Payduwaa 36 - ጌሻ ማጻፋ

ጋድያ ላትያ ማጫ አሳቱዋ

¹ ዮሴፎ ዛራቱዋፐ፥ ምናሰ ናኣ ማኪራ ናኣ ጋላኣደ ያራቱዋ ካፓቱ ሙሴኮነ እስራኤላቱዋ ያራቱዋ ካፓቱዋኮ ዬድኖ።

² ኡንቱንቱ ዪደ፥ “ኑ ጎዳዉ፥ እስራኤልያ አሳዉ ቢታ ኤጻን ሻካደ እማና ማላ፥ መና ጎዳይ ኔና አዛዜዳ፤ ቃይ ጾሳይ ኑ እሻ ጻሎፍሃዳ ላታ አ ማጫ ናናዉ ኔን እማና ማላ፥ ኔና አዛዜዳ።

³ ሌምሶ ኡንቱንቱ ሀራ ዛረ ግድያ እስራኤልያ አሳ ገሎፐ፥ ኡንቱንቱ ላታይ ኑ አዎቱዋ ላታፐ አከቲደ፥ ኡንቱንቱ ገልያ ዛርያዉ ጉጀቴ። ሄዋ ድራዉ፥ ኑዉ ኤጻን እመቴዳ ላታይ ፓጫና።

⁴ ቃይ እስራኤላቶ እሻታማን ላይ ባላይ ጋክያ ዎደ፥ ኡንቱንቱ ላታይ ኡንቱንቱ ገልያ አሳ ዛርያዉ ጉጀቴ፤ ኡንቱንቱ ላታይ ኑ አዎቱዋ ዛርያ ላታፐ ፓጫና” ያጌዳ።

⁵ ሄዋፐ ጉይያን፥ መና ጎዳ ቃላዳን፥ ሙሴ እስራኤላቱዋ ሀዋዳን ያጊደ አዛዜዳ፤ “ዮሴፎ ዛራቱ ግያዌ ልከ።

⁶ መና ጎዳይ ጻሎፍሃዳ ማጫ ናናቱዋባ አዛዜዳዌ ሀዋ፤ ኡንቱንቱ ባረንቱ ዶሴዳ አስና ገላናዉ ዳንዳዪኖ፤ ሽን ባረንቱ አዉዋ ዛርያፐ ግዳናዉ ኮሼ።

⁷ እስራኤላቱዋ ላታይ እት ዛርያፐ ሀራ ዛርያዉ አፖ፤ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ።

⁸ እስራኤልያ አሳ ግዶን አይ ዛረፐ ግድናካ፥ ቢታ ላትያ ማጫ ናእ ኡባይ፥ እስራኤሊ ኡባይ ባረ ማይዛ አዎቱዋ ላታ ላታና ማላ፥ አ ባረ አዉዋ ዛረ ግድያ አሳ ገሉ።

⁹ ሄዋዳን ሀኒደ፥ ላታይ እት ዛርያፐ ሀራ ዛርያዉ ሙለካ አናን ደአና። ሄዋ ድራዉ፥ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ” ያጌዳ።

¹⁰ ጻሎፍሃዳ ማጫ ናናይ መና ጎዳይ ሙሳ አዛዜዳዋዳን ኦድኖ።

¹¹ ጻሎፍሃዳ ማጫ ናናይ፥ ማህሎ፥ ትርጾ፥ ሆግሎ፥ ምልኮነ ኖኦ ጌተትያዋንቱ፥ ባረንቱ አዉዋ እሻንቱ ናናቱዋ ገሌድኖ።

¹² ኡንቱንቱ ዮሴፎ ናኣ ምናሰ ናናቱ ዛርያ ግዶን አስና ገሌድኖ፤ ኡንቱንቱ ላታይ ኡንቱንቱ አዉዋ ዛርያዉነ ያራዉ አቴዳ።

¹³ ያርኮፐ ሄፍንና፥ ዮርዳኖሳ ሻፋ ማታን ደእያ ሞኣባ ደምባን ሙሴ ባጋና መና ጎዳይ እስራኤልያ አሳ አዛዜዳ ህገቱነ ዎጋቱ ሀዋንታ።