1 Samuel 21 - MUMA MALER 2015

Daudi oringo Saulo

¹ Daudi nodhi Nob ir Ahimelek jadolo. Ahimelek nodhi romone ka kirni, mopenje niya, “Ibiro kendi nang’o, ma onge ng’at ma un go?”

² Daudi nodwoke niya, “Ruoth oora e ote moro, kosiema ni kik ng’ato ng’e wach moro kuom oteni. To bende asechiko joga ma jolweny mondo orom koda kamoro.

³ Koro ere gima in go ka? Yie imiya makati abich, kata gimoro amora mantie.”

⁴ Ahimelek nodwoke niya, “Makati onge ka, to mak mana mago mowal ni tich Ruoth Nyasaye kende, ma jogi nyalo chamo ka giseritore kuom mon.”

⁵ Daudi nodwoko jadolo ni, “Adier, waseritore kuom mon, kaka watimo pile kwadhi kedo. E wuodhe duto mwadhiye jolweny ritore maler, to kawuono ok digibed maler moloyo?”

⁶ Kuom mano jadolo nomiye makati mowal ni tich Ruoth Nyasaye, nikech makati moro amora ne onge kanyo, mak mana makati moket e nyim Ruoth Nyasaye, migolo oko chieng’ miketo makati maliet kargi.

⁷ To ng’at moro ma jatich Saulo ne ni kanyo chieng’no, kogeng’e e nyim Ruoth Nyasaye mondo opwodhe. Nyinge ne Doeg ja-Edom, mane ng’at maratego moloyo kuom jokwadh Saulo duto.

⁸ Daudi nopenjo Ahimelek niya, “Donge inie gi tong’ kata ligangla moro ka, nimar ok nabiro gi ligangla kata gi gir lweny moro, nikech wach ruoth nobet arika.”

⁹ Jadolo nodwoke niya, “Nitie ligangla mar Goliath ja-Filistia, jal mane inego e holo mar Ela cha. Ero okane e tok law dolo miluongo ni efod, koboye gi nanga. Kidware to kawe, nikech onge moro ka, mak mana en.” Daudi nowacho niya, “Miyago, nikech onge moro maloye gi ber.”

¹⁰ Chieng’no Daudi nowuok moringo, kodhi ir Akish ruodh Gath, nikech noluoro Saulo.

¹¹ To jotich Akish nowacho ni Akish niya, “Donge jali e Daudi ma ruodh pinygi? Ok en ema ne gimiel ka giwere nihya, ‘Saulo onego ji gana, to Daudi onego ji gana gi gana’?”

¹² Kane Daudi owinjo wachno, noluoro Akish ruodh Gath ahinya.

¹³ Omiyo noloko kite e nyimgi, kowuondore ni ojaneko. Nogwaro yiend dhorangach, kendo noweyo olape ka mol e yie tike.

¹⁴ Eka Akish nowacho ni joge niya, “Neuru! Neko omako ng’atni. Marang’o ukele ira?

¹⁵ Donge an gi joneko moroma? Ang’o momiyo ukelo ng’atni mondo otim timbe neko e nyima? Udwaro ni jali obi odag e oda koso?”