Kwan 6 - MUMA MALER 2015

Chik moket ni ng’at mowal ni Ruoth Nyasaye ka ja-Nazir

¹ Ruoth Nyasaye nowacho ni Musa

² ni mondo onyis jo-Israel niya, “Ng’ato ang’ata ma okuong’ore ni obiro bedo ja-Nazir, tiende ni ng’at mowal ni Ruoth Nyasaye,

³ ok nomadh kong’o kata gimoro mamero ji, bed ni en dichwo kata dhako. Ok nomadh gik ma kamago, kata gimoro amora molos gi mzabibu, to bende ok nocham mzabibu manumu kata motwo.

⁴ E kinde duto ma okuong’ore ni obiro bedo ja-Nazirno, ok nomul gimoro amora moa kuom yadh mzabibu kata matin.

⁵ “E kindeno duto bende mirich ok noka wiye, to nowe yie wiye dongi, kendo nokadgi akada, nyaka ndalo mag kuong’ruok norum. Enoritre maler ni Ruoth Nyasaye.

⁶ Ok nosud machiegni gi ng’at motho,

⁷ ma dimi obed mogak, bed ni en wuon kata min kata owadgi kata nyamin. Yie wiye maboyogo ema nyiso ni osewale ni Ruoth Nyasaye.

⁸ Enoritre maler ni Ruoth Nyasaye ndalo duto mag kuong’ruokne.

⁹ “Ka ng’ato otho bute apoya, mogere kuome, mi omiyo yie wiye ogak, to nyaka oliel wiye bang’ ndalo abiriyo, chieng’ moket ni ipwodhee.

¹⁰ To chieng’ mar aboro nyaka okel ni jadolo akuch odugla ariyo kata nyithi akuru ariyo e dho Hema Miromoe gi Nyasaye.

¹¹ Jadolo nokaw akuru achiel, mi notimgo misango mar golo richo to machielo notimgo misango miwang’o pep, mi nopwodh ng’atno kuom gak mane oyudo kuom ng’at motho. Eka ja-Nazir nochak opidh wiye chieng’no, kowalore manyien ni Ruoth Nyasaye.

¹² Kuom ndalo duto mane okuong’oree, kendo nokel nyaim ma hike achiel mondo otimgo misango mipwodhogo ketho mar gowi. To kinde mane oyudo osetieko e walruokneno ok nokwan, nikech yie wiye mane nyiso ni owale ne odoko mogak.

¹³ “Chik momako ja-Nazir chieng’ ma kindene mar walruok orumo e ma: Nyaka tere e dho Hemb Romo,

¹⁴ kendo nochiw ni Ruoth Nyasaye nyaim ma hike achiel maonge songa mondo otimgo misango miwang’o pep, gi rombo swini maonge songa mondo otimgo misango mar sawo,

¹⁵ gi odheru moting’o makati ma ok ketie thowi, moted gi mo, kod chapati ma bende ok ketie thowi, mowir gi mo kaachiel gi misengni mag cham kod misengni miolo piny, kaka chik dwaro.

¹⁶ Jadolo nochiw gigo duto e nyim Ruoth Nyasaye, eka notim ni ng’atno misango mar golo richo kod misango miwang’o pep.

¹⁷ Im cha to notimgo ni Ruoth Nyasaye misango mar sawo, kaachiel gi makati manie odheru. Bende nochiw misango mar cham gi misango miolo piny.

¹⁸ Ja-Nazirno noliel wiye e dho Hemb Romo, kendo nokaw yie wiye ma yande owalno, mi owang’ie mach mitimogo misango mar sawo.

¹⁹ Bang’ mano jadolo nokaw bad im kosetedi, kaachiel gi makati ma ok ketie thowi mogol e odheru, kod chapat achiel ma ok ketie thowi, mi noketgi e lwet ja-Nazirno, koselielo yie wiye mane owalegono.

²⁰ Eka jadolo nochiwgi ni Ruoth Nyasaye ka mich moyiedhi. Lemogo kaachiel gi agoko kod em michiwo ni Ruoth Nyasaye ka mich moyiedhi, gin gik maler, omiyo gidong’ ni jadolo. Bang’ timo mago duto, ja-Nazirno koro nobed gi thuolo mar madho divai.

²¹ “Mano e chik momako ja-Nazir ma osekwong’ore, kendo mano e misango ma nyaka otim ni Ruoth Nyasaye kuom walruokne, ka ok okwan gik mamoko ma onyalo chiwo. Nyaka ochop kuong’ruokne duto, kaluwore gi chik mar walruokne.”

Weche mag gueth ma jadolo onego guedhgo ji

²² Ruoth Nyasaye nowacho ni Musa ni mondo onyis Harun niya,

²³ “Ka iguedho jo-Israel, to magi e weche ma nyaka ikonyrigo:

²⁴ ‘Ruoth Nyasaye mondo oguedhu kendo oritu,

²⁵ Ruoth Nyasaye mondo orienynu kendo ong’wonnu,

²⁶ Ruoth Nyasaye mondo orangu maber, kendo okelnu kue.’

²⁷ Kamano e kaka ginihul nyinga ni jo-Israel kendo anaguedhgi.”