Payduwaa 17 - ጌሻ ማጻፋ

አሮና ጻምኣ አጫቱዋ

¹ መና ጎዳይ ሙሳ ሀዋዳን ያጌዳ፤

² “ኔን፥ ‘ህንተ ዛርያን ዛርያን ህንተ ካፓቱዋፐ ሁጲያን ሁጲያን እት እት ጻምኣ ኡባና ታማነ ላኡ ጻምኣ ታዉ እምተ’ ያጋደ እስራኤላቱዋፐ አካ። እት እት አሳ ሱን ጻምኣ ቦላን ጻፋ።

³ እት እት ዛርያ ካፖ እት ጻምኣ ግድያ ድራዉ፥ ሌዊያ ጻምአን አሮና ሱን ጻፋ።

⁴ ጋከትያ ዱንካንያ ግዶን ታን ኔናና ጋከትያ ማርካተ ታቦታ ስንን ዎ።

⁵ ታን ዶርያ አሳ ጻምአይ አጫና፤ ሀዋዳን ኦደ ህንተ ቦላን እስራኤላቱ ዙዙምያ ዙዙን ታን ሙለ ይሳና” ያጌዳ።

⁶ ሙሴ እስራኤልያ አሳዉ ኦድና፥ ኡንቱንቱ ካፓቱ ታማነ ላኡ ጻምአቱዋ፥ እት እት ዛርያ ካፓቱ እት እት ጻምኣ አዉ እሜድኖ። ሄ ጻምአቱዋ ግዱዋን አሮና ጻምአይካ ደኤ።

⁷ ሙሴ ሄ ጻምኣ ኡባ ማርካተ ዱንካንያ ግዶን መና ጎዳ ስንን ዎዳ።

⁸ ዎንተ ጋላስ ማርካተ ዱንካንያ ግዶ ሙሴ ገሌዳ ዎደ፥ ሌዊያ ዛረ ግድያ አሮና ጻምአይ አጬዳዋ፥ ጉምቤዳዋ፥ ጪሼዳዋነ ጪሺደ ላዉዝያ ግያ ም አይፍያ አይፌዳዋ በኤዳ።

⁹ ሄዋፐ ጉይያን፥ ሙሴ ጻምኣ ኡባ መና ጎዳ ስንፐ እስራኤልያ አሳ ኡባኮ አሄዳ። አሳይ ኡንቱንታ በኤዳዋፐ ጉይያን፥ ካፓቱ ባረንቱ ጻምኣ ጻምኣ አኬድኖ።

¹⁰ መና ጎዳይ ሙሳ፥ “አሮና ጻምኣ ታቦታ ስንን ዛራ ዎ። ሄዋ ማካሌዳዋንቱ ታ ቦላ ላኤን ዙዙሚደ ሀይቀናዳን፥ ኡንቱንቶ ማላታ ኦደ ናጋ” ያጌዳ።

¹¹ መና ጎዳይ አዛዜዳዋዳን ሙሴ ኦዳ።

¹² እስራኤልያ አሳይ ሙሳ፥ “ኑን ሀይቃና፤ ያና፤ ኑን ኡባይካ ያና!

¹³ መና ጎዳ ዱንካንያኮ፥ ሀራይ አቶ ማታ ሺቅያ ኡራይ ኦንነ ሀይቃና። ስም ኑን ኡባይካ ሀይቄቶ?” ያጌድኖ።