तितस 3 - देवास राईजेहे राम्रो रहेला उहेय कर्बा 1 सासकलक् आउँ अधिकारिलकक् अधिनै बस्बा पोर्लाहार, उखर्ह्वाक् आग्या मान्बा पोर्लाहार, आउँ सेब्भ्रोउ थरिक इमान्दार काम कर्बाक्नि जख्नुहुटौ तियार भेबापोर्लाहार बाजिहिन् उखर्ह्वालाइ सम्झाहिखान्। 2 उखर्ह्वाइ कुन्हुँहिलाइ बदनाम बुन् करुस्, झग्राउ बुन् करुस्। नम्र भेउस् आउँ जम्मा मानुसलकक्सङ्हिं मिलिहिन् राम्रो ब्यभार करुस्। 3 किसाबुने हामि आको एक समइमा मुर्ख, आग्या नहिंमान्लाहार आउँ भुलै पोर्लो रैल्हुहुँक्। हामि बिभिन्न पर्कारक् देहिक् नराम्रो इच्छालक् आउँ सेब्भ्रोउ सुक्ख-बिलासक् कामारालक् भेल रैल्हुहुँक्। हामि दुस्ट आउँ दाहा करिहिने जिबन बिताहुँक् आउँ मानुसलके आको हाम्रानि हेला करथ्। तसौ हामि एक्टाइ-ओर्कोलाइ घिर्ना कर्लाहार रैल्हुहुँक्। 4 तर जब हाम्रा मुक्ति देलाहार परमेस्वरक् दया आउँ पेरेम मानुसलकै पर्कट भेलकुन्, 5 तसौ ओहिं हाम्रानि बाँचालक्, यि ता हामि आफ्निहि कर्ल धार्मिक कामक्भटे भेल बोइने। तर हाम्रालाइ दया कर्लसिहिरे देल हो। ओहिं हाम्रालाइ पबित्र आत्माक्भटे हाम्रा पापलाइ धोहिन् लौओ जल्म आउँ लौओ जिबन देलक्। 6 परमेस्वरे उ पबित्र आत्मा हाम्रा मुक्ति देलाहार येसु खिरिस्टक्भटे हाम्रा उप्रै पर्सस्ट करिहिन् पाठालक्। 7 ताकि हामि ओक्राक् अनुग्रहक्भटे धर्मि ठहरिबानाइ अनन्त जिबनक् आसा कर्लाहार उत्तराधिकारि बन्बा पारुस्। 8 यि सत्य कहिन् हो। मुँइ चाहाम्ना कि तुँइ यि कहिनलकै जोर देउ, जैहिं परमेस्वरै बिस्वास कर्ल धरट्थ्ला, उखर्ह्वाइ राम्रो काम कर्बाक् ध्यान देउस्। किसाबुने यि जम्मा कहिनलक् मानुसलकक् लागि राम्रो आउँ फाइधा देलाहार कहिन् हो। 9 तर मुर्ख कहिनक् तर्क-बितर्क, लामो-लामो बङ्साबलिक् काथाहालक्, फुट आन्लाहार आउँ यहुदि नियमक् बिसइमा झग्रा कर्लाहारलकक्भटे टार्हो बसह। किसाबुने यि काम करिहिन् किच्छुय फाइधा नाभेक्। यि ता ब्यर्थक् कहिन् हो। 10 मन्डलिमा फुट आन्लाहार मानुसलकलाइ सेहे एकदुइ फेरा यरङ् बुन् करह बाजिहिन् चेताउनि देउ, भेटौसुधा उखर्ह्वाइ तर्क-बितर्क करिहिने रहिबुनेमा उखर्ह्वाक्सङ्हिं किच्छु सम्बन्धय बुन् धर। 11 यि कहिन् जानह कि यरङ् मानुसलक् ता भरस्ट आउँ पापि भेट्थ्ला। आउँ उखर्ह्वालाइ आफ्निक् पापे दोसि ठहरायट्थ्ला। अन्तिम साल्हा 12 जख्नि मुँइ अर्तिमास अथबा तुखिकसलाइ तोराठालाइ पाठामिना, तसौ तुँइसेहे मोरानि निकोपोलिस सहरै भेंटाबा आबाक् सक्दो कोसिस कर्। किसाबुने मुँइ उहे ठाँओइ हेंउरक् समइभोरि बस्बाक् निर्नय कर्ल धरम्ना। 13 वकिल जेनास आउँ अपोल्लोसलाइ यात्राइ चाइल्हार जम्मा थोकलक् तोहोराखर्ह्वाइ सक्दो मदप करह, आउँ उखर्ह्वालाइ किच्छु थोकक् खाँचो बुन् पोरुस्। 14 हाम्रा मानुसलक् राम्रो काम करिहिन् आउँ एकदमे खाँचोमा पोर्लोलकलाइ मदप करिहिन् आफ्निक् समइ बिताउस्, तसौ उखर्ह्वाक् जिबन फोर फोरालाहार भेट्थ्ला। 15 यछि मोरासङ्हिं रैल्हाहार जम्माहिं तोरानि अभिबादन पाठाल धरट्थ्ला। ओछि रैल्ह हाम्रानि पेरेम कर्लाहार बिस्वासि दाजुभाइलकलाइ आको अभिबादन बोलिहिखान्। परमेस्वरक् अनुग्रह तोहोराखर्ह्वा जम्माय जेनाक्सङ्हिं भेउस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.