ሲቁዋ ሳባ 4 - ጌሻ ማጻፋ

ዎዳላይ:

¹ ታ ሲቃቴ፥ ኔን አያ ማላንቻቲ! ኔን ዎታ ሎአይ! ነ አይፈቱ ነ ሶምኡዋ ካምያ ሻርበ ግዱዋና በእያ ዎደ፥ ሀራጵያዳን ሎኢኖ። ነ ብናናይ ጋላኣደ ደርያፐ ዎያ ዴሻ ዉድያ ማላ።

² ነ አቻይ ሜደቲደ፥ ሃን ሜጨቴዳ ኡባይካ ማንትያ የልያ፥ ኡንቱንቱ ግዶን ማይኒ ባይና ዶርሳ ዉድያ ማላ።

³ ነ መተርሻቱ ዞኦ ቃጭና ማላ፤ ነ ሃሳይያ ዎደ ዳሮ ናሸቺኖ። ነ ላኡ ጋጮቱዋ ሻርቢያ ግዱዋና ጼልያ ዎደ፥ እት ሮማንያ ላኡ ከስ ጳልቄዳዋ ማላቲኖ።

⁴ ነ ቆ ኦላ ሚሻ ካቃናዉ ግምቤዳ፥ ዳዊታ አዱሳ ግምቢያ ማላቴ፤ ሄ ግምቢ ሻኡ ምኖ ኦላንቻቱዋ ጎንዳሊ ካቀትና፥ አሌቀት ኡቴዳ።

⁵ ነ ንቱ ማንትያ የለቴዳ፥ ዎራ ጪሻ ግዶን ምያ ገንእያ ማራቱዋ ማላቲኖ።

ሶይዙዋ እትፐተ

⁶ ቃማይ ዎንታናዉ፥ ኩዋይ ክቻናዉ፥ ካርቢያ ደርያነ እጻና ዞዝያ ባደ ሸምፓሻና።

⁷ ታ ሲቃቴ፥ ነ አሳተይ ኡባይካ ማላንቻ፤ ኔናን ዎያዌ አያይነ ባዋ።

⁸ ታ ሙሹራቴ፥ ሊባኖሳ ደርያፐ ዎ። ጋሙነ ማሂ ጌሱ አማና ደርያፐ፥ ሳኒራ ደርያፐነ ሄርሞነ ኪክያፐ ዎ።

⁹ ታ ሲቁዋ ምቻቶ ግድያ ታ ሲቃቴ! ነ አይፍያ ጼሉነ ነ ቆያ አሌቁ፥ ታ ዎዛና ናሸቻን ጎሼዳ።

¹⁰ ታ ሲቁዋ ምቻቶ ግድያ ታ ሙሹራተ! ነ ሲቁ ታና አያ ናሸቺ! ነ ሲቁ ዎይንያ ኤሳፐ አ ናሸቼ፤ ነ ሽቱ ኡባባፐካ አደ ሳዌ።

¹¹ ታ ሙሹራቴ፥ ነ መተርሻና ኤሳ እልሉ ጾኬ። ነ ዶናፐ ኤሳይነ ማይ ፑልቴ፤ ነ ማዩ ሊባኖሳ ጺዳይ ሳዊያዋዳን ሳዌ።

¹² ታ ሲቁዋ ምቻቶ ግድያ ታ ሙሹራት ዩሹ፥ ድረቲደ ናገትያ አታክልትያ ሳኣ ማላ። ዩሹ ግምበቴዳ ፑልቱዋ፥ ማታፋይ አታመቴዳ ጎግያ ሃ ማላ።

¹³ ነ አታክልተቱዋ ግዶን: ሮማኒ፥ ዶረቴዳ አታክልትያ አይፈቱ፥ ሄናይነ ናርዶስያ ግያዋንቱ ደኢኖ።

¹⁴ ሄዋዳንካ ቃይ ናርዶሲ፥ ላዲ፥ ሳዉዋ ማታይነ ቃራፋይ፥ ሄዋዳንካ እጻናዳን ሳዊያባቱ ደኢኖ፤ ሄዋዳንካ ቃይ ካርቢ፥ ጎዳረ ኡ ጪሻይነ ዱማ ዱማ ቅማምያ አታክልተቱ ሞኪኖ።

¹⁵ ኔን አታክልትያ ሳኣ አልያ ፑልቱዋ ማላ፤ ደኡዋ ሃይ ቤትያ ኦላ ማላ፤ ሊባኖሳ ደርያፐ ጎግያ ሻፋ ማላ ያጌዳ።

ወዶራታ:

¹⁶ ሁጲሳ ባጋ ጫርኮ፥ ደንዳ! ገድሳ ባጋ ጫርኮ፥ ሃያ! ታ አታክልትያ ቦላ ጫርካ! አ ሳዉ ሄዋን ቶሹኩ ጎ። ታ ሲቁ ባረ አታክልትያ ግዶ ዮ። ዳሮ ማልእያ ቴራቱዋ ሞ ያጋዱ።