Doometsaa 27 - ጌሻ ማጻፋ

ይሳቅ ያቆባ አንጄዳ

¹ ይሳቅ ጭምና፥ አ አይፊ ጼላ እጼዳ ዎደ፥ ባረ ባይራትያ ናኣ ኤሳ ጼሲደ አ፥ “ታ ናአዉ” ያጌዳ። እ፥ “አቤ” ጊደ ኮዬዳ።

² እ፥ “በአ፥ ሀእ ታን ጭማድ፤ ታን ሀይቃና ጋላሳ ኤርከ።

³ ያትያ ድራዉ፥ ሀእ ነ ሻንካትያ ዎንዳፍያነ ዙቢያ አካደ፥ ባዙዋ ባ፤ ዶኣ ታዉ ሻንካታደ፥ አሹዋ አካደ ያ።

⁴ ማልኦ ቁማ፥ ታን ዶስያዋ ካደ አ፤ ሄዌነ ታን ሀይቃናፐ ካሰ ኔና አንጃናሳ” ያጌዳ።

⁵ ርብቃ ይሳቅ ባረ ናኣ ኤሳዉ ኦድያ ዎደ ስሳዱ። ኤሳይ ዶኣ ሻንካቲደ አሀናዉ ባዙዋ ቤዳዋፐ ጉየ፥

⁶ ርብቃ ባረ ናኣ ያቆባ፥ “ነ አዉ ነ እሻ ኤሳዉ፥

⁷ ‘ዶኣ ሻንካታ አሃደ፥ ታዉ ማልኦ ቁማ ታን ማናዉ ካ፤ ሄዌነ ታን ሀይቃናፐ ካሰታደ፥ መና ጎዳ ስንን ኔና አንጃናሳ’ ያግያዋ ታን ስሳድ።

⁸ ታ ናአዉ፥ ሀእ ታን ኔና አዛዝያዋ ሎይደ ስሳ።

⁹ ዉድያ ጋርሳ ባደ፥ ላኡ ቦልትቦልታ ዴሻ ማራቱዋ ታዉ አካደ ያ፤ ታን ነ አቦው ማልኦ ቁማ እ ዶስያዋዳን ካና።

¹⁰ ነ አዉ ሚደ ሀይቀናን ካሰቲደ ኔና አንጃና ማላ፥ አዉ አሳ” ያጋዱ።

¹¹ ሽን ያቆብ ባረ አቶ ርብቆ፥ “ታ እሻ ኤሳ ቦላን እስኪ ደኤ፤ ሽን ታ ቦላይ ሊቆ።

¹² ታ አዉ ታና ኦይቂ በኦፐ ሽን? ታን አ ጭምያዋ አዉ ማላትና፥ ታን አንጁዋ ድራዉ ሸቃ ታ ቦላ አሀነንቶነ” ያጌዳ።

¹³ አ ዳያ አ፥ “ታ ናአዉ፥ ሄ ሸቃይ ታና ጋኮ። ታን ነዉ ኦድያዋ ኦ፤ ባደ ዴሻ ማራቱዋ ታዉ አካደ ያ” ያጋዱ።

¹⁴ ብ አሂደ ባረ ዳይዉ እሜዳ፤ አ ዳያ ማልኦ ቁማ አ አዉ ዶስያዋዳን ካዱ።

¹⁵ ሄዋፐ ጉየ፥ ርብቃ ሶን ባረ ማታን ደእያ ባረ ባይራ ናኣ ኤሳ ማዩዋ ሎኡዋ አሃደ፥ ባረ ቴፋ ናኣ ያቆባ ማይዛዱ።

¹⁶ ቃይ ሄ ዴሻቱዋ ጋልባ አ ኩሽያነ አ ሊቆ ቆያ ማይዛዱ።

¹⁷ ባረ ካዳ ማልኦ ቁማነ ኡክ ባረ ናኣ ያቆባ ኩሽያን ዎዱ።

¹⁸ ያትና እ ባረ አዉዋኮ ቢደ ገሊደ፥ “ታ አዎ” ያጌዳ። እ፥ “አቤ! ታ ናአዉ፥ ኔን ኦኔ?” ያጌዳ።

¹⁹ ያቆብ ባረ አዉዋ፥ “ታን ነ ባይራ ናኣ ኤሳ፤ ኔን ታና አዛዜዳዋዳን ታን ኦድ፤ ደንዳ፤ ደንዳ ኡታደ፥ ታን ሻንካፐ አሄዳዋ ማ፤ ያታደ ታና አንጃ” ያጌዳ።

²⁰ ይሳቅ ባረ ናኣ፥ “ታ ናአዉ፥ ዋታ ኤሌላ ደማድ?” ያጊደ ኦቼዳ። እ፥ “መና ጎዳይ ነ ጾሳይ ታና ማዴዳ” ያጌዳ።

²¹ ይሳቅ ያቆባ፥ “ታ ናአዉ፥ ኔን ቱሙ ታ ናኣ ኤሰንቶነ ታን ኦይቃ በአናዉ አነ ታኮ ሺቃ” ያጌዳ።

²² ያቆብ ባረ አዉዋ ይሳቃኮ ሺቅና ኦይቂ በኢደ፥ “ሀ ቃላይ ያቆባ ቃላ፤ ሽን ኩሺ ኤሳ ኩሽያ” ያጌዳ።

²³ አ ኩሺ አ እሻ ኤሳ ኩሽያዳን እስክያና ደእያ ድራዉ፥ ኤርቤና፤ እ ኤረናን አ አንጄዳ።

²⁴ አ፥ “ቱሙ ኔን ታ ናኣ ኤሰዬ?” ያጊደ ኦቼዳ። እ፥ “ኤ፥ ታናቴ” ያጌዳ።

²⁵ እ፥ “ታ ናአዉ፥ ታን ኔን ሻንካቴዳዋ ማናዉ ሃ አ፤ ማደ ታን ኔና አንጃና” ያጌዳ። ያቆብ አና፥ እ ሜዳ፤ ቃይ እ አዉ ዎይንያ ኤሳ አህና ኡሼዳ።

²⁶ ሄዋፐ ጉየ አ አዉዋ ይሳቅ፥ “ታ ናአዉ፥ ሃያ፤ ሺቃደ ታና የራ” ያጌዳ።

²⁷ ያቆብ ሺቂደ አ የሬዳ፤ ይሳቅ አ ማዩዋ ስንግ ስሲደ፥ ሀዋዳን ያጊደ አንጄዳ፤ “ታ ናኣ ፔኑ መና ጎዳይ አንጄዳ ጎሻዳን ሳዌ።

²⁸ ጾሳይ ሳሉዋ ጮኩዋነ ሳኣ ሽጫ፥ ካነ ኦራ ዎይንያ ኤሳ ዳርሲደ ነዉ እሞ።

²⁹ ካዉተቱ ነዉ ሞደትኖ፤ አሳቱ ነዉ ጉልባትኖ። ኔን ነ እሻቶ ጎዳ ግዳ፤ ነ አት ዛራቱ ነዉ ጉልባትኖ። ኔና ሸቂያዌ ሸቀቴዳዋ ግዶ፤ ኔና አንጅያዌ አንጀቴዳዋ ግዶ” ያጌዳ።

³⁰ ይሳቅ ያቆባ አንጅ ዉርሴዳዋፐ ጉየ፥ ያቆብ ባረ አዉዋ ይሳቃ ስንፐ ከሶዋን ኤሳይ ሻንካፐ ፑቱ ጌዳ።

³¹ እካ ቃይ ማልኦ ቁማ ካደ፥ ባረ አዎ አዳ። አ፥ “ታ አዎ፥ ደንዳ፤ ደንዳ ኡታደ፥ ታን ሻንካቴዳዋፐ ማ፤ ያታደ ታና አንጃ” ያጌዳ።

³² አ አዉ ይሳቅ አ፥ “ኔን ኦኔ?” ያጊደ ኦቼዳ። እ፥ “ታን ነ ናኣ፥ ነ ባይራ ናኣ ኤሳ” ያጌዳ።

³³ ይሳቅ ዳጋሚደ ኮኮሪደ፤ “ያትና ዶኣ ሻንካቴዳዋ አኪደ ታዉ አዳዌ ኦኔ? ታን ሀእ ኔን ያና ስንን ማደ፥ አ አንጃ ድጋድ፤ ቱሙካ እ አንጀቴዳዋ ግዳናዋ” ያጌዳ።

³⁴ ኤሳይ ባረ አዉዋ ቃላ ስሴዳ ዎደ፥ ባረ ቃላ ቁ ኦደ፥ ዳሮ ይባታ ዬኩዋ ዬኪደ ባረ አዉዋ፥ “ታና አንጃ፤ ታ አዎ፥ ታናካ አንጃ!” ያጌዳ።

³⁵ ሽን እ፥ “ነ እሻይ ዪደ ጭሚደ፥ ነ አንጁዋ አክ ድጌዳ” ያጌዳ።

³⁶ ኤሳይ፥ “አ ኤሪደ ያቆባ ሱንዳ፤ እ ታና ጭሞደ፥ ሀዌ ላኤንዋ፤ እ ታ ባይራተ አኬዳ፤ ቃይ ሀእ ታ አንጁዋ አኬዳ” ያጌዳ። ቃይ እ፥ “ኔን ታዉ አንጁዋፐ አያነ አሻበይኪ?” ያጊደ ኦቼዳ።

³⁷ ይሳቅ ኤሳ፥ “ታን አ ነዉ ጎዳ ኦድ፤ አ እሻቱዋ ኡባካ አ ቆማቱዋ ኦድ፤ ቃይ ታን ካንነ ኦራ ዎይንያ ኤሳን አ ምንሳድ። ያትና፥ ታ ናአዉ፥ ነዉ ታን አያ ኦ?” ያጌዳ።

³⁸ ኤሳይ ባረ አዉዋ፥ “ታ አዎ፥ ነዉ እት አንጆ ጻላላይ ደኢ? ታ አዎ፥ ታናካ ቃይ አንጃ” ያጌዳ። ሄዋፐ ጉየ፥ ኤሳይ ባረ ቃላ ቁ ኦደ ዬኬዳ።

³⁹ አ አዉዋ ይሳቅ ዛሪደ፥ “ነ ደእያ ሀ ሳኣ ዱረተፐ ሃካደ ደአና፤ ሳሉዋ ጮኩካ ነዉ ዎና፤

⁴⁰ ኔን ነ ማሻን አቃና፤ ኔን ነ እሻዉ ሞደታና። ሽን ኔን አናና ኤቀትያ ዎደ፥ አ ሞርገ ም ነ ሞርግያፐ ኦላና” ያጌዳ።

⁴¹ ያቆባ አ አዉ አንጄዳ ድራዉ፥ ኤሳይ ባረ ኡሉዋን አ ሞርኬዳ፤ እ ባረ ዎዛናን፥ “ታ አዉ ሀያና ማቴዳ፤ ታን አዉ ካዮታ ስማደ፥ ታ እሻ ያቆባ ዎና” ያጌዳ።

⁴² ሽን ርብቃ ሀ ባረ ባይራ ናኣ ኤሳ ቃላ ስሴዳ ድራዉ፥ ባረ ቴፋ ናኣ ያቆባ ጼስሳ አሃደ ሀዋዳን ያጋዱ፤ “ነ እሻይ ኤሳይ ኔና ዎደ ሀሉዋ ከሳናዉ ሀልቼዳ።

⁴³ ሀያና ታ ናአዉ፥ ታን ነዉ ኦዶዋ ኦ። ደንዳ! ካራነን ደእያ ታ እሻ ላባናኮ ባቃታ!

⁴⁴ ያታደ ነ እሻ ሀንቁ ዶቻና ጋካናዉ፥ አማሬዳ ዎድያ አናና ደአሻ።

⁴⁵ ነ እሻይ ነዉ ሀንቀትያዋ አግያ ዎደነ፥ ኔን አ ቦላ ኦዳዋ እ ዶግያ ዎደ፥ ታን ኪታደ ኔና ያፐ አህሳና። ታን እት ጋላስ ህንተንቱ ላኡዋፐ መላ ከሳና ኮይከ” ያጋዱ።

ይሳቅ ያቆባ ላባናኮ የዴዳ

⁴⁶ ሄዋፐ ጉየ ርብቃ ይሳቃ፥ “ኤሳይ አኬዳ ሂተቱዋ ማጫ ናና ጋሱዋን ታን ታ ደኡዋ ሸነታድ፤ ቃይ ያቆብካ ሀዋንቱ ማላ ሂተቱዋ ማጫ ናናቱዋፐ ማቻቶ አኮፐ፥ ታን ስም ሀይቃናዉ ኮያድ” ያጋዱ።