech buchwa oseng’adi, kendo onge ng’ama nyalo duogo.

⁶ Omiyo wabeduru mamor gi gik mabeyo mantie, kwakonyore gi gimoro amora mochwe, mana ka gima pod wan yawuowi man gi muya.

⁷ Wamethuru kaka wahero, kendo wawirre gi mo mang’we ng’ar, kendo wakonyre gi maua e kinde ma gimoyoe.

⁸ Adier, wagawreuru gi maua kapok oner.

⁹ Ka ji miel kendo serore, to kik ng’atwa moro bed maonge, kendo waweuru ranyisi mag tukewa kuonde duto mondo ji oparwago. Mano e pokwa, kendo e tich momiwa.

¹⁰ “Wasanduru ng’ama kare modhier, kwathire, kendo kik wakech chi liel, bende kik waluor jaduong’ ma hike ng’eny ma wiye oti lwar.

¹¹ Wakwanuru gimoro amora mwanyalo timo gi tekrewa ka gima kare, nikech bedo mayomyom ok kony gimoro.

¹² Wachikuru obadho ni ng’ama kare, nimar omiyowa mirima kodagi timbe mwatimo, kendo odhaw kodwa nikech waketho Chik, kowacho ni waweyo timbe mane opuonjowa

¹³ Ng’ama kare wacho ni ong’eyo Nyasaye, kendo oluongore ni wuod Nyasaye.

¹⁴ Kochung’ e nyimwa, to waneno marach, nikech parowa opogore gi parone. Adier, kwanene to ochido chunywa!

¹⁵ Ngimane ok chal gi ngima jomoko’ kendo ok wangiyo gi yore moluwo.

¹⁶ Okawowa ka pesa mag miriambo, kendo obaro ni timbewa mana kaka dobar ni gik motop. Owacho ni ka ng’ama mako chik Nyasaye otho, to oyudo gueth, kendo osungore ni Nyasaye en wuon mare.

¹⁷ Koro wane ane kata ka owacho adieri, kwaneno gima biro timore e giko!

¹⁸ Ka ng’ama kare en wuod Nyasaye adier, to Nyasaye nobed jakore, kendo norese e lwet wasike.

¹⁹ Biuru, wayanye kendo wasande malit kwatemego, mondo wane ane ka en ng’ama muol adier,

²⁰ Wang’adne buch tho marach, nikech en owuon osenyisowa ni Nyasaye biro rite.”

Fup joma ok oluoro Nyasaye

²¹ Mano e kaka giwuoyo, to kata kamano girwenyo, kendo sadha ma gin-go olokogi muofni.

²² Ok ging’eyo weche mopondo mag Nyasaye, bende gionge gi geno ni Nyasaye miyo joma timbegi kare pok mowinjore kodgi.

²³ To Nyasaye nochweyo dhano mondo obed gi ngima ma ok rum, kendo nochueye machal gi kite owuon.

²⁴ Nyiego mane Satan nigo ema nokelo tho e piny, kendo jogo moriwore kode ema tho.