Isiyaasa 17 - ጌሻ ማጻፋ

ጾሳይ ሶርያነ እስራኤልያ ሙራና

¹ ዳማስቆ ካታማባ ጾሳይ ሀዋዳን ያጌ፤ “በእተ፥ ሀዋፐ ስንናዉ ዳማስቁ ካታማ ግድያዌ አታና፤ እ ኮለ ዶርያ ግዳናዋ።

² አሩራ ካታማቱ አሳይ ደኤና ሳኣ ግዳናዋንታ፤ ሄዋን መህያ ዉዲ አላጻና፤ ኡንቱንቱ ያሽስያዌካ ደኤና።

³ ኤፍሬመፐ ጌሳቱ፥ ዳማስቆፐካ ካዉተይ ያና፤ ሶርያ አሳፐ አቴዳዋንቱ እስራኤልያ አሳ ቦንቹዋ ማላ ግዳናዋንታ። ታን፥ ኡባፐ ዎልቃማ መና ጎዳይ ሀዋ ኦዳይ” ያጌ።

⁴ ጾሳይ ሀዋዳን ያጌ፤ “ሄ ጋላስ እስራኤልያ ቦንቹ ቃረታና፤ አ ሞካ ሾራና።

⁵ እስራኤሊ ጫክያዌ ኤቁዋን ደእያ ካ ሺሽ ኦይቂደ፥ ማቃ ዛዋፐ ቃንጽ ቃንጽ ጫክያዋ ማላ ግዳናዋ፤ ዎይ ራፋይማ ዛንጋራን ካ ጫኪደ፥ ፑሻሌዳ ሳ ማላ ግዳናዋ።

⁶ ዎጋራ ቃ ስምና፥ ጼራን ላኡ ዎይ ሄዙ ቃርመ አይፈቱ አትያዋዳን፥ ዎይ ዳሻ ግዶን ኦይዱ ዎይ እቼሹ አይፈቱ አትያዋዳን፥ እስራኤልያፐ ቃርመቱ አታና” ያጌዳ። ሄዋ መና ጎዳይ፥ እስራኤልያ ጾሳይ ሃሳዬዳ።

⁷ ሄ ጋላስ አሳይ ባረና መዳዋኮ ጼላና፤ ባረንቱ አይፍያካ እስራኤልያ ጌሻኮ ዛራና።

⁸ ኡንቱንቱ ባረንቱ ኩሽያን ጊግሴዳ ያርሽያ ሳኣ ጼልክኖ፤ አሼሮ ግያ ኤቃት ምስልያ ግድናካ፥ እጻና ጩዋይያ ሳኣ ግድናካ፥ ኡንቱንቱ ባረንቱ ብራያን መዳዋን አማነትያዋ አጋና።

⁹ ሄ ጋላስ እስራኤልያ አሳ ጋሱዋን ሂዌቱዋነ አሞረቱዋ ካታማቱ ላለቴዳዋዳን፥ ኡንቱንቱ ምኖ ካታማቱ ላለታና፤ ሄ ካታማቱ መላ ግዳናዋንታ።

¹⁰ አያዉ ጎፐ፥ ህንተ ህንተና አሽያ፥ ጾሳ ዶጌድታ፤ ህንተ ባቃት አትያ ዎጋ ዛላካ ሀሳይበይክታ። ሄዋ ድራዉ፥ ኔን ሎኦ ምቱዋ ቶኮፐካ፥ ካረ ጋድያፐ ዬዳ ሎኦ አታክልትያ ቶኮፐካ፥

¹¹ ነ ቶኬዳ ጋላስ ኡንቱንቱ ድጪንቶካ፥ ቃይ ነ ዘሬዳ ዎንታ ኔ ኡንቱንታ ጪሽስንቶካ፥ ነ ካዩዋነ ነ ፓጻናዉ ዳንዳየና ሳኩዋ ጋላስ ሄ ጫኩ ጋኬዳ ካይ ባቃት ያና።

ሞርከ ካዉተቱ ጾነቴድኖ

¹² በአ፥ ዳሮ አሳይ ጉሜ፤ ኡንቱንቱ አባ ቤታዳን ጉሚኖ። ቃይ ካዉተቱ ዋሲኖ፤ ኡንቱንቱ ዎልቃማ ሃዳን ዋሲኖ። ኡንቱንቶ አየ አና።

¹³ ካዉተቱ ዳሮ ሃቱዋ ጉንዳን ጉሚኖ፤ ሽን ጾሳይ ኡንቱንታ ሴራና፤ ኡንቱንቱ ደርያ ሁጲያን ደእያ ሱላይ ጫርኩዋን ደንድያዋዳንነ ጎቲ ደንያ ባናዳን፥ የደርሰቲደ፥ ሃኮ ሳ ባቃታና።

¹⁴ ሳአይ ቃምያ ዎደ፥ ኡንቱንቱ ሻቢረታና፤ ሳአይ ዎንታናፐ ካሰቲደ፥ ኡንቱንቱ ያና፤ ኑዋ ዎልቃን አክያዋንቱ ካጫይነ ኑና ቦንቂያዋንቱ ሳማይ ሀዋ።