Tsefanya 2 - Deduamiti

Kebuaru kpeketahebisia

¹ Bangec yomocac ngicngac gamengina kpac ngeni kpedzucnedacbisia.

² Kebuac herebuac gerecngo witinginau enude. Yeac kimbenggac fakango witinginau emma tarude. Imocac nasoya imoc bic dedea. Padiseuha fifini bic kengande ifi isoc naso ye bicbic kende.

³ Imocac amma Kebuac nasongo mi hamanungoc, memaemema dedeseri yoara modacma kecandae, ngeni kebuaru kpeketahebisia. Amma kpetiac kekec nga memaemema kekec imoc hafoangoc mebisia. Faka imocngo Kebuac herebuac nasou ngeneac debang gedang angemmebesande.

Pelisti yeneac yoac

⁴ Kecma Adza taong imoc kisi ambesande nga Askelon taong imoc memanganebesandae amma Asdod taonggac mingina imoc meicyunudacbesandae nga wenac kebangau amabangec imoc ning kpebesande. Anu Ekron taonggac mingina yeni meicyunuma ukuyunugec kendacbesandae.

⁵ Kereta kisicfunac yaguc kondungbangecfu kecdae ngeni Kebuac kicfu yoacnginagocac amma ebictoangina fingecngemmebesande, “Pelistingic Kenacanbangecfu kecdae, ni kpedzongac kpedzongngunudacbesandua.” Kebungo ifi dede.

⁶ Nga kondunnubigeng bangec fede, imohai ramagareng yeneng rama garengyunuma ramatotong mebesandae.

⁷ Bangec imoc yehudahabu toseanec yenengsac komoc kpegecde yeneac bangec ammanu ramafocngina ihai faiyunubesandae. Faiyunuma ama marai anu yenang ine Askelon taonnu ama tackendesoc ihai fenegembesandae. Kebu Anutunginango yeneac negensima feackekecngina monggoc kpakeyemmebesande.

Mocaw nga Ammon yereac yoac

⁸ Kurumenggac wasaiareng habuya habuya yeneac Kebu yennoc yofi dede, “Ni Mocaw yeneac desurengina imoc negenai amma Ammongngic yeneac dedenggbaring yoacnginango neac kedzacfu kemeec. Yeni neac ngicngacfocna desure ayemmema bangecnginaac ma imoc igockema ferahema megecdeac dekengec ayemmeandae.”

⁹ Imocac Isracelac Anutu ye yofi dede, “Ni forangoc kecduaengoc imocac kecma Mocawbangec imoc Sedom isoc ambesande nga Ammon bangec imoc Amora isoc ambesande. Ihai kondung memeac teng imoc nangkemmanu yung nga hororochasengngo sokodacbesande. Ammanu bangec imoc heikpenecac siriha kpac amma eng fekengkecmanu habufocna toseanec yenengsac komoc kpema kecbesandae anu yeneng yeneac iwaingina wangecyunuma bangec imoc tigec embesande.

¹⁰ Mocaw nga Ammon yeni faka ifia anggecac nendefenginaac turunganoc fingecyemmebesande, imoc yofiac yeni Kebuac ngicngacfora dedenggbaring ayemmema negengyemmegec mamea anu meenti memati ayemmegec.”

¹¹ Imocac amma Kebungo yenearu kucfakaya bibiagoc mebesande. Amma bangeha bangehaac nemuongafocngina imoc hembarackedacma meickeu kpac ambesande. Ammanu kondunga kondunga nga nuha nuha yeni ifingoc bangecnginasoc kecma Kebu eweheimibesandae.

Kus, Assur nga Ninewe yeneac yoac

¹² Kusngic ngeni ifingoc wasaibeannaac yaka ambesandae.

¹³ Ni marina notfubigeng sinema Assur bangec memanganeba taongtoaya Ninewe imoc bangec gbange gbanggea amma kisi ambesande.

¹⁴ Ammanu bangec imohai ramaburumaka habuya habuya nga kateyang yeneng ama sobennu fekembesandae. Soari nga mumbabac yeneng hocwotunggaac witiau tackembesandae. Ammanu aronginaac udumengngo Nineweac ama kisi imoc sokoma firang naguu sing ferecgema kembesande. Nga naguac sing engennu seuc nga yubengo febesande. Nga ama yomondzoc icngo memea imoc engsac namma barackebesande.

¹⁵ Sogac sogai taong Ninewe ye yengena kuha negenu soha fede dema yofi dekefec, “Nisac noc engena kecduae.” Yaguc ine bangec imoc meremma kisi anu kateyang yeneac amabangecngina ambeso. Ammanu ngicngac yeneng imohacsing ferecge kengha amma, hemma desusuic ammima mari gigibesandae.