Isiyaasa 49 - ጌሻ ማጻፋ

ጾሳ ሀጋዝያዋባ ( 49:1—53:12 ) እስራኤሊ ቢታን ደእያ አሳዉ ፖኦ

¹ ህንተኖ፥ አባ ዶናን ደእያ ቢታቶ፥ ታን ኦድያዋ ስስተ። ህንተኖ፥ ሃኩዋን ደእያ ካዉተቶ፥ ስስተ። ታን የለታናፐ ካሰ መና ጎዳይ ታና ጼሴዳ፤ ቃይ ታ ዳይ ኡሉዋን ደእሽን፥ ታ ሱን ሱንዳ።

² ታ እንጻርሳ ሳታና ደእያ ማሻዳን ኦዳ፤ ባረ ኩሽያ ኩዋን ታና ገንዳ፤ እ ታና ፖሼዳ ቶራዳን ኦዳ፤ ያቲደ ባረ ሾኩዋ ግዶን ታና የጊደ ቆሴዳ።

³ እ ታና፥ “ኔን ታን ኔናን ቦንቼትያ ታ ቆማ እስራኤልያ” ያጌዳ።

⁴ ሽን ታን ሀዋዳን ያጋድ፤ “ታን መላ ጮ ዳቡራድ፤ ታ ዎልቃካ ጎኤናባንነ ሀዳባን ጮ ዉርሳድ። ታ ፕርዳይ ጾሳ ማታና፤ ታ ጋቲካ ታ መና ጎዳ ማታና” ያጋድ።

⁵ ሀእካ፥ ታን መና ጎዳ አይፍያ ስንን ቦንቼቴዳ ድራዉነ ታ ጾሳይ ታዉ ዎልቃ ግዴዳ ድራዉ፥ ያቆባ አኮ ዛራናዉነ እስራኤልያ አኮ ሺሻናዉ፥ ታን አዉ ቆማ ግዳናዳን፥ ታና ታ ዳይ ኡሉዋን መዳዌ መና ጎዳይ ሀዋዳን ያጌ፤

⁶ “ኔን ያቆባ ዛርያ ደንናዉነ እስራኤልያፐ አቴዳዋንታ ዛራደ አሀናዉ፥ ኔን ታዉ ቆማ ግድያዌ ቄር ጉባ። ሄዋ ቦላ ጉጃደ፥ ታ አቶተይ ቢታ ጋጻ ጋካናዳን፥ ታን ኔና ካዉተቶ ፖኦ ኦና” ያጌ።

⁷ አሳይ ካዳዎ፥ እጼዳዎነ ደርያ ሞድያዋንቶ ቆማዉ፥ መና ጎዳይ፥ እስራኤልያ ዎዝያዌ፥ እስራኤልያ ጌሻይ ሀዋዳን ያጌ፤ “አማነትያ መና ጎዳ ድራዉነ ኔና ዶሬዳ እስራኤልያ ጌሻ ድራዉ ካተቱ በኢደ፥ ደንድ ኤቃና። ደርያ ሞድያዋንቱካ በኢደ ጎይናና” ያጌ።

የሩሳላመ ዛረ ኦሰታና

⁸ መና ጎዳይ ሀዋዳን ያጌ፤ “ታን ዶሬዳ ዎድያን ነ ኦሻ ዛራድ። አቶተ ጋላስ ታን ኔና ማዳድ። ታን ኔና ናጋና፤ ኔን ቢታ ዛረደ ኤሳና ማላ፥ አሳይ ደኤና ቢታቱዋካ ኔን ላትሳና ማላ፥ ታን ኔና አሳዉ ጫቁዋ ኦደ እማድ።

⁹ ኦሞዱዋን ደእያዋንታ፥ ‘ከስተ!’ ማ ቃሹዋን ደእያዋንታካ፥ ‘ብለትተ!’ ጋና ማላ፥ አሳዉ ጫቁዋ ኦደ ኔና እማና። ኡንቱንቱ ኦግያ ማታን ሄመታና፤ ዞዘትያ ከራ ኡባ ቦላ አላጻና።

¹⁰ ኡንቱንቱ ኮሻትክኖ ዎይ ሳመትክኖ። ኡንቱንቱ ባዙዋ ምሹ ጹገና፤ አዋይካ ኡንቱንታ ሜና። ኡንቱንቶ ቃረያዌ ኡንቱንታ ካለና፤ ፑልቶ ሃኮካ ኡንቱንታ ላጋና።

¹¹ “ታን ታ ደረቱዋ ኡባ ኦገ ከሳና፤ ታ ዎጋ ኦገቱካ ዛንጋራፐ ቁ ጋና።

¹² በአ፥ ታ አሳይ ሃኮ ሳፐ ያና: ሁጲሳ ባጋፐነ አዋይ ዉልያ ባጋፐ ያና። ቃይ አስዋና ቢታፐካ ያና” ያጌ።

¹³ ህንተኖ ሳሎቶ፥ ናሸቻን የጽተ። ኔኖ ቢታዉ ናሸታ። ህንተኖ ደረቶ፥ እልልተ! አያዉ ጎፐ፥ መና ጎዳይ ባረ አሳ ምንዳ፤ ቃይ ባረ መቶታንቻቶካ ቃረቴ።

¹⁴ ሽን ጽዮና፥ “መና ጎዳይ ታና አጌዳ፤ ጎዳይ ታና ዶጌዳ” ያጋዉ።

¹⁵ ጾሳይ ሀዋዳን ያጊደ ዛሬ፤ “አታ ባረ ንያ ናኣ ዶጋናዉ ዳንዳያይ? ባረ ኡሉዋፐ የሌዳ ናአዉ ቃረተኬየ? ጌላዳን አ ዶግንቶካ፥ ታን ኔና ዶግከ!

¹⁶ በአ፥ ታን ኔና ታ ኩሽያ ጎምፓን ጻፋ ዎድ፤ ነ ድርሳ ግምበቱካ ኡባ ገደ ታ ስንን ደኢኖ።

¹⁷ “ኔና ዛረደ ኬጽያዋንቱ ያና፤ ኔና ኮሌዳዋንቱ ከሲደ ባና።

¹⁸ አነ ቁ ጋደ፥ ነ ዩሹዋ ጼላ፤ ነ ናናይ ኡባይ እትፐ ሺቂደ፥ ኔኮ ያና። ታን መና ጎዳይ ታ ደኡዋን ጫቃይ: ኔን ኡንቱንቱ ኡባ አሌቁዋዳን ማያና፤ ቡላቼታናዉ ሀንያ ምሽራቲዳን፥ ኔን ኡንቱንታ ማያና።

¹⁹ “ነ ባሻ ሳአቱነ መላ ቢታቱ ሀእ ኔናን ደእያ አሳዉ ሎይ ኡንአና፤ ቃይ ኔና ኮሌዳዋንቱካ ኔፐ ሃካና።

²⁰ ኔን ካዮትያ ላይቱዋን ነዉ የለቴዳ ናናይ ነ ሀይን ኦዲደ፥ ‘ሀዌ ሳአይ ኑዉ ሎይ ኡንኦ፤ ሄዋ ድራዉ፥ ኑዉ ደአናዉ አኮ ሳኣ እማ’ ያጋና።

²¹ ኔን ነ ዎዛናን፥ ‘ሀዋንታ ናናቱዋ ኡባ ታዉ ኦኔ የሌዳዌ? ታን የላደ ማን አታድ ሽን፤ ታን ማይናድ ሽን፤ ታን ኦሞደታደ ዎራ ባድ ሽን። ያትና፥ ሀዋንታ ኦኔ ድቼዳዌ? በአ፤ ታን ታረካ አታድ፤ ያትና ሀዋንቱ ናናይ ኡባይ ሀቃፐ ዬድኖ?’ ያጋና” ያጌ።

²² ኡባ ሞድያ መና ጎዳይ ሀዋዳን ያጌ፤ “በአ፥ ታን ካዉተቶ ማላታ በሳና፤ ታን አሳዉ ታ ባንድራ ኤሳና። ኡንቱንቱ ነ አቱማ ናናቱዋ እድም አሀና፤ ነ ማጫ ናናቱዋካ ባረንቱ ሀሽያን ቶኪደ አሀና።

²³ ካተቱ ኔና ድችያ አዎቱዋ ግዳና፤ ኡንቱንቱ ማጫ ካተቱካ ኔና ንያዋንታ ግዳና። ኡንቱንቱ ጉፋኒደ፥ ነዉ ጎይናና፤ ቃይ ነ ገድያ ባናካ ላጫና። ታን መና ጎዳ ግዴዳዋ ኔን ሄዋን ኤራና፤ ታናን አማነቲደ ናግያዋንቱ ዬላትክኖ” ያጌ።

²⁴ ኦሞዱዋን አኬዳዋ ዎልቃማ ኩሽያፐ ዛርሳና ዳንዳዪቴየ? ዎይ ኦሞዲደ አፌዳ አሳይ መቀ ባይና ኢታ ኩሽያፐ ከስ አካናዉ ዳንዳዪየ?

²⁵ ሽን መና ጎዳይ ሀዋዳን ያጌ፤ “ዎልቃማይ ኦሞዲደ አፌዳባይ ስማና፤ መቀ ባይና ኢታቱዋ ኩሽያን ኦሞደቴዳ አስካ ከስ አካና። አያዉ ጎፐ፥ ኔናና ኦለትያዋንቱና ታን ኦለታና፤ ነ ናናቱዋካ ታን አሻና።

²⁶ ኔና ኡቁንያዋንቱ ባረንቱ አሹዋ ማናዳን፥ ታን ኦና፤ ቃይ ዎይንያ ኤሳ ኡሺደ ማትያዋዳን፥ ኡንቱንቱ ባረንቱ ሱ ኡሺደ ማታና። ያቶፐ አሳ ኡባይ ታን መና ጎዳ፥ ኔና አሽያዋ፥ ዎዝያዋነ፥ ያቆባ ዎልቃማ ግድያዋ ሄዋን ኤራና” ያጌ።