2 Ruodhi 23 - MUMA MALER 2015

Josia oloso piny Juda

¹ Kane jootego odwoko ni ruoth wach, noluongo jodongo duto mag Juda gi mag Jerusalem.

² Nodhi e Od Ruoth Nyasaye gi jo-Juda kod jo-Jerusalem duto; joma omew gi jochan machalre, kaachiel gi jodolo kod jonabi, mi nosomonigi weche duto mane nie kitap singruok mane nie Od Ruoth Nyasaye.

³ Eka nodhi e bath siro, mochung’ e nyim Ruoth Nyasaye kosingore ni enoluw Ruoth Nyasaye gi chunye duto kod tekone duto, komako chikene gi wechene kod buchene, kamano mondo orit weche mag singruok mondiki e kitabuno. Mi ji duto bende notimo singruokno.

⁴ Eka ruoth nochiko Hilkia jadolo maduong’, gi jadolo maluwe, kod jorit dhoot, ni mondo gik moko duto milamogo Baal gi siro miluongo ni Ashera kod sulue, ogol e Od Ruoth Nyasaye. Nowang’ogi e bath Jerusalem e paw aora Kidron, mi notero buchgi nyaka Bethel.

⁵ Nogolo jodolo mag nyiseche manono mane ruodhi mag Juda oketo mondo owang’ ubani e hembko mag miech Juda, kod mag gwenge mokiewo kod Jerusalem, kendo nogolo joma ne wang’o ubani ni Baal gi wang’chieng’ gi due kod sulue duto.

⁶ Nogolo siro milamo miluongo ni Ashera e Od Ruoth Nyasaye, motero e dho aora Kidron e bath Jerusalem. Nowang’e kanyo but aora, motoye matindotindo nyaka olokore buru. Eka nokawo buche, mopuko e liete ji ajiya.

⁷ Nomuko ut jochode mane nie Od Ruoth Nyasaye, mane ji terorego, kaka kit lemogi nobet. Udigo ema ne mon twang’oe pasia mag Ashera.

⁸ Bang’e Josia noluongo jodolo mane nie miech Juda, kendo noketho hembko mane jodologo wang’oe ubani, chakre Geba nyaka Beer-sheba. (Bende nomuko hembko mar jochiende mane oger e dhoranga Joshua jaduong’ Jerusalem, bat koracham kidonjo e dala.)

⁹ Kata obedo ni noluongo jodolo mag hembko mane ni kuonde moting’ore kamano, to ne otamogi ni kik gitim misango e kendo-mar-misango mar Ruoth Nyasaye man Jerusalem, to noyienigi mana chamo makati ma ok ketie thowi kaachiel gi jodolo wetegi.

¹⁰ Ruoth Josia noketho Tofeth manie holo mar Ben-hinom ni kik ji wang’ie nyithindgi ka misango ni Molek.

¹¹ Nogolo kido mag farese mane ruodhi mag Juda oseketo ni wang’chieng’.

¹² Nomuko kende-mag-misango mane nie wi gorofa mar od Ahaz, mane ruodhi mag Juda oloso e laru ariyo mag od Ruoth Nyasaye. Notoyogi matindotindo, mopuko ng’injogi e aora Kidron.

¹³ Ruoth noketho bende kuonde hembko mane ni yo milambo mar got Zeituni, man yo wuok chieng’ mar Jerusalem, mane Solomon ruodh Israel ogero ni Ashteroth, nyasaye ma kuero mar jo-Sidon, gi Kemosh, nyasach jo-Moab, kod Milkom, nyasach jo-Amon.

¹⁴ Noturo sirni mag kite gi mag yien mane ji lamo, motoyogi matindotindo, mi kuonde mane gichungie nodino gi choke ji.

¹⁵ Josia nomuko kendo-mar-misango man Bethel, kaachiel gi hembkone mane Jeroboam wuod Nebat oloso. Notoyo kitene, molokore buru, kendo nowang’o siro milamo mane ni kanyo. (Jeroboam nogo ema nomiyo jo-Israel obedo joricho.)

¹⁶ Kane Josia owichore, noneno liete ewi got. Nooro ji, mogolo choke e lietego, mi ne giwang’ogi e kendo-mar-misango. Kamano noketho kendono, kaluwore gi wach Ruoth Nyasaye mane ng’at Nyasaye okoro kane Jeroboam ochung’ e dho kendo chieng’ sawo cha. Eka Josia noting’o wang’e, moneno liend ng’at Nyasaye mane okoro wechego.

¹⁷ Nopenjo niya, “Mano liend ng’a, ma aneno loka cha?” Jodalanoo nodwoke niya, “En liend ng’at Nyasaye mane oa Juda, mokoro gik moko duto misetimo kuom kendo-mar-misangoni.”

¹⁸ Eka Josia nowacho niya, “Weyeuru! Ng’ato kik gol chokene.” Omiyo ne giweyo chokene kaachiel gi choke janabi mane oa Samaria.

¹⁹ Bende Josia noketho od lemo mane nie hembko man kuonde moting’ore, mane ruodhi mag Israel ogero e miech Samaria, kamiyogo Ruoth Nyasaye mirima.

²⁰ Jodolo duto mane Josia onwang’o e hembko nonego e kende-mag-misango. Eka nodok Jerusalem.

Jo-Israel orito Sap Pasaka

²¹ Ruoth nochiko ji duto ni mondo otim Pasaka ni Ruoth Nyasaye ma Nyasachgi, kaka ondiki e Kitap Singruok.

²² Adier, Pasaka ma kamano ne pok otim, e ndalo mane jobura ritoe Israel, kata e ndalo mag ruodhi mag Israel gi Juda.

²³ To e higa mar apar gaboro mar loch Josia kende ema ne otimie Pasaka makama ni Ruoth Nyasaye, Jerusalem.

Mirimb Nyasaye osiko kuom jo-Juda

²⁴ Bende Josia nogolo jonyakalondo, gi ajuoke, gi kido mag nyiseche manono miluongo ni Terafim, gi nyiseche mamoko molos gi lwet dhano, kaachiel gitimbe makuero duto mane onwang’ e piny Juda, kendo e Jerusalem. Kamano noluwo weche mag chik mane ondik e kitabu mane Hilkia jadolo oyudo e Od Ruoth Nyasaye.

²⁵ Onge ruoth moro kata achiel mane oluwo Ruoth Nyasaye gi chunye duto, kod tekone duto, komako chike duto mag Musa, kaka Josia notimo.

²⁶ Kata kamano chuny Ruoth Nyasaye ne ok olendo kuom mirima mager mane okechogo gi jo-Juda nikech timbe maricho mane Manase ochwanyego.

²⁷ To nowacho niya, “Abiro riembo jo-Juda bende mondo oa e nyima, kaka ne ariembo jo-Israel. Abiro jwang’o Jerusalem, dala mane ayiero, kendo abiro wito Hekalu mane awacho ni nyinga nobedie.”

Tho mar Josia

²⁸ Weche moko mag Josia, kod timbene duto, ondiki e Kitap Weche mag Ndalo mag Ruodhi mag Juda.

²⁹ E ndalo Josia ema ne Farao-neko, ruodh Misri, odhi kedoe gi ruodh Asuria e dho aora Yufrate. Ruoth Josia nodhi Megido kedo kode, to kane girado, Farao nonege.

³⁰ Joge nogolo ringre Megido, koting’e e gari. Ne gikele Jerusalem, mi giyike e liende owuon. Eka ji duto nokawo Jehoahaz wuod Josia, moketo ruoth kar wuon mare.

Loch Jehoahaz, ruodh Juda

³¹ Jehoahaz ne jahigni piero ariyo gadek kane odoko ruoth, morito piny kuom dueche adek, kodak Jerusalem. Min mare ne nyinge Hamutal nyar Jeremia ma ja-Libna.

³² Timbe Jehoahaz ne richo e nyim Ruoth Nyasaye, mana kaka timbe kwerene.

³³ Farao-neko notere Ribla e piny Hamath, motueye kuno, mondo kik obed ruodh Jerusalem, kendo noketo ni jo-Juda osuru moromo kilo alufu adek mag fedha, gi kilo mia adek mag dhahabu.

³⁴ Eka Farao-neko noketo Eliakim wuod Josia mondo obed ruoth kar Josia wuon mare, kendo noloko nyinge ni Jehoyakim. Jehoahaz to notero Misri, kuma nothoe.

³⁵ Jehoyakim noketo ni jo-Juda osuru ma dirom pesa mane Farao dwaro. Ng’ato ka ng’ato nogolo dhahabu gi fedha kaka mwandune obet. Kamano Jehoyakim nochulo fedha gi dhahabu mane Farao oketone.

Loch Jehoyakim, ruodh Juda

³⁶ Jehoyakim ne jahigni piero ariyo gabich kane odoko ruoth, morito piny kuom higni apar gachiel, kodak Jerusalem. Min mare ne nyinge Zebida nyar Pedaya ma ja-Ruma.

³⁷ Timbe Jehoyakim ne richo e nyim Ruoth Nyasaye, mana kaka timbe kwerene.