२ तिमोथि 4 - देवास राई1 परमेस्वरक् आगारि आउँ खिरिस्ट येसुक् आगारि मुँइ तोरालाइ करा आग्या देमेर्ला। खिरिस्ट येसुइ आफ्निक् राज्जे खरा कर्बाक्नि आइलटाकै जिउँटो आउँ मोर्लोलकक् नियाँ करैस्। 2 उहेसैर्हे परमेस्वरक् बचन पर्चार करह, जख्नुहुँ भेटौ सुसमाचार पर्चार कर्बाक् लागि तियार भेहिन् बसह। पुरा धैर्यता आउँ होस्यारसाथ उखर्ह्वालाइ अर्ति देउ, हप्काउ, हौसला देउ। 3 किसाबुने यरङ् समइ आइतिहि रहेला, जख्नि मानुसलके सत्य सिच्छालाइ सुन्बा नाचाहाथ्। तर आफ्निक् इच्छालकक् पाछु हिंठ्थ्ला आउँ आफ्नि सुन्बा चाइल्ह कहिन् माटेन् सिखालाहार सिछकलक् थुप्रोय जउर काराथ्ला। 4 आउँ उखर्ह्वाइ ता सत्यक् कहिनलाइ इन्कार करथ्ला, तर दन्त्यकाथाहा सुन्बाक्लाइ मन पोराथ्ला। 5 तर तुँइसेहे जम्माय कहिनै सान्त मनक् भेउ। दुक्ख सहौ, सुसमाचार पर्चार कर् आउँ परमेस्वरे तोरालाइ देल सेवाक् काम पुरा कर्। 6 किसाबुने मुँइ ता बलिक् रुपै अर्पन भेबालाग्ल रहम्ना, आउँ मोरा बिदा भेबाक् समइ आहिन् सक्ल रहैस्। 7 मुँइ उत्तम लाराइ कर्ल रहम्ना। मुँइ दौर सिधाल धरम्ना आउँ मुँइ बिस्वासलाइ बाँचाहिन् धर्ल धरम्ना। 8 असौ परमेस्वरे मोरा लागि धार्मिकताक् मुकुट धर्देल रहैस्, उ मुकुट मोरालाइ नियाँ कर्लाहार पर्भुइ उ दिनै मोरालाइ लागाइदेइस्। आउँ मोरालाइ माटेन् बोइने, तर उ आबाक् पैंदा दिठाहिन् बस्लाहार जम्माय मानुसलकलाइ लागाइदेट्थ्ला। पावलक् अन्तिम कहिनलक् 9 सक्भर मोरालाइ चाँरोय भेंटाबा आउ। 10 किसाबुने डेमासे यि सन्सारलाइ पेरेम करिबानाइ मोरानि छारिहिन् उ थेसलोनिके सहरै जाइल रहैस्। क्रेसेन्स सेहे गलातियाइ जाइल रहैस्, आउँ तितससेहे दलमातियाइ जाइल रहैस्। 11 अख्नि मोरासङ्हिं लुका माटेन् रहैस्। तुँइ मोराठालाइ आइलटाकै मर्कुसलाइ आको खोजिहिन् तोरेसङ्हिं लेहिन् आहिक्, किसाबुने मोरा सेवाक् कामै ओहिं थुप्रोय मदप कर्बा पारैस्। 12 तुखिकसलाइ सेहे मुँइ एफिसस सहरै पाठाल धर्मिना। 13 तुँइ आइलटाकै त्रोआस सहरै कार्पसक्ठालाइ छार्ल मोरा कोट आको लेहिन् आउ। ओछि भेल कितापलक् आउँ खास करिहिन् छालाइ लेख्ल कितापलकसेहे नहिंबिस्राहिने लेहिन् आउ। 14 ताबोक् काम कर्लाहार अलेक्जेन्डरे मोरालाइ धेरे नराम्रो कर्ल धरैस्। पर्भुइ ओक्रालाइ ओक्राक् काम अनुसार साजाइ देला। 15 तुँइ आको ओक्राक्सङ्हिं होस्यार भेहिन् बस्, किसाबुने ओहिं हामि पर्चार कर्ल सिच्छालाइ एकदमे बिरोध कर्ल धरैस्। 16 सुरुक् बाजि मोरा मुद्दा चल्लटाकै कुन्हुँहि मोरा पछेइ साथ नहिं देलुहुन्। जम्माहिं मोरालाइ छारिहिन् जाइलुहुन्। यि कहिनक् दोस उखर्ह्वालाइ बुन् लागुस्। 17 तर पर्भु मोरासङ्हिं भेइबानाइ अरजातिलके सुसमाचार सुन्बा पाउस् बाजिहिन् सुसमाचार सुनाबा पार्लाहार सक्ति मोरालाइ देलक्। ओहिं ता मोरालाइ सिङ्हक् मुखक्भटे आको बाँचालक्। 18 पर्भुइ मोरालाइ जम्मा खाराब कहिनक्भटे बाँचाइस्, आउँ ओहिं मोरालाइ स्वर्गोक् राज्जेइ सुरछासाथ लेगाइस्। ओक्राक् महिमा सटौघरिय भेक्। आमेन। पावलक् अन्तिम अभिबादन 19 प्रिस्किला, अकिलास आउँ ओनेसिफरसक् घर परिबारलाइ आको मोरा अभिबादन सुनाइदे। 20 इरास्तस कोरिन्थ सहरै बस्ल रहैस्, आउँ त्रोफिमस बेरामि भेल सिहिरे ओक्रालाइ मुँइ मिलेटसिहिमा छार्ल धर्मिना। 21 जारक् समइ आबाइसौ आगारि सक्दो आबाक् कोसिस कर्। युबुलस, पुडेस, लिनस, क्लौडिया आउँ यछि भेल जम्माय दाजुभाइ आउँ दिदिबैन्हिलके आको तोरालाइ अभिबादन पाठाल धरट्थ्ला। 22 पर्भु तोरा आत्माक्सङ्हिं रहुस्। आउँ परमेस्वरक् अनुग्रह तोहोराखर्ह्वा जम्माहिक्सङ्हिं रहुस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.