2 Oduwaa 9 - ጌሻ ማጻፋ

ሳባ ካታቶ

¹ ሳባ ካታታ ሶሎሞነ ዋርያ ስሳደ፥ ዴጾ ኦሻቱዋ አካደ፥ አ ፓጫናዉ ደንዳዱ። ደንዳደ ሳዉዋ፥ ሎይ ዳሮ ዎርቃነ አልኦ ሹቻ ጫነቴዳ ዳሮ ጋሎቱዋ ጩጉዋና ሎይ ዳሮ አጃባና የሩሳላመ ጋካደ፥ ሶሎሞነ ስን አአዱ። ባረ ዎዛናን ደእያዋ ኡባ ሶሎሞናዉ ኦዳዱ።

² ሶሎሞነ እዛ ኦቼዳዋ ኡባ ኦዴዳ፤ እ እዝዉ ብርሸናን አፐ ጌም አቴዳባይ አያይነ ባዋ።

³ ሳባ ካታታ ሶሎሞነ አዳ ኤራ፥ እ ኬጼዳ ካትያ ጎልያ፥

⁴ አ ማዳን ሺቅያ ቁማ፥ አ ኦሳንቻቱ ኡትያ ኡተ፥ አ ካልያዋንቱ ኦያ ኦሱዋነ ማይያ ማዩዋ፥ አ ኤሳ ትግያዋንቱ ማይያ ማዩዋነ መና ጎዳ ጌሻ ጎልያን እ ጹግያ ያርሹዋ በኤዳ ዎደ፥ እ ዎዛናይ ጋገቴዳ።

⁵ ሄዋፐ ጉይያን፥ አ ካትያ፥ “ነዋነ ነ አዳ ኤራተባ ታን ታ ጋደን ደኣደ ስሴዳዌ ቱማ።

⁶ ሽን ታን ያደ ታ አይፍያ ብራናን በአና ጋካናዉ፥ ኡንቱንቱ ታዉ ኦዴዳዋ አማናበይከ። ነ አዳ ኤራ ግታተዉ ባካነ ታዉ ኦድበይክኖ፤ ታን ስሴዳዋፐ ኔን ሎይ ቃሳ።

⁷ ኡባ ዎደ ነ ስንን ኤቂደ፥ ነ አዳ ኤራ ስስያ ነ አሳቱነ ነ ኦሳንቻቱ አያ ቃደተድኖሻ!

⁸ ኔናን ናሸቲደ፥ ኔና ባረ ካዉተ አራታን ኡትሴዳ መና ጎዳይ ነ ጾሳይ ጋላተቶ! ነ መና ጎዳይ እስራኤልያ አሳ ሲቄዳ ድራዉነ መናዉ ሎይ ኤሳናዉ ኮዮዋ ድራዉ፥ ኔን ሱረ ፕርዳነ ጽሎተ ኦና ማላ፥ እ ኔና ኡንቱንቱ ቦላ ካተዬዳ” ያጋዱ።

⁹ ያጋደ ካታታ 4,000 ኪሎ ግራመ ዴጽያ ዎርቃ፥ ሎይ ዳሮ ሳዉዋነ አልኦ ሹቻ ካትያዉ እማዱ፤ ሳባ ካታታ ካትያ ሶሎሞናዉ እሜዳ ሳዉዋ ማላትያ ሳዉ ኡባካ ባዋ።

¹⁰ (ኦፊራፐ ዎርቃ አሄዳ፥ ኪራማ አሳቱነ ሶሎሞነ አሳቱ ያፐካ ሳንዳለ ግያ ምነ አልኦ ሹቻ አሄድኖ።

¹¹ ካቲ ሶሎሞነ ሄ ሳንዳልያፐ መና ጎዳ ጌሻ ጎልያ፥ ካትያ ጎልያ ገልያ ሳአዉ ድቱዋነ ማዝሙርያ የጽያዋንቶ ማስንቁዋነ ዲ መሴዳ። ሄዋ ማላትያባይ ይሁዳ ቢታን ካሰ ቤት ኤረና።)

¹² ካቲ ሶሎሞነ ሳባ ካታታ አሞታደ አ ኦቼዳዋ ኡባ እዝዉ እሜዳ። አ አዉ አሄዳዋፐ ዳሩዋ እ እዝዉ እሜዳ። ሄዋፐ ጉይያን፥ ሳባ ካታታ ባረ አጃባና ደንዳደ፥ ባረ ጋድያ ስማዱ።

ሶሎሞነ ዱረታ

¹³ ሶሎሞነ ላይን ላይን አክያ ዎርቃይ ላታማነ ሄዙ ሻአ ኪሎ ግራመ ዴጽያዋ።

¹⁴ ሄዌ ዛልአንቻቱዋፐ አኬዳ ቃራጻነ አራባ ጋድያ ካተቱዋ ኡባፐነ እስራኤልያ ጋድያ ሞድያዋንቱፐ አኬዳ ዎርቃነ ብራ ጉጀናና።

¹⁵ ካቲ ሶሎሞነ ላኡ ጼቱ ዎጋ ጎንዳለቱዋ ቆጼዳ ዎርቃፐ መሴዳ፤ እት እት ጎንዳልያን ላፑን ኪሎ ግራመ ግድያ ዎርቃይ ገሌዳ።

¹⁶ ቃይካ እ ሄዙ ጼቱ ቄር ጎንዳለቱዋ ቆጼዳ ዎርቃፐ መሴዳ፤ እት እት ቄር ጎንዳልያን ላኡ ኪሎ ግራመ ግድያ ዎርቃይ ገሌዳ። ካቲ ሄ ጎንዳለቱዋ ሊባኖሳ ዎራ ጎልያ ጌተትያ ጎለን ዎዳ።

¹⁷ ቃይካ ካቲ ዳንጋርሳ ዛልያፐ እት ዎልቃማ ካዉተ አራታ መሴዳ፥ ጌሻ ዎርቃን ሼሼዳ።

¹⁸ ካዉታ አራታይ ደእያ ሳኣ ፑደ ከሳናዉ የያ ኡሱፑን ድቱ ደኢኖ። ገድያን የናዉ ካዉተ አራታና ጋደ፥ ዎርቃፐ ኦዳ ኦይዲ ደኤ። አራታዉ ላኡ ባጋናካ ቀስያ ዘምፕስያ ሳአቱ ደኢኖ፤ ሄ ላኡ ሳአቱ ላንቂያንካ ያ ባጋናነ ሀ ባጋና ኤቄዳ እት እት ጋሙዋ ምስሊ ደኤ።

¹⁹ ሄ አራታ ፑደ ከስያ ኡሱፑን ደቱዋን ያ ባጋናነ ሀ ባጋና እት እት ጋሙዋ ምስሊ፥ ኡባና ታማነ ላኡ ምስለቱ ደኢኖ። ሀዋ ማላ ካዉተ አራታይ ሀራ ካዉተን ሀቃንነ ኦሰትቤና።

²⁰ ካቲ ሶሎሞነ ኡሻ ኡሽያ ሚሻ ኡባይ ዎርቃፐ ኦሰቴዳ፤ ሊባኖሳ ዎራ ጎለን ደእያ ሻሉዋ ኡባይካ ሙሩታ ዎርቃፐ ኦሰቴዳ። ሶሎሞነ ዎደ ብራይ ኡባካ ጎእያባዳን ፓይደት ኤረና።

²¹ ካትያዉ ኪራማ ማርካባቱዋና ዛልእያ ዎልቃማ ማርካባቱ አባን ደኢኖ። ሄ ማርካባቱ ዎርቃነ ብራ፥ ዳንጋርሳ አቻ፥ ቃረቱዋነ ገለሾቱዋ ጫን አኪደ፥ ሄዙ ላይፐ እት ገደ ስሚኖ።

²² ካቲ ሶሎሞነ ዱረተንነ አዳ ኤራተን ሳኣን ደእያ ካተቱዋ ኡባፐ ዳሬ።

²³ ሳኣን ደእያ ካተቱ ኡባይ አ ስን አናዉነ ጾሳይ አ ዎዛናን ዎዳ አዳ ኤራ ስሳናዉ ኮይኖ።

²⁴ ላይፐ ላይን ይያ ኡባይ አዉ እማናዉ ዎርቃነ ብራ ሚሻቱዋ፥ ማዮቱዋ፥ ኦላ ሚሻቱዋነ ሳዉዋ፥ ፓራቱዋነ ባቁሎቱዋ አኪደ ዬ።

²⁵ ሶሎሞናዉ ፓራቶነ ጋረቶ 4,000 ጋጻታይ ደኤ፤ ቃይ 12,000 ፓራቱ አዉ ደኢኖ። ሶሎሞነ ሄዋንታ ፓራ ጋረቱዋ ካታማቱዋንነ ባረናና የሩሳላመን ዎዳ።

²⁶ ሶሎሞነ ኤፍራጺሳ ሻፋፐ ዶሚደ፥ ፕልስጼማ ጋድያነ ግብጼ ዛዋ ጋካናዉ ደእያ ካተቱዋ ኡባ ሞዴዳ።

²⁷ ካቲ የሩሳላመን ብራይ ሹቻዳን ኬለታናዳን፥ ዝጋይካ ጋን ድጭያ ኤዳን ጮራታናዳን ኦዳ።

²⁸ ሶሎሞናዉ ፓራቱዋ ግብጼፐነ ሀራ ቢታ ኡባፐ አሂኖ።

ሶሎሞነ ሀይቁዋ

²⁹ ኮይሮፐ ዉርሰ ጋካናዉ ሶሎሞነ ሀኔዳ ሀራባይ ትምቢትያ ኦድያ ናታና ታርክያ ማጻፋን፥ ሴሎፐ ዬዳ አኪይ ትምቢትያ ኦዴዳ ማጻፋንነ ናባጻ ናኣ እዮርባማዋ ትምቢትያ ኦዴዳ እዱ በኤዳ ሳፃ ማጻፋን ጻፈት ኡቴዳ።

³⁰ ሶሎሞነ እስራኤልያ ኡባ ቦላ የሩሳላመን ኦይታሙ ላይ ካተቴዳ።

³¹ ሄዋፐ ጉይያን፥ ሶሎሞነ ሀይቂደ፥ ባረ ማይዛን ጋከቴዳ፤ ባረ አዉዋ ዳዊታ ካታማን ሞገቴዳ። አ ናአይ ሮብኣመ አ ኮታን ካተቴዳ።