Mitiyegec 149 - Yoak kekehagocac Dzadzahac gboria nga Mitiyegec

Ngeni ubangerecgoc kecbisia

¹ kebu eriendzong memini, hallelu Yac. kebuac yegec gboria heimibesonga. Ngicngacfora yeac yoac modackecdae, ngeni kpekpeturangnginau yeac yegec gboria heimibisia.

² Yeng Israe meficngunuu ngeni yeac ubangerec negembisia. Sionggac medacfora, ngeni ngictaunginaac sogaibisia.

³ Ngeni yegec fedema yeac kpac kuneng heiwayong memibisia. Ngeni tambaring nga gita kpema udumeng gombunga meficgema oeha memibisia.

⁴ kebungo ubangerecgoc ngicngacfora ngeneac negenu ngereeude. Yeng ngicngac yumia ebicfunac mesingunuu imocngo wiacngina sirihau anu heingemmeu kemeude.

⁵ Yoac modac modac ngicngac ngeni sogaima fefenginau fema ubangerec negemma yegec heimibisia.

⁶ Ngeni enacnginango dendzerenggema Anutu dengerema maringinau soe mana ngadea enaragoc mema kecma

⁷ imocngo bangec monnunac ngicngac yenearu turungngina kpouyemmebisia. Ngeni ngiha ngiha kopocsicnginaac turunga kpouyemmema

⁸ seng mema imocngo ngictaufocngina witicyunugec ngickunengfocngina aiennu mendanggyunubisia.

⁹ Yoac yofi bic oho ohoya fede, “Yeneac yoac imoc modacma yoacngina isinggema desibesonga.” Nga imocngo Anutuac ngicngac yeac yoac modacma kecdae, yeneac kuc kibikperagiagoc anude. kebu eriendzong memini, hallelu Yac.