२ तिमोथि 3 - देवास राईअन्तिम दिनक् खतरा 1 यि कहिन् जानिहिन् धरह कि, अन्तिम दिनलकै डरलाक्टो समइलक् आयला। 2 किसाबुने उ समइक् मानुसलक् आफ्निलाइ माटेन् माया करट्थ्ला, रुप्या पैसाक् लोभ कर्लाहार, घमन्डि आउँ ओर्कोक् बदनाम कर्लाहार, आफ्निक् बाप्पो-महँटारक् आग्यापालन नहिंकर्लाहार, बैगुनि आउँ अपबित्र भेट्थ्ला। 3 उखर्ह्वाइ कुन्हुँलाइ आको माया नाकरथ्, आउँ ओर्कोलाइ छेमाउ नादेथ्, उखर्ह्वा निन्दा कर्लाहार, नराम्रो चालचलन कर्लाहार, डरलाक्टो, आउँ राम्रो कहिनलाइ घिन कर्लाहार भेट्थ्ला। 4 उखर्ह्वा ओर्कोलाइ बिस्वासघात करिबानाइ मनपोरि कर्तिहि घमन्डै फुलिहिन् हिंठट्थ्ला, आउँ परमेस्वरलाइ पेरेम कर्बाक् साट्टा मोज-मस्ति कर्बाक्लाइ मन पोराट्थ्ला। 5 उखर्ह्वाइ धर्मक् भेस ता धारन करट्थ्ला। तर ओक्राक् सक्तिलाइ सेहे इन्कार करट्थ्ला। तुँइ यरङ् मानुसलकक्भटे टार्होय बस्। 6 किसाबुने उखर्ह्वामध्ये कट्का मानुसलक् घर-घरै पोसिबानाइ पापे जाताल आउँ जम्माय थरिकाक् दुस्ट इच्छाक् अधिनै पोर्लो कमजोर अइमाइलकलाइ आफ्निक् अधिनै धरेट्थ्ला। 7 उ अइमाइलके सटौघरि लौओ सिच्छालक् सिख्फा ता खोजोट्थ्ला, तर सत्यक् ग्यान कख्नुहुँ आको बुझ्बा नाप्पारथ्। 8 यान्नेस आउँ याम्ब्रेसे मोसाक् बिरोध कर्लक् परौ, यि मानुसलके आको सत्यक् बिरोध करट्थ्ला। इखर्ह्वाक् ता बुद्धिय बिग्रल आउँ बिस्वासै हार्ल रहट्थ्ला। 9 तर उखर्ह्वा अज्झ धेरेक्कुर दिन टिक्बा नाप्पारथ्, किसाबुने यान्नेस आउँ याम्ब्रेसक् परौ उखर्ह्वाक् मुर्ख कहिन् जम्माय मानुसलकक् आगारि देख्वार पोरेट्थ्ला। पावले तिमोथिलाइ देल आदेस 10 तर मोरा सिच्छा, मोरा चालचलन, मोरा जिबनक् लछ्य, मोरा बिस्वास, मोरा धैर्य, मोरा पेरेम, आउँ मोरा स्थिरता देख्ल धरस्ला। 11 एन्टिओखिया, आइकोनियन आउँ लुस्त्रा सहरै मुँइ कनङ्-कनङ् सतावटलक् आउँ दुक्ख भोग्लोम् बाजिहिन् तोरालाइ राम्रोइसम् थाहा रहेस्ला। भेटौसुधा पर्भुइ मोरालाइ उ जम्माय सतावट आउँ दुक्खक्भटे बाँचालक्। 12 साँच्चिय खिरिस्ट येसुमा भक्तिक् जिबन बिताबाक् इच्छा कर्लाहारलक् जम्माय जेनालाइ सतावट आइहालेट्थ्ला। 13 तर दुस्ट काम कर्लाहार मानुसलक् आउँ ठघ्लाहार मानुसलके ओर्को मानुसलकलाइ ठघट्थ्ला, ओर्कोलाइ ठघ्टे आफ्निऔ ठघिजाहिन् झन्-झन् दुस्ट स्वभाब बर्टे जायट्थ्ला। 14 तर तुँइसेहे आफ्नि सिख्ल आउँ पुरा मनक्भटे बिस्वास कर्ल सत्य सिच्छाइ साँद्धाउ लागिहिन् रहौ। किसाबुने यि कहिनलक् तुँइ कुनाहाँक्भटे सिख्ल रहस्ला बाजिहिन् तोरानि थाहाय रहेस्ला। 15 तुँइ चुटुनाहिंसौ पबित्र धर्मसास्ट्रै लेख्ल बचन राम्रोइसौ जान्ल धरस्ला, यिहे कहिने तोरालाइ खिरिस्ट येसुमा बिस्वास करिबानाइ पाइलाहार मुक्तिक् बिसइमा ग्यान देस्ला। 16 सेब्भ्रोउ पबित्र धर्मसास्ट्र परमेस्वरक् प्रेरनाक्भटे भेल हो, आउँ यि सिखाबाक् लागि, अर्ति देबाक् लागि, सुधार कर्बाक् लागि आउँ धार्मिक जिबन जिउँबाक् तालिम देबाक्लाइ एकदमे राम्रो भेला। 17 ताकि परमेस्वरक् मानुसलके पुरा रुपेसौं राम्रो कामलक् कर्बाक् लागि तियार भेउस्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.