2 ካታቱዋ 16 - ጌሻ ማጻፋ

ይሁዳ ካትያ አካዛ

¹ ራማልያ ናአይ ፓቁህ ካተቴዳ ታማነ ላፑን ላይን፥ እዮኣታማ ናአይ አካዝ ይሁዳን ካተቴዳ።

² እ ካተትያ ዎደ ላይይ አዉ ላታማ፤ የሩሳላመን እ ታማነ ኡሱፑን ላይ ካተቴዳ። አ ማይዛ አዉ ዳዊተ ሱረባ ኦዳዋዳን፥ መና ጎዳ ባረ ጾሳ ስንን እ ሱረባ ኦቤና።

³ እ ካሰ ደኤዳ እስራኤልያ ካተቱዋ ኦግያን ሀመቴዳ። ቃይ መና ጎዳይ እስራኤልያ አሳ ስንፐ ላጊደ ከሴዳ አሳቱ ደኡዋ ዎጋ፥ ሄ ሸነይያዋ ቁሊደ፥ ባረ የሌዳ ናኣ አዳ ታማን ጹጊደ፥ ኤቃዉ ያርሼዳ።

⁴ አካዝ አሳይ ጎይንያ ቃ ድራዉነ፥ ደረቱዋ ሁጲያንነ ዳሻ ም ኡባ ጋርሳን ያርሹዋ ያርሼዳነ እጻና ጩዋዬዳ።

⁵ ሄዋፐ ጉይያን፥ ሶርያ ካቲ ራጺንነ ራማልያ ናአይ፥ እስራኤልያ ካቲ ፓቁህ የሩሳላመ ኦላናዉ ዪደ ዶዴድኖ፤ ሽን አካዛ ጾናናዉ ዳንዳይበይክኖ።

⁶ ሄ ዎደ ሶርያ ካቲ ራጺን ኤላታ ግያ ካታማ ዛሪደ አኪደ፥ ይሁዳ አሳ ላጊደ ከሴዳ። ያትና ኤዶማ አሳቱ ኤላታ ካታማ ዪደ፥ ሀቼ ጋካናዉ ያን ደኢኖ።

⁷ ሄዋ ድራዉ፥ አካዝ አሶረ ካትያ ትግላት-ፓለሴራዉ ኪታ የዲደ፥ “ታን ነ ናኣነ ነ ቆማ። ሀያና ሃያ፤ ታና ኦልያ ሶርያ ካትያ ኩሽያፐነ እስራኤልያ ካትያ ኩሽያፐ ታና አሻ” ያጌዳ።

⁸ ቃይ አካዝ መና ጎዳ ጌሻ ጎልያንነ ካትያ ጎልያ ሚሻ ምንጅያሳን ደእያ ብራነ ዎርቃ አኪደ፥ አሶረ ካትያዉ እሞ ኦደ የዴዳ።

⁹ አካዝ ጌዳዋ አሶረ ካቲ ማዪደ፥ ዳማስቆ ካታማ ኦለቲደ ኦይቄዳ። አሳ ኦሞዲደ፥ ቂራ ግያ ሳኣ አፌዳ፤ ካትያ ራጺናካ ዎዳ።

¹⁰ ሄዋፐ ጉይያን፥ ካቲ አካዝ አሶረ ካትያ ትግላት-ፓለሴራና ጋከታናዉ ዳማስቆ ቤዳ። ዳማስቆን ደእያ ያርሽያ ሳኣ በኢደ አ ማላትያ ያርሽያ ሳኣ ኬጻና ማላ፥ ሄ ያርሽያ ሳኣ ምስልያነ ኬጽያ ሀኖታ ቄስያ ኦርዮናዉ ኪቴዳ።

¹¹ ሄዋ ድራዉ፥ ካቲ አካዝ ዳማስቆፐ ስሚደ ያናዉ፥ ቄስያ ኦርዮን ሄ ሌምሱዋ ማላትያ ያርሽያ ሳኣ ጊግሴዳ።

¹² ካቲ ዳማስቆፐ ስሜዳ ዎደ፥ ያርሽያ ሳአይ ኦሰቲደ ፖለቴዳዋ በእ ያርሽያ ሳኮ ሺቂደ፥

¹³ ባረ ጹግያ ያርሹዋነ ባረ ካ ያርሹዋ ያርሼዳ። ቃይ ባረ ኡሻ ያርሹዋ ጉሴዳ፤ ባረ እትፐተ ያርሹዋ ሱካ ያርሽያ ሳኣ ቦላ ጫጫፌዳ።

¹⁴ ናሃስያ ግያ ብራታፐ ኦደ፥ መና ጎዳዉ ዱማይ ዎዳ ያርሽያ ሳአይ ኦራ ያርሽያ ሳፐነ ጌሻ ጎልያፐ ግዱዋን ደኤ። ያትና አካዝ ሄ ኤጫ ያርሽያ ሳኣ ደንደ፥ ባረ ኦስሴዳ ኦራ ያርሽያ ሳፐ ሁጲሳ ባጋና ዎዳ።

¹⁵ ሄዋፐ ጉይያን፥ ካቲ አካዝ ቄስያ ኦርዮና ሀዋዳን ያጊደ አዛዜዳ፤ “ሀ ዎጋ ኦራ ያርሽያ ሳኣ ዎንታ ጹግያ ያርሹዋ፥ ኦማርስ ሺሽያ ካ ያርሹዋ፥ ካቲ ሺሽያ ጹግያ ያርሹዋነ ካ ያርሹዋ፥ አሳይ ኡባይ ሺሽያ ጹግያ ያርሹዋ፥ ኡንቱንታ ካ ያርሹዋነ ኡንቱንታ ኡሻ ያርሹዋ ያርሽያ ሳኣ ኦ። የንኮ ናሃስያፐ መቴዳ ያርሽያ ሳኣ ታን ታዉ ኦችያ ሳኣ ከሳና” ያጌዳ።

¹⁶ ቄስያ ኦርዮን ካቲ አካዝ አዛዜዳዋዳን መዳ።

¹⁷ ካቲ አካዝ ጌሻ ጎልያ ግዶን ጎኤትያ፥ ናሃስያ ብራታፐ መቴዳ ጋረቱዋ ሎቻ ብራታ ቃንጺደ፥ ምይያፐ ድጊደ ሜጨትያ ከረቱዋ ጋረቱዋ ቦላፐ ደንዳ። ቃይ አባ ሳኒያ፥ አ ዘምፕሴዳ ናሃስያ ቦራቱዋ ምስለቱዋ ቦላፐ ደንደ፥ ሹቻ ባሱዋ ቦላ ዎዳ።

¹⁸ አሶረ ካትያ ድራዉ፥ አካዝ ባረ ካዉተ አራታ ካሰ ዎያ ሳፐ ድጌዳ። ቃይ አፐ ካሰ ደኤዳ ካተቱዋ መና ጎዳ ጌሻ ጎልያ ገልያ ፐንግያ ጎርዴዳ።

¹⁹ ካቲ አካዝ ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ።

²⁰ አካዝ ሀይቂደ፥ ባረ ማይዛን ጋከቴዳ፤ ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ህዝቂያሰ ካተቴዳ።