Isiyaasa 62 - ጌሻ ማጻፋ

¹ ጽዮነ ድራዉ፥ ታን ጮኡ ጊከ፤ የሩሳላመ ጽሎተይ ዎልቃማ ፖኡዋዳን፥ እ አቶተይካ ኤጽያ ጾምፕያዳን ፖአና ጋካናዉ፥ ታን ጮኡ ጊከ።

² ካዉተቱ ነ ጽሎተ፥ ካተቱ ኡባይካ ነ ቦንቹዋ በአና። መና ጎዳይ ባረ ዶናፐ ሱንያ ኦራ ሱንን ኔን ጼሰታና።

³ ኔን መና ጎዳ ኩሽያን ሎኤዳ አሌቁዋነ ካዉተ ካላቻ ማላ ግዳና።

⁴ ሀዋፐ ስንናዉ ኔን፥ “ዶገታ አቴዳኖ” ጌተታካ። ቃይ ነ ቢታታካ፥ “መላ አቴዳኖ” ጌተቱኩ። ሽን ኔን፥ “ታ ናሸቻይ እን ደእያኖ” ነ ቢታታካ፥ “አስና ገሌዳኖ” ጌተታና። አያዉ ጎፐ፥ መና ጎዳይ ኔናን ናሸታና፤ ነ ቢታትዉካ እ አስና ማላ ግዳናዋ።

⁵ ዎዳላይ ዎዶራቶ ማችያዋዳን፥ ነ ናናይ ኔና አካና፤ ማቻቶ ቡላችያዌ ቡላቼትያንን ናሸትያዋዳን፥ ሄዋዳንካ፥ ነ ጾሳይ ኔናን ናሸታና።

⁶ ኔኖ የሩሳላመ፥ ነ ድርሳ ግምቢያ ቦላን ዎችያዋንታ ታን ዎድ፤ ኡንቱንቱ ጋላስካ ቃማካ ጮኡ ጊክኖ።

⁷ ህንተኖ፥ የሩሳላመባ መና ጎዳ ሀሳይስያዋንቶ፥ እ የሩሳላመ ኬጻና ጋካናዉነ ቢታ ኡባ ቦላን ናሸቴዳ ካታማ ኦና ጋካናዉ፥ ህንተዉካ ሸምፖፕተ፤ አካ ሸምፕሶፕተ።

⁸ መና ጎዳይ ባረ ኡሸቻ ኩሽያንነ ባረ ዎልቃማ ቀስያን ሀዋዳን ያጊደ ጫቄዳ፤ “ታን ላኤን ህንተ ካ ህንተ ሞርከቶ ቁማ ኦደ እምከ፤ ቃይ ህንተ ዳቡሬዳ ህንተ ዎይንያ ኤሳካ አላጋቱ ኡሽክኖ።

⁹ ሽን ጫኬዳዋንቱ ባረንቱ ካ ማና፤ ያቲደ መና ጎዳ ኡንቱንቱ ጋላታና፤ ዎይንያ ቴራ ማጼዳዋንቱ ታ ጌሻ ጎልያ ዳባባን ኡሻና” ያጌ።

¹⁰ አተ! ፐንግያና ከሲደ ቢተ! አሳዉ ኦግያ ከስተ! ከስተ፥ ዎጋ ኦግያ ከስተ! ሹቻቱዋካ ድግተ፤ ካዉተቱ ኦግያ ደማና ማላ፥ ባንድራ ኤስተ።

¹¹ በእተ፥ መና ጎዳይ ቢታ ሳኣ ጋጻን ሀዋዳን ያጊደ አዋዬዳ፤ “ጽዮነ አሳዉ ሀዋዳን ያግተ፤ ‘በእተ፥ ህንተና አሽያዌ ጋኬዳ! በእተ፥ አ ጋቲ አናና ደኤ፤ ኦሶ እ እምያ ኬርሱካ አ ስንን ደኤ’ ያግተ” ያጌዳ።

¹² ህንተ፥ “መና ጎዳይ ዎዜዳ ጌሻ አሳቱዋ” ጌተቲደ ጼሰታና፤ የሩሳላመካ፥ “ኮየቴዳኖ፥ አግ ባሽቤና ካታማቶ” ጌተታና።