Mitiyegec 70 - Yoak kekehagocac Dzadzahac gboria nga Mitiyegec

Ge bic hama meficnuna

Yegecgareng yearu. Dawidingo nunumuac mitiyegec yofi heiec.

¹ O Anutu, ge hama ebicfunac mesinubesena. O kebu, ge bic hama meficnuna.

² Ngic kpebucnubeso andae, yeni geng negemmana game kpekpeu faiyunugec oboc kpoboc ambisia. Nga memanganenubeso ayemmeande, geng yeni memayununa eweheiheia kpac kecma dzigenebisia.

³ Ngic yofi denengandae, “Naric yombong, naric yombong.” yeni yenang gameyunuu dzigenebisia.

⁴ Anu ngicngac ge hofocgudae, yeni geac amma sogaima ubangerec negenggec ngicngac geac memengerecga songogoc hoanggeandae, yeni monggoc nga monggoc yofi debisia, “Anutu ye engenatoa.”

⁵ Ni ine makpekpea amma iwaiac obohoma kecduae. O Anutu, ge nearu bic hana. Ge memeficna nga ebicfunac yungec yungecngicna. O kebu, ge naso mi ukuma nearu bic hana.