Tsefanya 3 - Deduamiti

Anutungo Yerusalaim kpemeting ammibesande

¹ Yerusalaim taontoa ye ebictoa yombong fingecmibesande. Ye yoackpekpe kecma dzuac dzuac mi meemeande. Amma ngicngacfora meenti memati ayemmeande.

² Ye yoac negen negenga kpac. Amma demetingyoac ngadeheande. Ye kebuaru mi heiriande. Amma Anutu mi hoanggeande.

³ Enarafocngina yeni laionyangngo yakaac homema arohoandae ifi isoc nga katekasi yeneng tofocnac yang kpema tusuc nedacgec asoac yacma henna kpac anude, desi desingicfocngina yeni katekasi yeneac faka imocnoc modacandae.

⁴ Profetefora yeni ikoc amma nendefeyoac dema goiheiheingina kpac kecandae. Amma womonggarengfora yeni wiac kpetiac imoc seuc heima dedeseriyoac kpeandae.

⁵ Kebungo Yerusalaim yeneac botucfu dindingac kecma wiac mong mi angsufuande. Ye asoacsoc hengising uaya mema sege segea kpac fakangina meireckema desiude. Ammanu sifu yoackpekpengic yeni ine gamengina kpac kecdae.

⁶ Kebungo yofi dede, “Ni bangec goaac ngicngac yeni amagerecnginagoc meicyunuyai. Amma hocodaac kicfifi amaherecngina hembarackema ngicngac taonggac singbisic bisicnginaunac meicyunuba mongngo mi kengha anggec. Anu taongngina imoc hembarackeba mingina kpac amma, engsac feec.

⁷ Yerusalaim ngeni faka fingerec imoc negendae imocac ngeneac yofi deai, ‘Ngeni yofinenggac ewena heima demetingyoacna negemma modacbisia. Ifi anggecdeu ni Yerusalaim mingina yeni amagerecnginagoc mi meicngunubesandua amma memetinna ngemmebeso deseriai imoc meickebesandua. Ammanu, yeni sifu bic yombong yacma angammeme mangana sasawa imoc torokpeu torokpe angkecgec.’ ”

⁸ Kebungo yofi dede, “Ngeni neac tomai kecbisia nga naso mong hasikebesande, naso imohai ni yacma namma fakangina henai imocac sirihau yoacngina desibesandua. Amma bangeha bangehaac ngicngac ngictaufocnginagoc yeni heitaiyunuma kpedzucyunubesandua, ni imoc bic deseriai. Amma ngabanaac gerec imoc hetinggeba witinginau embesande. Nga herebunaac gerecngo bangeha bangeha borang tima dzedacbesande.”

Isracel toseanec komoc kpebesandae

⁹ Naso imohai ngic habuya habuya yeneng Kebu neac kpacna kpacma deafehe nga kpacsambic amma uba mocgu namma heitofoho anemma sasawango kingang kpenengdacbesandaeac amma enacbibicngina dzuacma meremba yoac kongahasac debesandae.

¹⁰ Ngicngacfocna Kusdoku noboc singsararang kpema kecma afehenukecdae yeneng sesengina nearu mehabesandae.

¹¹ Naso imohai ngicngacfocna damoc ngeni mangana hania hania amma wosonau megec imoc ngeni gamengina kpac kecbesandae, imoc yofiac ngeni nendefe fakanginaac sogaiandae, imoc ngeni meicngunudacbesandua. Meicngunuba ngeni kpetiac tikinau sebiengenggoc monggoc mi kecbesandae.

¹² Ni Isracel bangecfu ngicngac toseanecsac komoc kpegecdeac meyunuba yeni memaemema yumea kecbesandae. Amma neac kpacnaac debannu sufubesandae.

¹³ Ifi anu yeni sing mi ferahebesandae nga ikocyoac mong mi debesandae amma enacbibicnginango faitobangyoac mong mi debesandae. Yeni yaka nekecma mama fenegembesandae. Fenegemmagec mongngo kengec mi meficgeyemmebesande.

Isracelareng yeni bangecnginau monggoc dzigenebesandae

¹⁴ Isracel ge sogaibesena nga Yerusalaim mingina ngeni ubangerectoa negembisia amma Tsionggac ngicngac ngeni onghoriangtoa ambisia.

¹⁵ Kebu ye memetingngina imoc meickeu kpac ambesande amma ngabafocngina yeneac kpae faima meicyunubesande. Kebu Isracelac ngictaunginango ngenigoc kecbesandeac mi kengecngunuu ngeni ebicfu monggoc mi embesandae.

¹⁶ Naso imohai Yerusalaim yofi edebesandae, “O Tsion, ge mi kengecgubeso amma mariga wana kuha kpac mi ambeso.

¹⁷ Kebu Anutuga gegoc kecde ye wasai kebu, yeng agengga tiu dzikac ferahenade. Ye geac ubangerectoa negemma sogaiande. Ye yumea kecma songo negenggengande. Ye geac amma sogaiyombonggede.”

¹⁸ Kebungo yofi debesande, “Neac hombanggac naso dedea fede imoc mi modacma kpekpeturang kekecac naso mi faiandaeac amma ubaebicnginagoc kecdae, ngeni kpedzucngunuma desusuic nga game kpekpeyoacac ebic imoc witinginaunac meickeba kpac anude.

¹⁹ Negendae, naso hade, ni naso imohai ngabafocngina memangunugec, yeni memetinggac turung kpouyemmebade. Amma hanimangang mengerengunuma ngunukporac angana imoc monggoc kpedzucngunubade. Kpedzucngunuba bangeha bangeha yeneng game kpekpe angemmegec, imoc heimeremba yeneng ewengina heima dengerengunugecde.

²⁰ Anu ni monggoc hesicngunuma bangecnginau kpedzucngunubade, naso imohai dzofinac monggoc kpengemmeba kicnginango imoc henggecde amma deba bangeha bangeha ngicngac yeneng ewengina heima dedengerengunugecde.”