Zaaretsuwaa 15 - ጌሻ ማጻፋ

አጩ ማረትያ ላይ

¹ “ላፑን ላይ ላይ ዉርሰን ህንተፐ ታልኤዳዋንቶ ኡንቱንቱ አጩዋ ማርተ።

² ህንተ አጩዋ ማራና ዎጋይ ሀዋ: ባረ ላገ እስራኤልያዉ ታልኤዳ አይ አሳይነ ሄ አጩዋ ማሮ። መና ጎዳ ማሮተይ አዋየቴዳ ድራዉ፥ ታልኤዳዌ ባረ ላገ እስራኤላዉ ዎይ ባረ እሻዉ ታልኤዳባ ኦቾፖ።

³ ሀራ ቢታ አሳዉ ህንተ ታልኤዳ አጩዋ አካናዉ ዳንዳዪታ፤ ሽን ህንተ ህንተ ዛረቶ ታልኤዳባ ኡባ ማርተ።

^4-5 “ህንተ መና ጎዳ ህንተ ጾሳ ቃላዉ አዛዘቶፐ፥ ታን ሀች ህንተና አዛዝያ አዛዞ ኡባ ባለናን ኦፐ፥ ህንተ ግዶን እት አሳይነ ህዬሰና። አያዉ ጎፐ፥ ህንተ ላታናዳን መና ጎዳይ ህንተ ጾሳይ ህንተዉ አቆ ኦደ እምያ ጋድያን መና ጎዳይ ህንተና አንጃና።

⁶ መና ጎዳይ ህንተ ጾሳይ ህንተንቶ ጌዳዋዳን፥ እ ህንተና አንጃና፤ ዳሮ ካዉተይ ህንተፐ ታልአና፤ ሽን ህንተ እቱዋፐነ ታልእክታ። ቃይ ህንተ ካዉተቱዋ ሞዳና፥ ሽን እቱነ ህንተና ሞደና።

⁷ “መና ጎዳይ ህንተ ጾሳይ ህንተንቶ እምያ ጋድያን ደእያ ቄር ካታማቱዋፐ ሀቃዋንነ ደእያ ህንተ ላገ እስራኤላቱዋ ግዶን እት አሳይ ህዬሶፐ፥ አዉ መቀ ኢቶፕተ፤ ቃይ ህንተ ኩሽያካ ሺሽ አኮፕተ።

⁸ ህንተ ኩሽያ አዉ ብርሽተ፤ አ ኮሽያዋ አያነ አዉ ታልእተ።

⁹ ‘አጩዋ ማርያ ላፑን ላይይ ማቴዳ’ ጋደ፥ ህዬሳ እስራኤልያዉ ኢታ አይፍያን ጼላደ፥ አዉ አያነ ታልእያዋ ድጋናዉ ኢታ ቆፋይ ነ ዎዛናን ገለናዳን ናገታ። ሄዌ ዮፐ፥ እ ኔፐ መና ጎዳዉ ዋሳና፤ ሄዌ ነዉ ናጋራ ግዳናዋ።

¹⁰ ኔን አዉ ጮ እማ፤ ኔን አዉ እምያ ዎደ፥ ነ ዎዛናን አያዉ እማይታ ጎፓ፤ ያቶፐ፥ ህንተ ኦሶ ኡባን፥ ህንተ ኦይቄዳዋን የዳባን ኡባን መና ጎዳይ ህንተ ጾሳይ ህንተና አንጃና።

¹¹ ሄ ጋድያን ኡባ ዎደካ ህዬስ የና ድራዉ፥ ታን ኔና እስራኤላቶ፥ ነ ጋድያን ደእያ ህዬሳቶነ መቶታንቻቶ ኬካ ግዳናዳን አዛዛይ።

አይለቱዋ ላአ ከስያ ማራ

¹² “ኔን አቱማ ግድና ማጫ ግድና፥ ነ ዳቦ እስራኤልያ አሳ አይልያ ኦደ ሻሞፐ፥ እ ነዉ ኡሱፑን ላይ ኦ፤ ላፑን ላይን አይለተፐ ከሳ የዳ።

¹³ ኔን አይለተፐ አ ከሳ የድያ ዎደ፥ መላ ኩሸ የዶፓ።

¹⁴ ኔን ነ ዉድያፐ፥ ነ ኡዱማፐነ ነ ዎይንያ ጉምኢያሳፐ አዉ ኬካተን እማ፤ መና ጎዳይ ነ ጾሳይ ኔና አንጄዳዋ ኬና አዉ እማ።

¹⁵ ህንተካ ግብጼ ጋድያን ካሰ አይልያ ግዴዳዋነ መና ጎዳይ ህንተ ጾሳይ ህንተና ያፐ ዎዜዳዋ ዶጎፕተ። ታን ህንተና ሀች አዛዝያዌ ሄዋሳ።

¹⁶ “ሽን ሄ አይልያ ኔናነ ነ ጎልያ አሳ ዶሴዳ ድራዉነ ኔናና አዉ ደኡ ሎኦ ግድያ ድራዉ፥ ‘ታን ነ ጎለፐ ከሳደ ቢከ’ ያጎፐ፥

¹⁷ ፐንገ አ አፋደ፥ ጎ አካደ፥ አ ሀይ ሉካ። ያቶፐ እ ነዉ መናዉካ አይልያ ግዳናዋ። ቃይ አይልያ ግድያ ማጫንዉካ ሄዋዳን ኦ።

¹⁸ አ ኔን አይለተፐ ከሳ የድያ ዎደ፥ ኔን ቆሄቴዳዋዳን ቆፖፓ፤ አያዉ ጎፐ፥ እ ሀ ኡሱፑን ላይ ግዶን ከራዉ ኦያባይ ኦያዎ ዳኩዋ ዳሩዋ ነዉ ኦዳ። ሄዋ ድራዉ፥ ኔን ኦያባን ኡባን መና ጎዳይ ነ ጾሳይ ኔና አንጃና።

ሚዛይነ ዶርሳይ የልያ ባይራ ማራቱዋ

¹⁹ “ኔን ነ መህያፐነ ነ ዶርሳ ዉድያፐ ባይራ የለቴዳ አቱማዋ ኡባ መና ጎዳዉ፥ ነ ጾሳዉ፥ ዱማያ። ነ ዱማዬዳ መህያፐ ባይራ የለቴዳዋ አያነ ጎኤቶፓ፤ ነ ዶርሳ ዉድያፐ ባይራ የለቴዳዋ እክስያካ ሜዶፓ።

²⁰ ኔንነ ነ ሶ አሳይ ጾሳይ ዶርያ ሳኣን መና ጎዳ ህንተ ጾሳ ስንን ሄዋንታ ላይን ላይን ሚተ።

²¹ ሽን ነ ያርሽያ መህያ ቦላይ ትላና ዮፐ፥ እ ስሌዳዋ ዎይ ቆቀ ግዶፐ፥ ዎይ ቃይ ሀራ ኢታ ፖኮባይ አ ቦላን ደኦፐ፥ ሄዋ መና ጎዳዉ፥ ነ ጾሳዉ፥ ያርሾፓ።

²² ሄዋ ህንተ ደእያ ህንተ ካታማን ሚተ፤ ዎጋን ጌሻ አሳ ግድና፥ ዎይ ቱና አሳ ግድናካ ገንእያነ ጋራ አሹዋዳን ሞ።

²³ ሽን ህንተ አ ሱ ሃዳን ሳኣን ጉስተፐ አትና፥ ሞፕተ።