Rapar mar Chik 12 - MUMA MALER 2015

Jo-Israel nyaka bed gi kar lemo achiel kende

¹ “Koro magi e chike kod buche ma onego urit maber e piny ma Ruoth Nyasaye ma Nyasach kwereu miyou mondo obed maru kuom ndalo duto mudak e piny.

² Nyaka uketh chuth kuonde ma ogendini mubiro riembogo lamoe nyisechegi, kata ka gin ewi gode maboyo kata ewi gode matindo, kata mana ka gin e tiend yath moro amora motimo otiep.

³ Mukuru kendegi mag liswa gi sirni maggi milamo mag kite, kendo uwang’ sirni maggi milamo mag yien, mi uketh kido mag nyisechegi. Kamano unuruch nying nyisechegi oko kuondego.

⁴ “Un to, kulamo Ruoth Nyasaye ma Nyasachu, to kik ulem kaka jogo ne lamo nyisechegi.

⁵ Ruoth Nyasaye ma Nyasachu owuon biro yiero kamoro e piny dhoodu moro mondo oketie nyinge. Kanyo kende ema unuchokrue kuom lamo Ruoth Nyasaye ma Nyasachu.

⁶ Kanyo ema ubiro keloe misengni mau miwang’o pep, kod misengni mamoko, gi chiwo mar achiel kuom apar, kod chiwo mamoko kod gik ma ukuong’oru ni ubiro chiwo, kod mago muchiwo kuom herou, kaachiel gi nyithindo makayo mag jambu.

⁷ Unuchiem kanyo e nyim Ruoth Nyasaye ma Nyasachu, kendo un gi jouteu unubed mamor, nikech Ruoth Nyasaye ma Nyasachu oseguedho gik moko duto mutimo.

⁸ “Kik udhi nyime gi gima watimo e ndaloni, ma ng’ato ka ng’ato timo mana gima ohero.

⁹ Usebedo kutimo kamano nikech pok uchopo kar yueyo, ma en piny ma Ruoth Nyasaye ma Nyasachu miyou ka mwanduu.

¹⁰ To ubiro ng’ado aora Jordan mondo udhi udag e piny ma Ruoth Nyasachu miyou ka mwanduu. Nomiu kue e kindu gi wasiku molworou koni gi koni, mi unudag maber.

¹¹ Bang’e ukel gigo duto ma achikou kama Ruoth Nyasaye ma Nyasachu biro yiero mondo nyinge obedie. Kanyo ema unukelie misengni mau miwang’o pep, kod misengni mamoko gi chiwo mar achiel kuom apar, kod chiwo mamoko, kaachiel gi chiwo moyiedhi mukuong’oru ni ubiro kelo ni Ruoth Nyasaye.

¹² Beduru mamor e nyim Ruoth Nyasaye ma Nyasachu, un gi yawuotu gi nyiu kod wasumbu machwo gi mamon, kaachiel gi jo-Lawi modak e miechu, nikech jo-Lawi onge gi piny mopognigi kaka opognu.

¹³ To kik uchiw misengni mau miwang’o pep kamoro amora muneno,

¹⁴ to chiwgiuru mana kama Ruoth Nyasaye ma Nyasachu biro yiero e piny dhoodu moro. Kanyo bende ema nyaka utimie gik moko duto machikou.

¹⁵ “To kata kamano, pod unyalo yeng’o e dala moro amora mondo ucham ring’o, e sa asaya muhero, mana kaka Ruoth Nyasaye ma Nyasachu omiyou. Ji duto, joma ogak kod joma ok ogak, nyalo chamo ring’ono, mana ka gima en ring ogunde kata ring mwanda.

¹⁶ Remo to kik ucham, to, oleuru piny mana ka pi.

¹⁷ To e miechu kik uchamie chiwo mar achiel kuom apar mag chambu kata mag divai kata mag mo, kendo kik uchamie nyithindo makayo mag jambu, kata chiwo mukwong’oru ni ubiro chiwo, kata mugolo kuom herou, kata mana chiwo moro amora mowal ni Ruoth Nyasaye.

¹⁸ Ubiro chamo gigo mana kama Ruoth Nyasaye ma Nyasachu biro yiero. Kanyo ema unuchiemie e nyim Ruoth Nyasaye ma Nyasachu, un gi yawuotu gi nyiu, kod wasumbu machwo gi mamon, kaachiel gi jo-Lawi modak e miechu. Unubed mamor e nyim Ruoth Nyasaye ma Nyasachu kuom gik moko duto mutimo.

¹⁹ Ndalo duto ma un e piny nyaka une ni ok ujwang’o jo-Lawi.

²⁰ “Ka Ruoth Nyasaye ma Nyasachu oseyaro pinyu kaka osesingorenu, mi ng’atu moro ogombo chamo ring’o, to onyalo chame mana kaka odwaro.

²¹ To ka obedo ni kama Ruoth Nyasaye ma Nyasachu biro yiero mondo nyinge obedie bor kod ng’atno, to onyalo nego chiache moro ma Ruoth Nyasaye omiye, kendo onyalo chame e dalane sa asaya modwaro.

²² Onyalo chame mana kaka ng’ato chamo ring ogunde kata ring mwanda. Joma ogak kaachiel gi joma ok ogak nyalo chame.

²³ To neuru ni ok uchamo remo, nimar remo e ngima, omiyo kik ucham ngima gi ring’o kanyakla.

²⁴ Kik uchame, to oleuru piny mana ka pi.

²⁵ Ka ok uchame, to ubiro dhi maber, kaachiel gi nyikwau nimar utimo gima long’o e nyim Ruoth Nyasaye.

²⁶ To chiwo mowal ni Ruoth Nyasaye, kod gik mukuong’oru ni ubiro chiwo, nyaka ukel kama Ruoth Nyasaye biro yiero.

²⁷ Misengni miwang’o pep, moriwo ring’o gi remo nyaka chiw e kendo-mar-misango mar Ruoth Nyasaye ma Nyasachu. To remb misengni mau mag sawo, nyaka ol e kendo-mar-misango mar Ruoth Nyasaye ma Nyasachu, mak mana ring’o ema unyalo chamo.

²⁸ Rituru chike duto ma amiyougi adimba, mondo un gi nyikwau une maber mochwere, kutimo gik mabeyo kendo makare e nyim Ruoth Nyasaye ma Nyasachu.

Osiem jo-Israel ni kik lam kido mag nyiseche manono

²⁹ “Ka Ruoth Nyasaye ma Nyasachu osetieko ogendini ma udonjo e pinygi, mi ukawo kargi, kendo udak e pinyno,

³⁰ to beduru kutang’ mondo kik uluw timbegi, nono to gilokorenu obadho. Ka osetiekgi, mi giweyonu thuolo kamano, to kik upenjru ni, ‘Ere yo mane ogendinigi lamoe nyisechegi? Mondo wan bende watim mana machal kamano kamano.’

³¹ Kik ulam Ruoth Nyasaye ma Nyasachu kaka gilamo nyisechegi, nikech Ruoth Nyasaye mon gi timbe makuero ma gilamogo nyisechegi, nimar gise kata mana wang’o ni nyisechegigo yawuotgi gi nyigi ka misango.

³² “Neuru ni urito gik moko duto machikou. Kik umedie gimoro, kata kik ugolie gimoro.