2 Sammeela 9 - ጌሻ ማጻፋ

ዳዊታነ ማንፍቦሼታ

¹ እት ጋላስ ዳዊተ፥ “ዮናታና ድራዉ፥ ታን አዉ ኬካናዳን ሀኖ ጋካናዉ ሳኦላ ቃንፐ አቴዳ አሳይ ደኢሻ?” ያጊደ ኦቼዳ።

² ሄ ዎደ ጺባ ግያ እት ቆማይ ሳኦላ ሶን ደኤ፤ እ ዳዊታ ስን ያናዳን ጼሴድኖ፤ ዪና ካቲ አ፥ “ኔን ጺቤ?” ያጊደ ኦቼዳ። እካ፥ “ኤ ታን ጺባ፥ ነ ቆማ” ያጌዳ።

³ ሄዋፐ ጉየ ካቲ አ፥ “ጾሳ ኬካተ ታን ኬካናዳን፥ ሳኦላ ቃንፐ ፓላሄዳ እት አሳይነ ባዌ?” ያጌዳ። ጺብ ካትያ፥ “ዮናታና ናናቱዋፐ እቱ ሀኖ ጋካናዉ ደኤ፤ ሄ ናአዉ ላኡ ገደቱካ ስላ” ያጌዳ።

⁴ ካቲ፥ “እ ሀቃን ደኢ?” ያጌዳ። ጺብ፥ “ሎዳባራ ግያ ሳኣን አምኤላ ናኣ ማክራ ሶን ደኤ” ያጌዳ።

⁵ ሄዋፐ ጉየ ካትያ ዳዊተ ኪቲደ፥ ሎዳባራፐ አምኤላ ናኣ ማክራ ሶፐ አህሴዳ።

⁶ ሳኦላ ናኣ ዮናታና ናአይ ማንፍቦሼተ ዳዊታኮ ዬዳ፤ ይ ጋኪደ፥ ዳዊታ ስንን ጾነታድ ጊደ ግሴዳ። ያትና፥ ዳዊተ አ፥ “ማንፍቦሼታ!” ያጊደ ጼሴዳ። እ፥ “አቤ ታ ጎዳዉ፥ ታን ነ ቆማ” ያጌዳ።

⁷ ዳዊተ አ፥ “ያዮፓ፤ ነ አዉዋ ዮናታና ድራዉ፥ ታን ነዉ ኬካና። ነ አዉዋ አዉዋ ሳኦላ ጋድያ ኡባ ታን ነዉ ዛራና፤ ቃይ ኔን ኡባ ዎደ ታ ማሶፍያፐ ማና” ያጌዳ።

⁸ ሄዋፐ ጉየ ማንፍቦሼተ ላኤንዋ ግሲደ፥ “ሀይቄዳ ካና ማላ ታና ኔን ዶሳደ ጼላናዉ፥ ነ ቆማይ ታን ኦኔ?” ያጌዳ።

⁹ ካቲ፥ ሳኦላ ቆማ ጺባ ጼሲደ፥ “ሳኦለዋነ ሳኦላ ሶ አሳዋ ግዴዳዋ ኡባ ታን ነ ጎዳ ናኣ ናአዉ እማድ።

¹⁰ ነ ጎዳ ናኣ ናአይ ማናዳን ኔን፥ ነ ናናይነ ነ ቆማቱ አዉ ጋድያ ጎሽተ፤ ዶልያ ካ አዉ አህተ። ግዶፐካ፥ ነ ጎዳ ናኣ ናአይ ማንፍቦሼተ ኡባ ዎደ ታ ማሶፍያፐ ማና” ያጌዳ። ጺባዉ ታማነ እቼሹ አቱማ ናናይነ ላታሙ ቆማቱ ደኢኖ።

¹¹ ጺብ ካትያ፥ “ኔን ታ ጎዳይ ካቲ ነ ቆማ አዛዜዳ ኡባባ ታን ነ ቆማይ ፖላና” ያጌዳ። ሄዋ ድራዉ፥ ማንፍቦሼተ ካትያ ናናቱዋፐ እቱዋዳን ካትያ ማሶፍያፐ ሜዳ።

¹² ማንፍቦሼታዉ ሚካ ግያ ጉ ናአይ ደኤ። ጺባ ሶን ደእያ አሳቱ ኡባቱ ማንፍቦሼታዉ ቆማ ግዴድኖ።

¹³ ማንፍቦሼተ ኡባ ዎደ ካትያ ማሶፍያፐ ምያ ድራዉ፥ እ የሩሳላመን ደኤ። አ ገዲ ላአቱካ ስላ።