2 Jo-Makabayo 15 - MUMA MALER 2015

Nikanor oyanyo Nyasaye

¹ Chieng moro Nikanor nowinjo ni Judas gi joge ne chiegni gi Samaria, omiyo noikore mondo omonjgi chieng’ Odira, kong’eyo ni ok noyud hinyruok chieng’no.

² Jo-Yahudi mane ochun mondo oluwe nowachone niya, “Kik ineggi e yo marach ma ok owinjore negie dhano, to luor chieng’ ma Nyasaye maneno gik moko duto osewalo ni en owuon.”

³ To ng’at ma achachno nopenjo ka nitie ruoth moro e polo mochiko mondo oluor chieng’ Sabato adier.

⁴ Ne gidwoke niya, “Ee, nitie! Ruoth Nyasaye ma ngima owuon, ma en Ruodh Polo, ema osechiko mondo oluor chieng’ mar abiriyo.”

⁵ Nodwoko niya, “To an e ruodh piny, kendo achikou mondo ukaw gilwenju utiek tich ma ruoth omiyou.” To kata kamano ne otame timo kaka ne odwaro.

Judas ojiwo joge kendo oleko lek

⁶ Nikanor ne jasunga miwuoro, omiyo nochano mondo okaw gik mane oyak kuom Judas Makabayo gi joge, ogergo rapar mar lochne.

⁷ Makabayo to nosiko kogeno chuth ni Ruoth Nyasaye biro konye.

⁸ Kuom mano nochiko jolwenje ni kik gibed maluor nikech monj mane joma ok jo-Yahudi monjogigo, to mondo gipar kony ma Nyasach Polo yande osekonyogigo, kendo mondo gigen ni kawuononi bende Nyasaye Manyalo Gik Moko Duto biro konyogi mondo gilo wasikgi.

⁹ Nojiwo chunygi mane oyudo onyosore, kosomonigi Chik Musa gi mag jonabi, kendo noparonigi lwenje kedo.

¹⁰ Kane osejiwogi kamano, notieko wuoyo konyisogi andhoga ma joma ok jo-Yahudi timo, kendo kaka githoro ketho kuong’ruokgi.

¹¹ Kamano e kaka noikogi ni lweny, ka ok ogeno kuom okumba gi tong’, to nomiyogi chir ma weche mabeyo kelo. Eka nomedo jiwogi kohulonigi lek mane oleko, kendo mane ogeno ni chalo gi fweny.

¹² Nonyisogi ni noleko ni oneno Onias, ma yande jadolo maduong’, korieyo bedene malo kakwayo ni oganda jo-Yahudi duto. Onias ne en ng’at maber ahinya, mobolore kendo mamuol, mane ong’eyo wuoyo maber, kendo mane otiegore kuom timbe mabeyo chakre tinne.

¹³ Bang’ mano noneno ka ng’at machielo othinyore. Ne en ng’at man gi higni mang’eny kod duong’ miwuoro, kendo mane nenore ni en ng’ama onego mi luor.

¹⁴ Onias nochako wuoyo kowacho niya, “Ma e Jeremia, janabi mar Nyasaye, mohero owetene kendo ma lemo ni ogandawa kod dala maler.”

¹⁵ Bang’e Jeremia norieyo lwete komiyo Judas ligangla mar dhahabu, kowacho niya,

¹⁶ “Kaw ligangla maler ni ma en mich moa kuom Nyasaye mondo ikedgo kendo ilogo wasigu.”

Paro mag jolweny

¹⁷ Weche mabeyo mag Judas nojiwo ji duto, komiyo kata mana rawera bedo gi chir mana ka ng’ama duong’, kuom mano, ne gidagi bet e kambi to ne giyie mondo gimonj wasikgi gi chir mondo gitiek wach chuth, nikech ne gineno ni wasigu chiegni ketho Jerusalem kaachiel gi dini margi maler kod Hekalu bende.

¹⁸ Ne ok gidhi kedo kamano nikech ne giparo mondgi gi nyithindgi gi ominegi kod jowetegi, to gima duong’ kendo mokwongo mane giparo ne en mana Hekalu maler.

¹⁹ Joma ne odong’ Jerusalem bende ne mana nigi paro achiel nogo, nikech kane gineno ni wasikgi noikore mondo oked e piny pap, luoro nomakogi.

²⁰ Kuom mano, ji duto ne orito gima biro timore. Wasigu ne osechokore koriedo ni lweny, kendo liech noket karegi, to joidh farese ne ni tung’ koni gi koni.

²¹ Kane Makabayo oneno jolweny mathoth gi gik lweny mang’eny, kendo kane oneno kaka liech ger norieyo bedene malo koywak ni Ruoth Nyasaye ma jatim honni, kong’eyo ni lweny ok lo gi teko mar ligangla, to iloye mana kaka Nyasaye oneno ni ber, kendo en ema ochiwo loch ni joma owinjorego.

²² Nolemo niya, “A Ruoth, e ndalo Hezekia ruodh Judea nioro malaikani mi nonego jolwenj Senakarib moloyo alufu mia achiel gi piero abich gaboro.

²³ Kamano Ruodh Polo, koroni bende yie ior malaikani maber nyimwa mondo omi wasigu luoro gi rundruok.

²⁴ Teko mar badi mondo ogo jogo piny, nikech gibiro ka giyanyi kendo ka gidwaro monjo joma owalni,” Mano e kaka notieko kwayo Nyasaye.

Nikanor olo motho

²⁵ Nikanor gi jolwenje ne biro ka gigoyo tung’ kendo ka gigueyo siguech lweny,

²⁶ to joka Judas norado kodgi ka giywak ni Nyasaye kendo ka gilemo.

²⁷ Ne ginego ji madilo alufu piero adek gabich, ka gikedo gi lwetgi kendo ka giywak ni Nyasaye gi chunygi. Ne gitimo chir ahinya, nimar Nyasaye nokonyogi ratiro.

²⁸ To kane oyudo gidok bang’ loyo lweny, ne gineno Nikanor koriere piny gi gige mag lweny duto.

²⁹ Kane ji duto kok kendo rundore koni gi koni, jo-Yahudi to ne miyo Nyasaye duong’ ka giwuoyo gi dho kweregi.

³⁰ Makabayo mane ochiwo ngimane duto mondo oti ni jopinygi, kendo mane osiko kohero jo-ogandagi mana kaka noherogi kane pod otin, nochiko mondo ong’ad wi Nikanor kaachiel gi lwete kod bade, mondo oter Jerusalem.

³¹ Kane Judas ochopo kuno en owuon, noluongo jopinygi gi jodolo. Eka nochung’ e nyim kendo-mar-misango, moluongo joma ne ni kama oger motegno mar siro lweny bende.

³² Nonyisogi wi Nikanor, ma ng’at mam achach chande, kod lwete mane osiemogo Helaku mowal ni Nyasaye Manyalo Gik Moko Duto kosungore kendo koyanyo Nyasaye.

³³ Bang’e nong’adi lew Nikanor, ma ok oluoro Nyasayeno oko, kochiko mondo ong’ade matindotindo, obole ni winy. To nochiko mondo olier bade e nyim Hekalu kaka ranyisi ni osekume kuom fupe.

³⁴ Kuom mano, ji duto nopako Ruoth Nyasaye maduong’ ka giwacho niya, “Duong’ obed ni Nyasaye mane orito ode mondo kik bed mogak.”

³⁵ Makabayo noliero wi Nikanor ewi ohinga mar kama oger motegno mar siro lweny, mondo ji duto one malong’o kaka Ruoth Nyasaye nosekonyo joge.

³⁶ Ne giguro chik mane ji duto oyiego ni chieng’no ni kik kadh nono mak otimie sawo, to mondo chieng’no ma en chieng’ due apar gariyo, miluongo gi dho Aram ni ni due Adar, obed chieng’ nyasi. Chieng’no ne en chieng’ motelo ni chieng’ Mordekai.

Weche mogik mag jandik kitabuni

³⁷ Ma e giko sigand Nikanor, kendo chakre ndalogo Jerusalem osebedo e lwet jo-Hibrania. Kuom mano, tija bende ogik ka.

³⁸ Kapo ni ondike maber kendo moluwore gi gik mane otimore, to mano e gima nadwaro timo. To kondike marach, to mano e kaka ne anyalo time.

³⁹ Kaka madho divai lilo, kata modho pi lilo, ok mit, to madho divai moruw gi pi mit, kendo miyo ng’ato winjo maber, e kaka ka jandik kitabu ochano gik mane otimore e yore mopogore opogore, to mano miyo chuny jasomo mor.