Rieko 1 - MUMA MALER 2015

Puonj kuom dwaro Nyasaye

¹ Un jong’ad bura mag piny, heruru adiera. Paruru Nyasaye gi chunyu makare, kendo dwareuru gi chunyu achiel,

² nikech jogo ma ok teme, ema yude, kendo ofwenyore mana ni joma ogeno kuome.

³ To paro mobam miyo Nyasaye bedo mabor gi dhano’ kendo okuodo wi joma temo tekone,

⁴ nikech rieko ok nyal donjo e chuy ng’at mawuondore, kendo ok odag e ringruok ma richo olochoe.

⁵ Roho Maler mapuonjo chik otang’ ni miriambo, kendo obedo mabor gi ng’ama timo gik moko maonge paro, bende obwok koneno richo.

⁶ Rieko ohero dhano, to ok nowe ni ng’ama yanyo Nyasaye richone, nikech Nyasaye neno gima nie chuny dhano, bende owinjo gik moko duto mowacho.

⁷ Adier, Roho mar Nyasaye opong’o piny ngima! Oriwo gik moko duto, kendo ong’eyo weche duto ma ji wacho.

⁸ Emomiyo, ng’ama wacho weche mobam ok nyal pondo, kendo ok notony mak okume.

⁹ Paro maling’ling’ mag ng’ama rach nofwenyre, kendo Ruoth Nyasaye nowinj gima owacho, mi bura noloye kuom timbene maricho.

¹⁰ Nyasaye chiko ite kendo winjo gik moko duto, omiyo kata mana wach ywagruok mokuodhi mos, ok nyal kadhone!

¹¹ Kuom mano, tang’uru mondo kik ubed gi ng’ur kayiem nono, nikech weche maling’ling’ ok kadh nono mak okelo bura, kendo dhok mawacho miriambo kelo ni ng’ato tho.

¹² Kik uyie yoreu mobam kelnu tho, kata kik uyie timbeu uwegi kelnu hinyruok.

¹³ Nyasaye ok ema ne okelo tho, kendo ok omor ka gik mangima tho,

¹⁴ nimar nochweyo gik moko duto mondo obedie. Gik moko duto mochweyo manie piny nigii ngima maber, kendo kwiri marach makelo tho onge kuomgi. Tho bende ok nigi loch e pinyni,

¹⁵ nikech timbe makare ok kel tho.

Gima jaricho paro kuom ngima dhano

¹⁶ To joma ok ohero Nyasaye luongo tho mondo obed kodgi. Gitimo singruok kode, kendo adier gin joma owinjore bedo kode.