2 Sammeela 14 - ጌሻ ማጻፋ

አበሴሎም የሩሳላመ ስሜዳ

¹ ጻሩይ ናአይ እዮኣበ ካቲ ዳዊተ አበሰሎማ ላሞቴዳዋ ኤሬዳ።

² ሄዋ ድራዉ፥ ዮኣበ ታቆአ ካታማ ኪቲደ፥ ያፐ እት ኤራንቻ ምሽራቶ አህሲደ እዞ፥ “ኔን ካዮትያ አሳዳን ሀና፤ ካዩዋ ማዩዋ ማያ፤ ሽጭስያዋ ኦከቶፓ፤ ዳሮ ዎደፐ ዶሚደ፥ ሀይቄዳ አሳዉ ካዮትያ ማጫ አሳዳን ሀና።

³ ያታደ ካትያኮ ባደ ሀ ቃላቱዋ አዉ ኦዳ” ያጌዳ። እዮኣበ አ ካትያዉ ኦዳናዋ እዝዉ ኦዴዳ።

⁴ ታቆአ ካታማ ምሽራታ ካትያኮ ቤዳ ዎደ፥ ቢታን ግሳ ጉፋናደ፥ “ካትያዉ፥ ታና ማዳርኪ!” ያጋዱ።

⁵ ካቲ እዞ፥ “ኔና አዬ መቴዳዌ?” ያጊደ ኦቼዳ። እዛ፥ “ታን አስናይ ሀይቄዳ ማጫ አሳ።

⁶ ታዉ ነ ቆማትዉ ላኡ አቱማ ናናይ ደኢኖ። ኡንቱንቱ እቱ እቱዋና ደምባን ዋቴድኖ፤ ኡንቱንታ ሻካናዉ እት አሳይነ ይና፥ እቱ የንኩዋ ሾጪደ ዎዳ።

⁷ ሀእ ታ ዳቦቱ ኡባይ ታ ቦላ ደንዲደ፥ ‘ባረ እሻ እ ዎዳ ድራዉ፥ ኑን አ ዎናዳን ባረ እሻ ዎዳዋ ኑዉ ሀማ፤ ያቲደ ኑን ላትያዋ ይሳና ያጌድኖ።’ ያቶፐ፥ ኡንቱንቱ ታዉ ላታዉ አቴዳ እት ጺፋ ቶይሲኖ፤ ታ አስና ሱንካ አ ዘረ ቢታፐ ይሲኖ” ያጋዱ።

⁸ ካቲ ሄ ምሽራቶ፥ “ነ ሶ ባ፤ ታን ነዉ አዛዛና” ያጌዳ።

⁹ ሽን ታቆአ ካታማ ምሽራታ ካትያ፥ “ታ ጎዳዉ ካትያዉ፥ ጎሚ ታናነ ታ አዉዋ ጎልያ አሳ ኦይቆ፤ ሽን ካቲነ አ ካዉተ አራታይ ጌሻ ግዶ” ያጋዱ።

¹⁰ ካቲ ምሽራቶ፥ “ነ ቦላ ቃላ ቃትያ ኦናነ ታኮ አሀ፤ እ ኔና ላኤን ቦቼና” ያጌዳ።

¹¹ ምሽራታ ካትያ፥ “ሱ አችያዌ ባሻ ቦላ ባሻ ጉጀናዳንነ ታ ናኣካ ዎናዳን ካቲ መና ጎዳ ባረ ጾሳ ሱንን ታዉ ጫቆ” ያጋዱ። ካቲ እዞ፥ “መና ጎዳይ ኤሮ! ነ ናኣ ሁጲያ ብናናፐ እቱካ ቢታን ዎና” ያጌዳ።

¹² ሄዋፐ ጉይያን፥ ምሽራታ ካትያ፥ “ታ ጎዳ ካትያዉ ታን እት ቃላ ሃሳያይ” ያጋዱ። ካቲ፥ “ሃሳያ” ያጌዳ።

¹³ ሄ ምሽራታ ካትያ፥ “ያትና፥ ኔን ጾሳ አሳ ቦላ ሀዋ ማላ አያዉ ኦዲ? ካቲ የደርሰዳ ባረ ናኣ ጉየ ዛርቤና ድራዉ፥ ባረ ሃሳዬዳ ቃላዉ ካቲ ባይዛንቻ ግደኔ?

¹⁴ ኑን ኡባይ ሀይቃና፤ ቢታን ጉኬዳ ሃይ ስመናዋዳን፥ ኑን ላኤን ስሞኮ። ሽን ጾሳይ ቦሄቴዳ አሳይ ኡባካ የና ማላ፥ አዉ ኦግያ ጊግሴፐ አትና፥ እ ጮ ያናዳን ኮየና።

¹⁵ “ታና አሳይ ያሽስያ ድራዉ፥ ታ ጎዳዉ ካትያዉ ታን ሀዋ ኦዳናዉ ሀእ ያድ። ታን ነ ቆማታ፥ ‘ታን ካትያዉ ሃሳያና፤ ኦን ኤሪ፥ ታን አ ቆማታ ኦችያዋ ካቲ ፖላነንቶነ፤

¹⁶ ጾሳይ ኑዉ እሜዳ ላታፐ ታናነ ታ ናኣ ይሳናዉ ኮይያ አሳ ኩሽያፐ ካቲ ስሲደ አሻነንቶነ’ ያጋደ ቆፓይ።

¹⁷ ቃይካ ታን ነ ቆማ፥ ‘ሎኡዋነ ኢታ ሻካናዉ ታ ጎዳይ ካቲ ጾሳ ኪታንቻ ማላ ግድያ ድራዉ፥ ታ ጎዳ ካትያ ቃላይ ታና ዎፕሶ። መና ጎዳይ ነ ጾሳይ ኔናና ግዶ’ ያጋይ” ያጋዱ።

¹⁸ ካቲ ምሽራትዉ፥ “ታን ኔና ኦቻና ሀንያባ ዛሩዋ ኔን ታፐ ቆሶፓ” ያጌዳ። ምሽራታ፥ “ታ ጎዳይ ካቲ ሃሳዮ” ያጋዱ።

¹⁹ ካቲ ምሽራቶ፥ “ሄዋን ኡባን እዮኣባ ኩሺ ኔናና ደኢ?” ያጊደ ኦቼዳ። ምሽራታ፥ “ታ ጎዳዉ ካትያዉ፥ ነ ሸምፑ ኤሮ! ኔን ታ ጎዳይ ካቲ ሃሳዬዳ ኡባባፐ ኡሸቻ ዎይ ሀድርሳ ጋናዉ ዳንዳይያ እት አስካ ባዋ። ኤ፤ ሀዋ ታና አዛዜዳዌ፥ ታ ዶናን፥ ነ ቆማት ዶናን ሀዋ ዎዳዌ ነ ቆማ እዮኣባ።

²⁰ ሀእ ደእያ ሀኖታ ላማናዉ ነ ቆማይ እዮኣበ ሀዋ ኦዳ። ጾሳ ኪታንቻዉ ደእያ አዳ ኤራ ማላይ ታ ጎዳዉ ደኤ፤ ቢታን ሀንያዋ ኡባባ እ ኤሬዳ” ያጋዱ።

²¹ ካቲ እዮኣባ፥ “ዳሮ ሎአ! ታን ሀዋ ኦና! ባ፤ ሄ ያላጋ ብታንያ አበሰሎማ አካደ ያ” ያጌዳ።

²² እዮኣበ ካትያ ስንን ግስ ጉፋኒደ፥ ካትያ ሀዋዳን ያጊደ አንጄዳ፤ “ታ ጎዳዉ ካትያዉ፥ ነ ስንን ናሸቴዳዋ ነ ቆማይ ሀቼ ኤሬዳ፤ አያዉ ጎፐ፥ ካቲ ባረ ቆማይ ኦቼዳዋ ስሴዳ” ያጌዳ።

²³ ሄዋፐ ጉይያን፥ ዮኣበ ደንዲደ ጋሹራ ጋድያ ቢደ አበሰሎማ የሩሳላመ አክ ዬዳ።

²⁴ ሽን ካቲ፥ “እ ባረ ሶ ባናዉ በሰ፤ እ ታ ዴሙዋ በኦፖ” ያጌዳ፤ አበሴሎም ባረ ሶ ቤዳ፤ ካትያ ዴሙዋካ በእቤና።

ዳዊተ አበሴሎማና ስገቴዳ

²⁵ እስራኤልያ ኡባ ግዶን ማላ ሎኡነ አበሴሎማዳን ሳበቴዳ እት አሳይነ ባዋ። አ ሁጲያፐ ቢደ ገድያ ጹጉንይ ጋካናዉካ አን ካያባይ ባዋ።

²⁶ እ ባረና ዴጽያ ዎደ ባረ ሁጲያ ብናና ቃንጽሴ፤ ባረ ሁጲያ ብናና ቃንጽስያ ዎደ ኡባን ሚዛንያን ዎደ ማዛኔ፤ ካትያ ሚዛና ልክያን ላኡ ክሎነ ሄዙ ጼቱ ግራምያ ዴጼ።

²⁷ አበሰሎማዉ ሄዙ አቱማ ናናይነ እት ማጫ ናታ የለቴድኖ፤ ማጫ ናት ሱንይ ታማሮ፤ ሄ ናታ ማላ ሎኦ ማጫ አሳ ግዳዱ።

²⁸ አበሴሎም ላኡ ላይ ኩመን ካትያ ዴሙዋ በኤናን የሩሳላመን ደኤዳ።

²⁹ “ታን ኔና ካትያኮ ኪታና ማላ፥ ታኮ ሃያ” ያጊደ አበሴሎም እዮኣባዉ ኪቴዳ፤ ሽን እዮኣበ ዬናን እጼዳ። ላኤንዋካ ኪቴዳ፤ ሽን እዮኣበ አኮ ዬናን እጼዳ።

³⁰ ሄዋፐ ጉይያን፥ አበሴሎም ባረ ቆማቱዋ፥ “ስስተ! ታ ጎሻ ማታን እዮኣባዉ ጎሻይ ደኤ፤ አዉ ሄዋን ባንጋይ ደኤ። ቢደ ታማ ኦይተ” ያጌዳ። አበሰሎማ ቆማቱ እዮኣባ ባንጋ ታማ ኦይድኖ።

³¹ ያትና፥ እዮኣበ ደንዲደ፥ አበሰሎማ ሶ ቢደ “ነ ቆማቱ ታ ባንጋ አያዉ ታማ ኦይድኖ?” ያጌዳ።

³² አበሴሎም እዮኣባ፥ “ኔን ታን ኪትና ዬናን እጼዳ ድራሳ። ኔን ካትያኮ ባደ፥ ‘አበሰሎም ሀዋዳን ያጌ፤ “ታን ጋሹራ ጋድያፐ አያዉ ያድታ? ታን ሀኖ ጋካናስካ ያን ደኤዳዋ ግድንቶ ታዉ ሎአ ሽን” ያጌ’ ጋደ ታዉ ኦቻናዳን ኮያድ። ሀእካ ታን ካትያ ዴሙዋ በአናዉ ኮያድ፤ ታን ባይዛንቻ ግዶፐ፥ እ ታና ዎ” ያጌዳ።

³³ እዮኣበ ካትያኮ ቢደ፥ አበሴሎም ጌዳዋ ኦዴዳ። ካቲ አበሰሎማ ጼስስና አበሴሎም ሶ ገሊደ፥ ካትያ ስንን ሳኣን ግሲደ ጎይኔዳ፤ ያትና፥ ካቲ አበሰሎማ የሬዳ።