Rapar mar Chik 1 - MUMA MALER 2015

Musa oparo ni jo-Israel singruok mane Nyasaye otimonigi Horeb

¹ Magi e weche mane Musa owacho ni jo-Israel duto kane gin e thim manie holo, yo wuokchieng’ mar aora Jordan. Kuno nomanyore gi Suf, ka Paran nie bathe konchiel, to Tofel gi Laban gi Hazeroth kod Dizahab e bathe komachielo.

² (En wuodh ndalo apar gachiel kia Horeb nyaka Kadesh-barnea, kiluwo yo mokadho e piny gode mag Seir.)

³ Chieng’ mokwongo mar due mar apar gachiel, e higa mar piero ang’wen bang’ wuok Misri, Musa nonyiso jo-Israel weche duto mane Ruoth Nyasaye osechike mondo owachnigi.

⁴ Mano notimore kane oseloyo Sihon ruodh Amor, mane odak Heshbon, kod Og ruodh Bashan, mane odak Ashtaroth gi Edrei.

⁵ E piny Moab loka Jordan kuno, ema Musa nong’adoe bura e chunye, ni mondo onyis ji tiend chikni. Nowacho niya,

⁶ “Ruoth Nyasaye ma Nyasachwa nowuoyo kodwa Horeb, mowachonwa kama: ‘Usebet e godni moromo,

⁷ omiyo koro chakuru wuoth, mondo udhi e piny gode mag jo-Amor, kendo uked gi joma odak machiegni kodgi e holo mar aora Jordan, gi piny gode kod piny pewe gi piny man yo milambo, kod dhonam, ma tiende ni piny Kanaan kod piny Lebanon duto nyaka aora maduong’ mar Yufrate.

⁸ Aseikonu pinyno, omiyo dhiuru mondo ukawe. En e piny mane Ruoth Nyasaye osingore ni nomi kwereu ma Ibrahim gi Isaka gi Jakobo kod nyikwagi.’

Oyier jong’ad bura

⁹ “E kinde nogo nawachonu niya, ‘Ting’uru pek ma ok anyal ting’o kenda,

¹⁰ nikech Ruoth Nyasaye ma Nyasachu osemiyo unya ahinya, ma koro ung’eny mana ka sulue mae polo.

¹¹ Ruoth Nyasaye ma Nyasach kwereu onego mi umed nya nyadi gana gi gana moloyo kaka uromoni, kendo oguedhu kaka nosingore.

¹² To tich bedo jatendu kod ng’ado buchu osedoko mapek mohewa.

¹³ Kuom mano, yieruru ji man gi rieko kendo molony mondo oketgi jotend dhoutu.’

¹⁴ Ne udwoka ni uyie gi gima nawachonu.

¹⁵ Omiyo nakawo ji man gi rieko kendo molony, maketo mondo oritu. Moko kuomgi naketo jotend ji gana, to moko jotend ji mia mia, to moko jotend ji piero abich abich, kod ji apar apar, kendo moko bende naketo jotelo mopogore opogore e dhoutu duto.

¹⁶ E kinde nogo nachiko jong’ad bura mau niya: ‘Un ema onego uyal buche mag joweteu, kendo nyaka ung’ad bura kare e kind ng’ato gi wadgi, kata bed ni ng’atno en ja-Israel wadu, kata en jadak.

¹⁷ Nyaka ubed joratiro kung’ado bura, kendo nyaka uwinj wach ng’at modhier mana kaka uwinjo wach jamoko. Kik uluor wang’ ng’ato, nikech ng’ado bura en mar Nyasaye. Kapo ni uneno ka bura moro tek ahinya, ma ok unyal ng’ado, to kelnagouru mondo ayale.’

¹⁸ Chieng’ onogo bende nachikou kuom gik moko duto monego utim.

Oor jombetre koa Kadesh-barnea odhi ocheng piny Kanaan

¹⁹ “Bang’e ne wawuok Horeb kaka Ruoth Nyasaye nochikowa, mi ne wawuotho e thim maduong’ kendo malich kaka ne uneno cha, kwadhi e piny gode mag jo-Amor, mi wachopo Kadesh-barnea.

²⁰ Eka nawachonu ni, ‘Koro wasechopo e piny gode mag jo-Amor, ma Ruoth Nyasaye ma Nyasachwa miyowa.

²¹ Ruoth Nyasaye ma Nyasachu oseikonu piny ma uneno e nyimuno, omiyo dhiuru mondo ukawe kaka Ruoth Nyasaye ma Nyasach kwereu nosingorenu. Kik chunyu nyosre, kata kik ubed maluor.’

²² To kane uwinjo kamano, nubiro ira uduto, muwachona niya, ‘We mondo waor jomoko mondi nyimwa, odhi ochengnwa pinyno, eka gidwoknwa wach, ka ginyisowa yo ma onego waluw, kod mier man kuno.’

²³ Ne ayie gi wachuno, mi ayiero jou apar gariyo ka ng’ato achiel achiel ochung’ ni dhoot ka dhoot.

²⁴ Ne giwuok, mi giwuotho e piny gode nyaka holo mar Eshkol, mi gichengo gweng’no.

²⁵ Ne gikawo gik monyak e pinyno, mi gikelonwa, ka ginyisowa ni piny ma Ruoth Nyasaye ma Nyasachwa dwaro miyowano en piny maber ahinya.

²⁶ “To kata kamano nudagi dhi kuno, kendo nutamoru winjo chik Ruoth Nyasaye ma Nyasachu.

²⁷ Ne ung’ur e hembeu, kuwacho niya, ‘Ruoth Nyasaye ok oherowa, emomiyo osegolowa Misri mondo oketwa e lwet jo-Amor, otiekwa.

²⁸ Ang’o ma wabiro yudo kuno ka wadhi? To jowetewa mane waoro osenego chunywa, ka wachonwa ni ji man kuno rabede kendo boyo mohewowa! Bende ginyisowa ni mier man kuno dongo, kendo nigi ohinga maboyo mochopo e polo. To kendo nyikwa Anakim bende gineno kuno!’

²⁹ “To nanyisou ni, ‘Chunyu kik nyosre, kendo kik uluor jogo.

³⁰ Ruoth Nyasaye ma Nyasachu e jatendu, kendo en ema obiro kedonu, mana kaka nokedonu e Misri cha.’

³¹ To bende kane un e thim nuneno kaka ne Ruoth Nyasaye ma Nyasachu oting’ou e wuodhu duto nyaka nuchopo kaeri, mana ka ng’ama ting’o nyathine.

³² To kata obedo kamano, pod nutamoru atama geno kuom Ruoth Nyasaye ma Nyasachu,

³³ mane telo nyimu mondo ong’inu kuonde mane unyalo bworoe. Gotieno notelo nyimu kobet ei mach, mondo onyisu kuma onego uluw, to godiechieng’ notelonu kobet e bor polo.

Nyasaye okumo jo-Israel

³⁴ “Kane Ruoth Nyasaye owinjo wecheugo, mirima nomake, mokuong’ore niya,

³⁵ ‘Onge kata ng’at achiel kuom tieng’ marachni ma none piny maber mane asingora ni nami kweregi,

³⁶ mak mana Kaleb wuod Jefune. En ema none pinyno, kendo anamiye kaachiel gi nyikwaye piny ma osenyonono, nikech osebedo ka oluwa gi chunye duto.’

³⁷ Gima nutimono nomiyo Ruoth Nyasaye okecho koda an bende, mowachona niya, ‘Kata in bende ok inidonji e pinyno,

³⁸ to Joshua wuod Nun matiyoni ema nodonj kuno. Kuom mano, jiwe mondo obed motegno, nimar en ema nomi jo-Israel okaw pinyno.

³⁹ Nyithindu ma pod tindo mane uparo ni nobed joma nomak e lweny, kendo mapok ong’eyo pogo ber gi rach ema nodonj e pinyno. Gin ema namigi pinyno, kendo ginidagie.

⁴⁰ Omiyo chakuru wuoth mondo udog e thim kuchomo Nam Makwar.’

Olo jo-Israel Horma

⁴¹ “Eka nudwoka niya, ‘Waseketho e nyim Ruoth Nyasaye, omiyo koro wabiro dhi mondo wamonj pinyno kaka Ruoth Nyasaye ma Nyasachwa ochikowa.’ Omiyo ng’ato ka ng’ato kuomu nokawo gi lwenje, kuparo ni en gima yot monjo piny godeno.

⁴² To Ruoth Nyasaye nowachona niya, ‘Kwergi kik gidhi gikedi, nimar an ok nabed kodgi, omiyo wasikgi biro loyogi.’

⁴³ Nanyisou kamano, to ne ok udewo. Nudagi winjo wach Ruoth Nyasaye, mudhi umonjo piny gode mana gi wiu matek.

⁴⁴ Jo-Amor modak e piny gode nowuok kedo kodu, mi ginur kuomu mana ka kich, kendo ne gikeyou e gweng’ Seir, mi giriembou nyaka Horma.

⁴⁵ Bang’ mano nuduogo, muywak e nyim Ruoth Nyasaye, to ne ok onyal winjo ywaku, kendo ne ok onyal dewou.

⁴⁶ Mano ema omiyo nudak Kadesh-barnea kuom ndalo mang’eny.