1 Sammeela 28 - ጌሻ ማጻፋ

ሳኦላነ ኤንዶረ ሻሬቻቶ

¹ ሄ ዎደ ፕልስጼማ አሳቱ እስራኤላቱዋ ኦላናዉ ባረንቱ ኦላንቻቱዋ ሺሼድኖ። አኪሽ ዳዊታ፥ “ኔንነ ነ አሳቱ ታናና ኦላ ባናዋ ቱሙ ኤራ ኡታ” ያጌዳ።

² ዳዊተ፥ “ሄዋ ግዶፐ፥ ታን ነ ቆማይ ኦናባ ኔን በአና” ያጌዳ። አኪሽ፥ “ዳሮ ሎአ፤ ታን ኔና ታ ደኤዳ ላይ ኡባን ታና ናግያዋ ከሳና” ያጌዳ።

³ ሀዋፐ ካሰ ባጋን ሳመል ሀይቂና፥ እስራኤልያ አሳቱ ኡባቱ አዉ ዬኪደ፥ አ ካታማን ራማን አ ሞጌድኖ። ሳኦል ሞይትልያ ጼስያዋንታነ ሻሬቻቱዋ እስራኤልያ ቢታፐ የደርሲደ ከስ ድጌዳ።

⁴ ፕልስጼማ ኦላንቻቱ ሺቂደ ዪደ፥ ሹኔማ ካታማን ኡቴድኖ፤ ሳኦለካ እስራኤልያ አሳ ኡባ ሺሺደ፥ ግልቦአ ደርያን ኡቴዳ።

⁵ ሳኦል ፕልስጼማ ኦላንቻቱዋ በኢደ ያዬዳ፤ አ ዎዛናይካ ሎይ ዳጋሜዳ።

⁶ ሄዋ ድራዉ፥ እ አይ ኦነንቶነ መና ጎዳ ኦቼዳ፤ ሽን መና ጎዳይ አኩሙዋን ግዲና፥ ዎይ ኡሪምያን ግዲና፥ ዎይ ትምቢትያ ኦድያዋንቱ ባጋና ግዲና፥ አዉ ኦድቤና።

⁷ ሄዋፐ ጉይያን፥ ሳኦል ባረ ቆማቱዋ፥ “ሞይትልያ ጼስያ ሻሬቻቱዋ ታዉ ኮይተ፤ ታን ኢኮ ባደ እዞ ኦቻና” ያጊደ አዛዜዳ። ሳኦላ ቆማቱ፥ “ሞይትልያ ጼስያ እት ሻሬቻታ ኤንዶረን ደአዉ” ያጌድኖ።

⁸ ሳኦል ባረና ኤርሰና ማላ ሀራ ማዩዋ ማዪደ፥ ላኡ አሳቱዋ አኪደ፥ ቃማ ሄ ሻሬቻትኮ ቤዳ፤ ምሽራቶ፥ “ሀያና ታዉ እት ሞይትልያ ጼሳርኪ፤ ታን ሱን ኦድያ አሳ ታዉ ደንርኪ” ያጌዳ።

⁹ ሄዋፐ ጉየ ምሽራታ፥ “ሞይትልያ ጼስያዋንታነ ሻሬቻቱዋ እስራኤልያ ቢታፐ ሳኦል ዎት የደርስ ከሴደንቶ፥ ቱማ ኔን ኤራሳ። ታና ዎሳናዉ ኔን ታዉ አያዉ ጲርያ የጋይ?” ያጋዱ።

¹⁰ ሳኦል ምሽራቶ፥ “መና ጎዳይ ኤሮ! ኔን ሀዋ ድራዉ ሙሬታካ” ያጊደ መና ጎዳን ጫቄዳ።

¹¹ ያትና፥ ምሽራታ፥ “ታን ነዉ ኦና ደን?” ያጋደ ኦቻዱ። ሳኦል፥ “ሳመላ ታዉ ደን” ያጌዳ።

¹² ሻሬቻታ ሳመላ በኣደ፥ ዋሱዋ ጹላዱ፤ ሳኦላ፥ “ኔን ታና አያዉ ጭማድ? ኔን ሳኦላ ግድኪ!” ያጋዱ።

¹³ ካቲ፥ “አይነ ባዋ፤ ያዮፓ! ነዉ አዬ ቤትያዌ?” ያጌዳ። ምሽራታ፥ “እት ሞይትሊ ቢታ ግዶፐ ከስያዌ ቤቴ” ያጋዱ።

¹⁴ ሳኦል ምሽራቶ፥ “እ አይ ማላቲ?” ያጌዳ። ምሽራታ፥ “አፍላ ማዬዳ እት ጭማ ብታኒ ከሴዳ” ያጋዱ። ሳኦል ሄ ብታኒ ሳመላ ግዴዳዋ ኤሪደ፥ አ ስንን ሳኣን ግሲደ ጉፋኔዳ።

¹⁵ ሳመል ሳኦላ፥ “ታና ዱፉዋፐ ደንደ አያዉ ሻባራይ?” ያጌዳ። ሄዋፐ ጉየ ሳኦል፥ “ታን ዳሮፐ ኡንኤታድ፤ አያዉ ጎፐ፥ ፕልስጼማ አሳቱ ታና ኦሊኖ፤ ጾሳይካ ታፐ ሻከቴዳ፤ ትምቢትያ ኦድያዋንቱ ባጋና ግዲና ዎይ አኩሙዋን ግድና፥ እ ታን ኦችያዋ ኦደና። ሄዋ ድራዉ፥ ታን ኦናባ ኔን ታዉ ኦዳናዳን ኔና ጼሳድ” ያጌዳ።

¹⁶ ሳመል፥ “መና ጎዳይ ሻከቲደ ነ ሞርክያ ግድክቾዋፐ አትና፥ ታና አያዉ ዞረታ በሳይ?

¹⁷ መና ጎዳይ ታ ባጋና ካሰት ኦዴዳዋ ኦ ክቼዳ፤ መና ጎዳይ ካዉተ ኔፐ ቦንቂ አኪደ፥ ነ ሾሮ ዳዊታዉ እም ድጌዳ።

¹⁸ ኔን መና ጎዳዉ አዛዘታቤና ድራዉነ አ ሀንቁዋ ሱልያዋ አማሌቃ አሳቱዋ ቦላ ፖላቤና ድራዉ፥ መና ጎዳይ ሀቼ ሀ የዉዋ ነ ቦላ ኦ።

¹⁹ ኔናነ እስራኤልያ፥ መና ጎዳይ ፕልስጼማ አሳቶ አ እማና፤ ኔንነ ነ ናናይ ዎንት ታናን ጋከታናዉ፤ መና ጎዳይ እስራኤልያ ኦላንቻቱዋ ፕልስጼማ አሳቶ አ እማና” ያጌዳ።

²⁰ ሳኦል ሳመላ ኦዱዋ ስሲደ ያዬዳ ድራዉ፥ ኤለካ ቢታን ዶልጩ ጊደ ኩንድ አጌዳ። ሳኦል ሄ ጋላሳ ኩመንነ ቃማ ኩመን ቁማ ምቤና ድራዉ፥ አ ዎልቃይ እጼዳ።

²¹ ሄ ምሽራታ ሳኦላኮ ያደ፥ እ ሎይ ኮኮርያዋ በኣደ፥ “ታን ነ ቆማታ ነዉ አዛዘታድ፤ ኔን ታና ኦቼዳዋ ታ ሸምፑዋ አጋደ ኦድ።

²² ሀእ ታን ነ ቆማታ ግያዋ ሀያና ስሳ፤ ኔን ማደ፥ ምናደ ነ ኦግያ ባና ማላ፥ ታን ነዉ ጉ ቁማ አይ” ያጋዱ።

²³ ሄዋፐ ጉየ ሳኦል፥ “ሚከ” ያጊደ እጼዳ። ሽን አ አሳቱ ሄ ምሽራትናካ ግዲደ ሾቤድኖ፤ ሳኦል ሾበቲደ ቢታፐ ደንዲደ፥ ግሱዋን ኡቴዳ።

²⁴ ሄ ምሽራታ ኤለካ ባረ ሶን ደእያ ቦልትቦልታ ማራ ሹካ ባሻዱ፤ ልያ አካ ሙናቃደ፥ እርሹዋ የገናን ኡክ ኡካዱ።

²⁵ ያታደ ሳኦላዉነ አ አሳቶ አና፥ ኡንቱንቱ ሜድኖ። ሄ ጋላስ ቃማ ደንዲደ ቤድኖ።