2 Sammeela 15 - ጌሻ ማጻፋ

አበሰሎማ ማቁዋ

¹ ሄዋፐ ጉይያን፥ አበሴሎም ፓራ ጋርያ፥ ፓራቱዋነ ባረ ስንን ዎጻናዉ እሻታሙ አሳቱዋ ጊግሴዳ።

² አበሴሎም ዎንታ ጉራና ደንዲደ፥ ካታማ ፐንገ አፍያ ኦግያ ዶናን ኤቄ። ሞቱ ደእያ አይ አሳይነ ካትያ ስን ፕርዳዉ ዬዳ ዎደ፥ አበሴሎም ሄ ብታንያ ጼሲደ፥ “ኔን ሀቃ ካታማፐ ያድ?” ያጊደ ኦቼ። ሄ ብታኒ፥ “ታን ነ ቆማይ እስራኤልያ ዛራቱዋፐ እቱዋፐ ያድ” ያጊደ አዉ ዛሬ።

³ አበሴሎም አ፥ “በአ! ነ የዉ ሎአነ ሱረ፤ ሽን ካትያ ባጋፐ ነዉ ስስያዌ ባዋ” ያጌ።

⁴ አበሴሎም ጉጂደካ፥ “ታን እስራኤልያ ቢታን ፕርዳናዉ ሱንቴዳዋ ግዳርክታሻ! ሄዋ ግድንቶ፥ ሞቱ ዎይ የዉ ደእያ ኡባይ ታኮ ዪና፥ ታን አዉ ሱረ ፕርዳ ፕርዳና ሽን” ያጌ።

⁵ ኦንነ አኮ ዪደ አዉ ሆክያ ዎደ፥ አበሴሎም ባረ ኩሽያ የዲደ፥ ሄ ኡራ ኦይቂደ የሬ።

⁶ ፕርደታናዉ ካትያኮ ይያ እስራኤለቱዋ ኡባዉ አበሴሎም ሄዋዳን ሀኔዳ፤ ያቲደ እስራኤልያ አሳ ዎዛና አበሴሎም ዉኤዳ።

⁷ ኦይዱ ላይፐ ጉይያን፥ አበሴሎም ካትያ፥ “ታን መና ጎዳዉ ሺቄዳዋ ጋናዉ ከብሮነ ጋድያ ባና።

⁸ ታን ነ ቆማይ ጋሹራ ጋድያን ሶርያ ቢታን ደኣደ፥ ‘ታና መና ጎዳይ የሩሳላመ ጉየ አፍያዋ ግዶፐ፥ ከብሮነ ካታማን ታን መና ጎዳዉ ጎይናና’ ያጋደ ሺቃ ኡታድ” ያጌዳ።

⁹ ካቲ አበሰሎማ፥ “ሳሮ ባ” ያግና፥ እ ደንዲደ ከብሮነ ካታማ ቤዳ።

¹⁰ ሽን አበሴሎም እስራኤልያ ዛራቱዋ ኡባኮ ቆሱዋን ኪታ የዲደ፥ “ማላካታ ፑና ህንተንቱ ስሴዳ ዎደ፥ ‘አበሰሎም ከብሮናን ካተቴዳ’ ያግተ” ያጌዳ።

¹¹ አበሴሎም ጼስና፥ የሩሳላመፐ አናና እትፐ ቤዳ እማቱ ላኡ ጼቱ አሳ፤ ሄ አሳቱ አይነ ኤረናን ጮ አሽከተን ቤድኖ።

¹² አበሴሎም ያርሹዋ ያርሺደ፥ ዳዊታ ዞርያ አክጾፌላ ጊሎ ካታማፐ ጼስሴዳ፤ ካትያ ቦላ ደንዴዳ ማቁ ጎቤዳ፤ አበሰሎማ ካልያዋንቱካ ጮራት ጮራት ቤድኖ።

ዳዊተ የሩሳላመፐ ባቃቴዳ

¹³ እት ኪተቴዳዌ ዪደ ዳዊታ፥ “እስራኤልያ አሳ ዎዛናይ አበሰሎማኮ ስም ክቼዳ” ያጌዳ።

¹⁴ ሄዋፐ ጉይያን፥ ዳዊተ ባረናና እትፐ የሩሳላመን ደእያ ባረ ኦሳንቻቱዋ፥ “ደንድተ! ኑን ባቃቶይተ! ሄዌ ዮፐ፥ ኑ ግዶፐ አይ አሳይነ አበሰሎማፐ ከስ አከና። ኑን ኤሌሊደ ባና ኮሼ፤ ሄዌ ዮፐ፥ እ ኤሌል ዪደ ኑና ይሳና፤ ኑ ካታማ ማሻን ቡሳካና” ያጌዳ።

¹⁵ ካትያ ኦሳንቻቱ አ፥ “ኔን ኑ ጎዳይ ካቲ ዶሬዳ ኡባባ ኑን ነ ቆማቱ ኦናዉ ጊግ ኡቴዶ” ያጌድኖ።

¹⁶ ካቲ ከሲደ ቤዳ፤ አ ሶ አሳይ ኡባይ አናና እትፐ ቤዳ፤ ሽን ባረ ጎልያ ናጋናዳን ታሙ ባኮቱዋ አሼዳ።

¹⁷ ካቲ ከስና፥ አሳይ ኡባይ አናና ቤዳ፤ ካታማዉ ዉርሰ ጎልያ ላንቂያን ኤቄድኖ።

¹⁸ አ ኦሳንቻቱ ኡባይ አፐ ስንና ሳልፒደ አድኖ፤ ኡንቱንታ ካሊደ ካትያ ናግያዋንቱ (ካልታዋቱነ ፓልታዋቱ) ሳልፔድኖ፤ ቃይ ኡንቱንታ ካሊደ ጋተ ካታማፐ ዬዳ ኡሱፑን ጼቱ አሳቱ፥ ካትያ ስንና ሳልፒደ አድኖ።

¹⁹ ካቲ ጋትያ እታያ፥ “ኔን ኑናና አያዉ ያይ? ጉየ ስማደ፥ ካትያ አበሰሎማና ደአሻ። ኔን አሳ ቢታ አሳ፤ ኔን በተ።

²⁰ ኔን ሳኣ ዝኖ ያዳ፤ ታን ታ ሁጲያዉ ብያሳኣ ኤረናን ደኣደ፥ ኔና ሀቼ ዋታደ ታናና ዩሾ? ጉየ ስማ፤ ነ ጋደ አሳቱዋካ ኔናና አፋ። ጾሳይ ነዉ ኬኮነ አማነቶ!” ያጌዳ።

²¹ እታይ ካትያ፥ “መና ጎዳይ ኤሮ! ታ ጎዳይ ካቲ ኤሮ! ታ ጎዳይ ካቲ ደእያ ሳኣን ሀቃን ግድናካ፥ እ ታዉ ሀይቆ ግድና፥ ፓጻ ግድናካ፥ ታን ነ ቆማይ ኔናና ደአና” ያጌዳ።

²² ዳዊተ እታያ፥ “ሎአ! ባደ ሳልፓ” ያጌዳ፤ ግታትያ እታይ ባረ አሳቱዋ ኡባናነ ባረ ሶ አሳ ኡባና ሳልፔዳ።

²³ ሄ ኡባ አሳይ አሽን፥ ሄ ጋደ አሳይ ኡባይ ባረንቱ ቃላ ቂሲደ ዬኬድኖ፤ ካቲ ቀድሮና ሻፋ ፕኔዳ፤ አሳይ ኡባይካ ባዙዋ ስሚደ ቤዳ።

²⁴ ቄስያ ጻዶቅካ ሄ ሳኣን ደኤ፤ ጾሳ ቃላ ጫቁዋ ታቦታ ቶክያ ሌዋቱካ አናና እትፐ ደኢኖ። አሳይ ኡባይ ካታማፐ ከስ ዉራና ጋካናዉ፥ ጾሳ ታቦታ ቢታን ዎና፥ ቄስያ አብያታረ ያርሹዋ ያርሼዳ።

²⁵ ሄዋፐ ጉይያን ካቲ ጻዶቃ፥ “ጾሳ ታቦታ ካታማ ጉየ አፋ። መና ጎዳይ ታናን ናሸትያዋ ግዶፐ፥ ታና እ ዛረ አሂደ፥ ባረ ታቦታነ ባረ ደእያ ሳኣ ላኤንዋ በሳና።

²⁶ ሽን እ፥ ታን ኔናን ናሸትከ ጎፐ፥ ‘እ ባረና ሎእያዋ ኦ፤’ ታን ሀዋን ደአይ” ያጌዳ።

²⁷ ቃይካ ካቲ ቄስያ ጻዶቃ፥ “ስሳ፤ ኔን ነ ናኣ አህማኣጻነ አብያታራ ናኣ ዮናታና አኬዳ ካታማ ሳሮ ባ።

²⁸ ህንተንቱ ታና ኤርሳናዉ ቃላ ኪታና ጋካናዉ፥ ታን ዎራን ደእያ ሻፋ ፕኑዋን ደአሻና” ያጌዳ።

²⁹ ሄዋ ድራዉ፥ ጻዶቅነ አብያታረ ጾሳ ታቦታ የሩሳላመ ጉየ አፌድኖ፤ ያን ደኤድኖ።

³⁰ ሽን ዳዊተ ዬኪደ ዳብረ ዛይተ ፑደ ከሴዳ። እ ካዮ ባረ ሁጲያ ጉሎት ኡቴዳ፤ እ መላ ገድያን ሀመቴዳ፤ አናና ደእያ አሳቱካ ጉሎት ዬኪደ ፑደ ከሴድኖ።

³¹ አሳይ ዳዊታው፥ “አክጾፌልካ አበሰሎማና ማቀትያዋንቱ ግዶን ደኤ” ያጊደ ኦዴድኖ። ዳዊተ፥ “አቤት መና ጎዳዉ፥ አክጾፌላ ዞርያ ኤያተዉ ላማ” ያጊደ ዎሴዳ።

³² ዳዊተ አሳይ ጾሳዉ ጎይንያ ሳኣ፥ ደርያ ሁጲያ ጋኬዳ ዎደ፥ አርክያ ሁሻይ ካዮ ባረ ማዩዋ ፔደ፥ ባረ ሁጲያንካ ባና ቆሊደ፥ ዳዊታና ጋከታናዉ ዬዳ።

³³ ዳዊተ አ፥ “ኔን ታናና ብያዋ ግዶፐ፥ ኔን ታዉ ቶኮ ከሳና።

³⁴ ሽን ኔን ካታማ ጉየ ስማደ አበሰሎማ፥ ‘ካትያዉ፥ ታን ነ ቆማ ግዳና፤ ሀዋፐ ካሰ ነ አዉዋ ቆማ ግዴዳዋዳንካ ነዉካ ቆማ ግዳና’ ያጎፐ፥ አክጾፌላ ዞርያ ሀልሳደ ታና ማዳና።

³⁵ ቄሳቱ ጻዶቅነ አብያታረ ኔናና ያን እትፐ ደአናዋ ግድክኖ? ኔን ካትያ ሶን ስስያዋ ኡባ ኡንቱንቶ ኦዳ።

³⁶ ጻዶቃ ናኣ አህማኣጽነ አብያታራ ናኣ ዮናታን ያን ኡንቱንቱና ደኢኖ፤ ኔን ስስያዋ አያነ ኡንቱንቱ ቦላ ታዉ ኪታ” ያጌዳ።

³⁷ አበሴሎም የሩሳላመ ገልሽን፥ ዳዊታ ላጊ ሁሻይካ ካታማ ጋኬዳ።