Payduwaa 27 - ጌሻ ማጻፋጻሎፍሃዳ ማጫ ናናቱዋ ኦሻ 1 ጻሎፍሃዳ ማጫ ናናይ ማህሎ፥ ኖኦ፥ ሆግሎ፥ ምልኮነ ትርጾ። ጻሎፍሃድ ሄፌራ ናኣ፤ ሄፌር ጋላኣደ ናኣ፤ ጋላኣደ ማክራ ናኣ፤ ማክር ምናሰ ናኣ፤ ምናሰ ዮሴፎ ናኣ። 2 ሀ ማጫ ናናይ ጋከትያ ዱንካንያ ፐንግያን ሙሴ ስንን፥ ቄስያ ኤልኣዛራ ስንን፥ ካፓቱ ስንንነ ማባራ ኡባ ስንን ኤቂደ፥ ሀዋዳን ያጌድኖ፤ 3 “ኑ አዉ ባዙዋን ሀይቄዳ፤ እ ባረ ናጋራን ሀይቄዳፐ አትና፥ መና ጎዳ ቦላ ደንዴዳ ቆራሀ ካልያዋንቱ ግዶን ደኤና። አዉ አቱማ ናእ ባዋ። 4 አቱማ ናእ አዉ ባይናዋ ግዶፐነ፥ ኑ አዉዋ ሱንይ አ ዳቦቱዋ ግዱዋፐ አያዉ ዪ? ኑ አዉዋ እሻንቱ ግዶን ኑዉ ላትያ ቢታ እማ” ያጌድኖ። 5 ሙሴ ኡንቱንቱ ኦሻ መና ጎዳ ስን ሺሼዳ። 6 መና ጎዳይ ሙሳ፥ 7 “ጻሎፍሃዳ ማጫ ናናይ ኦቼዳዌ ልከ፤ ኡንቱንቱ አዉዋ እሻንቱ ግዶን ኔን ኡንቱንቶ ላትያ ቢታ እማ፤ አ ላታይ ኡንቱንታ ጋኮ። 8 ቃይ ኔን እስራኤላቱዋ ሀዋዳን ያጋ፤ ‘እት አሳይ አቱማ ናእ ባይናን ሀይቂያዋ ግዶፐ፥ አ ቢታ አ ማጫ ናእ ላቶ፤ 9 ማጫ ናእካ አዉ ባይናዋ ግዶፐ፥ አ ቢታ አ እሻቱ ላትኖ፤ 10 አዉ እሻቱ ባይናዋ ግዶፐ፥ አ አዉዋ እሻቱ ላትኖ፤ 11 አ አዉዋ እሻቱካ ባይናዋ ግዶፐ፥ አ ዛርያፐ ኡባፐ ማታትያ ዳቡዋ ላትሳ። ታን መና ጎዳይ ኔና ሙሳ አዛዜዳዋዳን፥ ሀዌ እስራኤላቶ ህገ ግዶ’ ያጋ” ያጌዳ። ሙሴ ኮታን ኢያሱ ዶረቴዳ 12 ሄዋፐ ጉይያን፥ መና ጎዳይ ሙሳ፥ “ፑደ አባርማ ደረቱዋ ከሳደ፥ ታን እስራኤልያ አሳዉ እሜዳ ቢታ በአ። 13 በኤዳዋፐ ጉይያን፥ ነ እሻ አሮነዳን ኔንካ ሀይቃደ፥ ነ ማይዛን ጋከታና። 14 አያዉ ጎፐ፥ ጺና ባዙዋን ደእያ ሃን አሳይ ኡባይ ማካሌዳ ዎደ፥ ህንተ ላኡካ ኡንቱንቱ ስንን ታና ጌሻዳን ቦንቻናዉ ታዉ አዛዘትበይክታ” ያጌዳ። ሄዌ ሃይ ጺና መላ ቢታን፥ ቃዴሳን ደእያ ማሪባ ሃ። 15 ሙሴ መና ጎዳ ሀዋዳን ያጌዳ፤ 16-17 “አቤት መና ጎዳዉ፥ አሳ ኡባዉ ደኡዋ እምያ ጾሳዉ፥ ነ አሳይ፥ ጾሳ አሳይ ሄንንቻይ ባይና ዉድያ ማላ ግደናዳን፥ ሀ አሳ ስንን ከስያነ ገልያ፥ ኡንቱንቱካ ካለደ ከስያነ ገልስያ፥ እት አሳ ሀ ማባራ ቦላ ሱንርኪ” ያጌዳ። 18 መና ጎዳይ ሙሳ፥ “አያናይ አን ደእያ ኔዌ ናኣ ኢያሳ አካደ፥ ነ ኩሽያ አ ቦላ ዎ፤ 19 ያታደ ቄስያ ኤልኣዛራ ስንንነ ማባራ ኡባ ስንን ኤሳደ፥ ኡንቱንቱ በእሽን ሱን። 20 እስራኤላቱዋ ማባራ ኡባይ አዉ አዛዘታናዳን፥ ነ ማታፐ አዉ ሻካደ እማ። 21 ቄስያ ኤልኣዛራ ስንን እ ኤቆ፤ ኤልኣዛር ኡሪምያን አዉ መና ጎዳ ሸንያ ኦቾ። ኢያሱነ እስራኤልያ ማባራይ ኡባይ ኤልኣዛራ አዛዙዋን ከስኖነ አ አዛዙዋን ገልኖ” ያጌዳ። 22 መና ጎዳይ አዛዜዳዋዳን ሙሴ ኦዳ፤ ኢያሳ አፊደ፥ ቄስያ ኤልኣዛራ ስንንነ ማባራ ኡባ ስንን ኤሴዳ። 23 መና ጎዳይ ጾሳይ አዛዜዳዋዳን፥ ሙሴ ባረ ኩሽያ አ ቦላ ዎደ፥ አ ሱንዳ። |
The Word for the World Ethiopia