Rapar mar Chik 34 - MUMA MALER 2015

Tho mar Musa

¹ Musa nowuok oa e paw Moab moidho got Nebo nyaka wi Pisga yo wuokchieng’ mar Jeriko, mi Ruoth Nyasaye nonyise piny Kanaan duto, chakre Gilead nyaka Dan,

² gi piny Naftali duto, kod piny Efraim gi Manase kaachiel gi piny Juda duto nyaka nam Mediterenia man yo podho chieng’,

³ gi piny man yo milambo, kod paw holo man yo Jeriko miluongo ni Dala Othidhe, nyaka Zoar.

⁴ Ruoth Nyasaye nowachone niya, “Ma e piny mane asingora ni Ibrahim gi Isaka kod Jakobo ni nami nyikwagi. Asenyisigo mondo inene gi wang’i, to kata kamano, ok niidh loka, midonjie.”

⁵ Kamano, Musa jatich Ruoth Nyasaye notho e piny Moab kuno, mana kaka Ruoth Nyasaye nosewacho,

⁶ mi noyike e holo momanyore gi Beth-peor e piny Moab. To onge ng’ama ong’eyo liende nyaka chil kawuono.

⁷ Musa ne otho ka jahigni mia achiel gi piero ariyo, to ne pod en ng’at matek ma wang’e bith.

⁸ Jo Israel noywage e paw Moab kuom ndalo piero adek, nyaka ndalo miywagego norumo.

⁹ Joshua wuod Nun nomi rieko mathoth, nikech Musa noseyieyo lwete kuome, mi jo-Israel nowinje, motimo gik mane Ruoth Nyasaye ochiko Musa.

¹⁰ Nyaka koroni janabi moro machal gi Musa, mane Ruoth Nyasaye romogo wang’ gi wang’, pok owuok e Israel.

¹¹ Paruru ranyisi gi honni duto mane Ruoth Nyasaye ooro Musa mondo odhi otim ni Farao gi joge kod piny Misri duto,

¹² kendo paruru timbe madongo kendo malich mane Musa otimo, ka jo-Israel neno.