Ezra 5 - MUMA MALER 2015

Hekalu oger kendo

¹ Bang’e janabi Hagai, gi janabi Zekaria ma nyakwar Iddo, ne jokoro wach e nying Nyasach Israel, ka jiwo jo-Yahudi gi jo-Juda man Jerusalem.

² Kane Zerubabel gi Shealtiel kod Jeshua wuod Jozadak owinjo wechegigo, ne gichako gero Od Nyasaye Jerusalem, kendo jonabi mag Nyasayego ne ni kodgi, ka konyogi.

³ Tatenai ma ruodh piny man loka Yufrate, gi Shethar-bozenai kod jowetegi nobiro irgi piyopiyo, mowachonigi niya, “En ng’a mane omiyou thuolo mar gero odni, kendo tieko loso gik manie iye?”

⁴ Bende ne gipenjogi nying joma tiyo tijno.

⁵ Eka jogo nooro wach ni ruoth Darius, kanyise gima timore. To Nyasaye ne ni kod jodong jo-Yahudi, omiyo ne ok ochung-gi mondo giwe tich ka pod irito dwoko moa kuom ruoth.

⁶ Koro ma e barua mane Tatenai ruodh piny man loka Yufrate, gi Shethar-bozenai kod jowetegi ma jotend pinyno ondiko ni ruoth Darius:

⁷ “Kuom ruoth Darius, wamosi ahinya.

⁸ Ruoth mondo ing’e ni ne wadhi e piny Juda, mi wayudo ka jodong jo-Yahudi gero Od Nyasaye maduong’ gi kite madongo kod yien moketi e kor ot. Tich tiyore adimba, kendo odhi nyime maber e lwetgi.

⁹ Ne wapenjo jodongogo ng’ama nomiyogi thuolo mondo giger Hekaluni, kendo gilos gik iye duto.

¹⁰ Bende ne wapenjogi nyinggi mondo ing’e nying jotendgi kod kar rombgi.

¹¹ To ne gidwokowa niya, ‘Wan jotich Nyasach polo gi piny, kendo wagero ot mane oyudo oseger chon, higni mang’eny mokadho. Ruodh Israel maduong’ ema nogere, motieke.

¹² To kata kamano, kwerewa mowang’o i Nyasach polo, mi Nyasaye nochiwogi e lwet Nebukadnezar ja-Kaldea, ruodh Babulon mane omuko odno, kendo otero jowa Babulon e tuech.

¹³ To Kuros ruodh Babulon nogolo chik e higa mokwongo mar lochne, ni mondo ochak oger Hekalu mar Nyasayeni.

¹⁴ To bende ne nitie gik lemo moko molos gi dhahabu kod fedha e Od Nyasaye mane ni Jerusalem. Nebukadnezar nogolo gigo, motero Babulon, kendo oketogi e Hekalu man kuno. Ruoth Kuros nogolo gigo e Hekaluno, moketogi e lwet ng’at moro ma nyinge Sheshbazar, mane oseketo ruodh pinyni, kowachone niya,

¹⁵ “Kaw gigi, idhigo, mondo iket e Hekalu Jerusalem, kendo ine ni oger Hekalu mar Nyasaye kanyo kare machon.”

¹⁶ Omiyo Sheshbazar nogo nobiro Jerusalem moketo mise mar Od Nyasaye. Chakre chieng’no nyaka chil kawuono gedo osebedo kadhi nyime, to pok orumo.’

¹⁷ Emomiyo, koro ruoth, kineno ni ber, to yie mondo onon ane ka en adier ni ruoth Kuros nogolo chik mondo oger Hekalu mar Nyasaye Jerusalem. Ruoth bang’e yie iornwa paroni kuom wachni.”