Payduwaa 28 - ጌሻ ማጻፋ

ሀቼ ሀቼ ሺሽያ ያርሹዋ

¹ መና ጎዳይ ሙሳ፥

² “እስራኤላቱዋ ሀዋዳን ያጋደ አዛዛ፤ ‘ታ ቁማ፥ ታና ቶሹኩ ጊደ ሳዋና ማላ፥ ታማን ያርሽያ ታ ያርሹዋ ኬሬዳ ዎድያን ዎድያን ታዉ ናጊደ እምተ’ ያጋ።

³ ቃይ ኔን ኡንቱንታ፥ ‘መና ጎዳዉ ታማን ያርሽያ ያርሹ ሀዋ: ትላ ቦላና ደእያ፥ እት ላይ ግዴዳ ላኡ ዶርሳ ኦርገቱዋ ሀች ሀች ጹግያ ያርሾ ያርሽተ፤

⁴ ዶርሳ ኦርገቱዋፐ እቱዋ ዎንታ፥ ላኤንዋ ኦማርስ ያርሽተ።

⁵ ቃይ ሄዋና እት ሊትሮ ግድያ ዛይትያን ሙናቀቴዳ እት ኪሎ ግራመ ሙሩታ ዛርጋ ልያ ካ ያርሾ ያርሽተ።

⁶ ሀዌ መና ጎዳ ቶሹኩ ጊደ ሳዋና ማላ፥ ሲና ደርያ ቦላን አዛዘቴዳ፥ ሀች ሀች ታማን ጹግያ ያርሹዋ።

⁷ ሄዋና ያርሽያ ኡሻ ያርሹ እት ዶርሳ ኦርግያዉ እት ሊትሮ ግድያ ዎይንያ ኤሳ። ኡሻ ያርሹዋ ጌሻ ሳኣን መና ጎዳዉ ጉስተ።

⁸ ኦማርስ ላኤን ዶርሳ ኦርግያ፥ ዎንታዋ ኦዳዋዳን ኦደ፥ ካ ያርሹዋናነ ኡሻ ያርሹዋና መና ጎዳ ቶሹኩ ጊደ ሳዋና ማላ፥ ታማን ያርሽተ።

ሳምባታ ጋላሳ ያርሹዋ

⁹ “ ‘ሳምባታ ጋላሳን፥ ትላ ቦላና ደእያ እት ላይ ግዴዳ ላኡ ዶርሳነ ዛይትያን ሙናቀቴዳ ላኡ ኪሎ ግራመ ግድያ ሙሩታ ልያ ካ ያርሹዋነ ኡሻ ያርሹዋ ኦደ ያርሽተ።

¹⁰ ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሳምባታ ጋላሳ ኡባን ህንተ ያርሽያ ጹግያ ያርሹ ሀዋ።

አግናይ ጼርያ ጋላሳ ያርሹዋ

¹¹ “ ‘አግናይ ጼርያ ጋላሳ ኡባን፥ ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ጹግያ ያርሹዋ ኦደ፥ መና ጎዳዉ ያርሽተ።

¹² እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ዛይትያን ሙናቀቴዳ ላኡ ኪሎ ግራመ ግድያ ሙሩታ ዛርጋ ልያነ

¹³ ላፑን ዶርሳ ማራቱዋፐ እት እት ዶርሳ ማራና ዛይትያን ሙናቀቴዳ እት ኪሎ ግራመ ግድያ ሙሩታ ዛርጋ ልያ ካ ያርሹዋ ኦደ፥ መና ጎዳ ቶሹኩ ጊደ ሳዋና ማላ፥ ታማን ያርሽያ ያርሹዋ ያርሽተ።

¹⁴ ቃይ ኡሻ ያርሾ እት እት ኮሩማና ላኡ ሊትሮ ግድያ ዎይንያ ኤሳ፥ እት ዶርሳ ኦርግያና እት ሊትሮነ ባጋ ዎይንያ ኤሳነ እት እት ዶርሳ ማራና እት ሊትሮ ግድያ ዎይንያ ኤሳ ሺሽተ። ሀዌ ላይ ግዶን አግናይ ጼርያ ጋላሳ ኡባን ያርሽያ ጹግያ ያርሹዋ።

¹⁵ ሀቼ ሀች ጹግያ ያርሹዋነ አ ኡሻ ያርሹዋ ቦላ፥ እት ዴሻ ኦርግያ ናጋራ ያርሹዋ ኦደ፥ መና ጎዳዉ ያርሽተ።

ፓስጋ ባላነ ኡክ ባላ ያርሾቱዋ

¹⁶ “ ‘ኮይሮ አግናን ታማነ ኦይደን ጋላሳይ መና ጎዳ ፓስጋ ቦንችያ ጋላሳ ግዶ።

¹⁷ ቃይ ሄ አግናንካ ታማነ እቼሸን ጋላሳን ዶሚደ፥ ኡክ ባላይ ቦንቼቴ፤ ሄዋ ድራዉ፥ ላፑን ጋላሳቱዋን እርሹ ገልቤና ኡክ ሚተ።

¹⁸ ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ።

¹⁹ ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ታማን ያርሽያ ያርሹዋ ኦደ፥ መና ጎዳዉ ያርሽተ።

²⁰ ካ ያርሾ እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ግድያ ልያነ

²¹ ላፑን ዶርሳ ማራቱዋፐ እት እት ማራና እት ኪሎ ግራመ ልያ ያርሽተ።

²² ቃይ እት ዴሻ ኦርግያ ናጋራ ያርሾ፥ ህንተ ናጋራ አቶ ጊሳናዉ ያርሽተ።

^23-24 ሀቼ ሀች ዎንታ ጹግያ ያርሹዋነ አ ካ ያርሹዋ ቦላ፥ ሳዉዋ ቶሹኩ ግያ ቁማ ታማን ያርሽያ ያርሹዋ ጉጂደ፥ መና ጎዳዉ ያርሽተ። ላፑን ጋላሳዉ ሄዋዳን ኦተ።

²⁵ ላፑን ጋላሳን ቃይ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ።

ሳምንታቱዋ ባላ ያርሹዋ

²⁶ “ ‘ሳምንታቱ ባላ ጋላሳን ህንተ መና ጎዳዉ ኦራ ካ ሺሽያ ዎደ፥ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ።

²⁷ ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ ሳዉዋ ቶሹኩ ግያ ጹግያ ያርሹዋ ኦደ፥ መና ጎዳዉ ያርሽተ።

²⁸ እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ልያነ

²⁹ ላፑን ዶርሳ ማራቱዋፐ እት እት ማራና እት ኪሎ ግራመ ልያ ካ ያርሾ ያርሽተ።

³⁰ ቃይ እት ዴሻ ኦርግያ ናጋራ አቶ ጊስያ ያርሹዋ ኦደ ያርሽተ።

³¹ ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሀዋንታ ኡንቱንቱ ካ ያርሹዋና ያርሽተ። መሄቱ ትላ ቦላና ደእያዋንታ ግድያዋ ጌሺደ ኤርተ።