1 Oduwaa 27 - ጌሻ ማጻፋ

እስራኤልያ አሳ ካለያዋንታ

¹ ባረንቱ ጩጉዋን ጩጉዋን ካዉተ አይሴዳ እስራኤልያ ጎልያ አሳቱዋ ካፓቱ፥ ሻኣ ካፓቱነ ጼቱዋ ካፓቱ ሀዋፐ ካሊደ ጻፈቴዳዋንታ። እት እት ጩጉዋን ላታማነ ኦይዱ ሻአ አሳቱ ደኢኖ። እት እት ጩጉ ላይ ግዶን እት እት አግናዉ ካላን ካላን ካዉተ ኪታ ኦናዉ ከሴ።

² ኮይሮ አግናን ከስያ ጩጉዋ ካለያዌ ዛብድኤላ ናኣ ያሾብኣማ፤ አ ጩጉዋን ላታማነ ኦይዱ ሻአ አሳይ ደኤ።

³ ያሾብኣም ፓሬሳ ዘረ፤ እ ኮይሮ አግናዉ ኦላንቻቱ ካፓቱዋ ጋዳዉዋ።

⁴ ላኤን አግናን ከስያ ጩጉዋ ካለያዌ አሆህያ ዶዳያ፤ አ ጩጉዋን ላታማነ ኦይዱ ሻአ አሳይ ደኤ። አፐ ካልያዌ ምቅሎታ።

⁵ ሄዛን አግናን ከስያ ጩጉዋ ካለያዌ ቄስያ ዮዳሄ ናኣ ባናያ፤ አ ጩጉዋን ላታማነ ኦይዱ ሻአ አሳይ ደኤ።

⁶ ባናይ ሀታሙ ኤረቴዳ አሳቱዋ ግዶን ምኖ አሳ ግዲደ፥ ሀታማቶ ካፖቴዳ። አ ሳኣን አ ናአይ አምዛባድ ካፖቴዳ።

⁷ ኦይደን አግናን ከስያ ጩጉዋ ካለያዌ ዮኣባ እሻ አሳሄላ፤ አ ጩጉዋን ላታማነ ኦይዱ ሻአ አሳይ ደኤ። አ ኮታን አ ናአይ ዛባደ ካፖቴዳ።

⁸ እቼሸን አግናን ከስያ ጩጉዋ ካለያዌ ይጽሃራ ያራፐ ሻምሁታ፤ አ ጩጉዋን ላታማነ ኦይዱ ሻአ አሳይ ደኤ።

⁹ ኡሱፑን አግናን ከስያ ጩጉዋ ካለያዌ ታቆአፐ ዬዳ እቄሻ ናኣ እራ፤ አ ጩጉዋን ላታማነ ኦይዱ ሻአ አሳይ ደኤ።

¹⁰ ላፑን አግናን ከስያ ጩጉዋ ካለያዌ ኤፍሬማ ዛርያፐ ፕሎናፐ ዬዳ ሄሌጻ፤ አ ጩጉዋን ላታማነ ኦይዱ ሻአ አሳይ ደኤ።

¹¹ ሆስፑን አግናን ከስያ ጩጉዋ ካለያዌ ሁሻፐ ዬዳ ስባካያ፤ አ ጩጉዋን ላታማነ ኦይዱ ሻአ አሳይ ደኤ። ስባካይ ይሁዳ ዛረነ ዛራሀ ያራ።

¹² ኡዱፑን አግናን ከስያ ጩጉዋ ካለያዌ ቢንያማ ዛረ ግዴዳ አናቶትያ አብኤዘራ፤ አ ጩጉዋን ላታማነ ኦይዱ ሻአ አሳይ ደኤ።

¹³ ታማን አግናን ከስያ ጩጉዋ ካለያዌ ናጾፋፐ ዬዳ፥ ዛራሀ ያራ ግዴዳ ማህራያ፤ አ ጩጉዋን ላታማነ ኦይዱ ሻአ አሳይ ደኤ።

¹⁴ ታማነ እተንያ አግናን ከስያ ጩጉዋ ካለያዌ ፕርኣቶናፐ ዬዳ፥ ኤፍሬማ ዛርያ ግዴዳ ባናያ፤ አ ጩጉዋን ላታማነ ኦይዱ ሻአ አሳይ ደኤ።

¹⁵ ታማነ ላኤን አግናን ከስያ ጩጉዋ ካለያዌ ናጾፋፐ ዬዳ፥ ኦትንኤላ ያራ ግዴዳ ሄልዳያ፤ አ ጩጉዋን ላታማነ ኦይዱ ሻአ አሳይ ደኤ።

እስራኤልያ ዛራቱዋ አይስያዋንታ

¹⁶ እስራኤልያ ዘረ አይሳናዉ ሱንቴዳዋንቱ ሀዋፐ ካሊደ ጻፈቴዳዋንታ። ሮቤላ ዛርያ አይስያዌ ዚክራ ናኣ ኤልኤዛራ። ስሞና ዛርያ አይስያዌ ማእካ ናኣ ሻፋጽያ።

¹⁷ ሌዊያ ዛርያ አይስያዌ ቃሙኤላ ናኣ ሀሻብያ። አሮና ዛርያ አይስያዌ ጻዶቃ።

¹⁸ ይሁዳ ዛርያ አይስያዌ ዳዊታ እሻ ኤልሀ። ይሳኮራ ዛርያ አይስያዌ ምካኤላ ናኣ ኦምራ።

¹⁹ ዛብሎና ዛርያ አይስያዌ ኦባድያ ናኣ ይሽማእያ። ንፍታሌማ ዛርያ አይስያዌ አዝርኤላ ናኣ ያርሞታ።

²⁰ ኤፍሬማ ዛርያ አይስያዌ አዛዝያ ናኣ ሆሼአ። ዮርዳኖሳ ሻፋፐ አዋይ ዉልያ ባጋን ደእያ ምናሰ ዛራቱዋፐ ባጋ አይስያዌ ፓዳያ ናኣ ዩኤላ።

²¹ ዮርዳኖሳ ሻፋፐ አዋይ ዶልያ ባጋ ጋላኣደን ደእያ ምናሰ ዛራቱዋፐ ባጋ አይስያዌ ዛካራሳ ናኣ እዳ። ቢንያማ ዛርያ አይስያዌ አባኔራ ናኣ ያእስኤላ።

²² ዳና ዛርያ አይስያዌ ይሮሃማ ናኣ አዛርኤላ። ሀዋንቱ እስራኤልያ ዘረ አይስያዋንታ።

²³ መና ጎዳይ እስራኤልያ አሳ ሳሉዋ ጾልንትያዳን ጮርሳና ጌዳ ድራዉ፥ ዳዊተ ላታሙ ላይነ ላታሙ ላይፐ ጋርሳና ደእያዋንታ ፓይዱዋን ገልስቤና።

²⁴ ጻሩይ ናአይ ዮኣበ አሳ ፓይዱዋ ዶሜዳ፤ ሽን ፓይድ ዉርስቤና። አሳ ፓይዴዳ ጋሱዋን ጾሳይ እስራኤልያ አሳ ቦላ ሀንቀቴዳ። ሄዋ ድራዉ፥ ኡንቱንቱ ፓይዱ ካትያ ዳዊታ ታርክያ ማዝጎባን ጻፈትቤና።

ካትያ ሚሻን አዎትያዋንታ

²⁵ ካትያ ሚሻ ምንጅያ ሳአዉ አዎትያዌ አዲኤላ ናኣ አዝማዌታ። ጋጻርያን፥ ካታማቱዋንነ ሞቱዋን፥ ዎችያ ሳ ደእያ ሚሻዉ አዎትያዌ ኦዝያና ናኣ ዮናታና።

²⁶ ቢታ ጎሽያ ጎሻንቻቱዋ ቦላ አዎትያዌ ካሉባ ናኣ ኤዝራ።

²⁷ ዎይንያ ቱራ ሳአቶ አዎትያዌ ራማፐ ዬዳ ሽምአ። ዎይንያ ኤሳ ምንጅያ ሳአዉ አዎትያዌ ሻፋማፐ ዬዳ ዛብዳ።

²⁸ አዋይ ዉልያ ባጋ ገዝያን ደእያ ዎጋራዉነ ኡንቱንቶ አዎትያዌ ገዴራፐ ዬዳ ባኣልሀናና። ዛይትያ ምንጅያ ሳአዉ አዎትያዌ ዮኣሻ።

²⁹ ሳሮና ደምባን ሄመትያ ሚዛዉ አዎትያዌ ሳሮንያ ሺጽራያ። ዎምባን ሄመትያ ሚዛዉ አዎትያዌ አድላያ ናኣ ሻፋጻ።

³⁰ ጋሎቶ አዎትያዌ እስማኤልያ ኦቢላ። ሀረቶ አዎትያዌ መሮኖትያ የህዳያ።

³¹ ዶርሳቶነ ዴሻቶ አዎትያዌ አጋር ዛርያፐ ያዚዛ። ሀዋንቱ ኡባይ ዳዊታ አቁዋ ቦላ አዎቴዳዋንታ።

ዳዊታ ዞርያዋንታ

³² ዳዊታ አዉዋ እሻይ ዮናታን ጻፊ፥ አኬካንቻ አሳነ ካትያ ዞርያ አሳ። ሀክሞና ናአይ ይህኤል ካትያ ናና ናጌ።

³³ አክጾፌል ቃይ ካትያ ዞርያዋ። አርክያ ሁሻይ ካቲ ሲቅያ አሳ።

³⁴ አክጾፌል ሀይቂና፥ አ ኮሽያን ባናያ ናአይ ዮዳሄነ አብያታረ ካትያ ዞርያዋንታ፤ ዮኣበ ካትያ ኦላ ጋዳዋ።