Tsefanya 1 - Deduamiti

Turung kpou kpounaso

¹ Ammonggac medaha Yocsia yeng yehudangicngac yeneac ngictau kefec, naso imohai Kebuac yoacngo Tsefanyaaru hau negenec. Tsefanya ye Kusac medac nga Kus ye Gedalyaac medac. Gedalya ye Amaryaac medac nga Amarya ye Hidzekiyaac medac.

² Kebungo yofi dede: Ni bangecfu wiac sasawa fekendacde imoc memanganedacba kpac ambesande.

³ Ni ngicngac nga yang amma sawaac neng nga kondungyang imoc kpedzongac kpedzongyunudacbesandua. Amma faitobang nga yoackpekpeareng imoc sasawa yeni bangecfunac meicyunudacbesandua.

⁴ Yerusalaim ngicngac nga Yehuda sasawa ni marina ngenearubigeng sineba ngeni ebicfu embesandae. Amma Bacal nemuonga eweheimiandae imocac habu toseanec isoc kecdae ngeni sasawa meicngunudacbesandua amma nemuongaac sesememe ngic kpacnginagoc ngeni ifingoc meicngunudacbesandua.

⁵ Amma faka yofia angkecdae ngeni ifingoc memanganengunudacbesandua. Ngeni ama witiau emma wenac, afo nga asomeng fafoc heiyemmeandae. Amma ngeni Kebuac kpacfu yoacngina deserima Mirikom nemu yearu ifingoc deseriandae.

⁶ Amma ngicngac ngeni modacnu kemmaguc ngadenugec amma ngeni neac dekpesi me kpachofoc mong mi anenggec, ngeni meicngunuma ukungunudacbesandua.

⁷ Kebu ni Kebungina neng sesegerecna mengerema heitaingunuma arengngunuyai. Neac naso wegenedeac ngeni neac kicfu ning kpegec.

⁸ Neac sesegerecac nasou ni enarafocngina nga ngictauac medacfocngina amma ngeni wamba bangec mong yenearunac heiandae, ngenearu turung kpoukpouua mebesandua.

⁹ Ni naso imohai, ngeni neac dedeseri kpema mikic yeneac negen negeng modackecdae amma ikoc nga ewekpekpefakagoc kecma engenafocngina yeneac amau faka ifiango mewakeandae, ngeneac turung kpoungemmebesandua.

¹⁰ Kebungo yofi dede: Naso imohaingoc Yerusalaim taonggac nagu mong kpara kondungyanggac nagu ihacnac kiac nga aro mong fingeru negenggecde nga Yerusalaimgac ama gboriaunac kpendzenggoc kiac ubahodung fingerude nga ama bumaunac hofeac udumeng isoctoa fingecbesande.

¹¹ O Yerusalaim tosea Mortar mingina tumiau kecdae ngeni arohoma winggema kiacbisia. Imoc yofiac, ngic finacamagoc sasawa imoc yeni kpac andacbesandae nga ngic silwa sigeriu faifai imoc yeni ifingoc kpac andacbesandae.

¹² Naso imohai neng kifanagoc Yerusalaim imohai yerecgema, neac sing ngadehema yeni yenanggac sing imocac negenggec ngereeu yofi deandae, “Anutu ye sing gombungau me manganau wiac mong naric mi anemmeude.” yeninoc meficyunubadeac hofocyunubesandua. Meficyunuma yenearu turung kpoukpouua mebesandua.

¹³ Amma dzofinacngina imoc hamangecmemengic yeneac anude nga amangina imoc kisi fingerude. Yeni amagerecngina gboria monggoc megecdeu sifu manau tacyac mi anggecde nga waing heihomec anggecdeu sifu waing dokuya mong mi nebesandae.

Faka bibiagoc fingecbesande

¹⁴ Kebuac nasotoa imoc wegenede nga bic mewegenenunude. Naso imoc ubaebigoc anude, dzikacac wasaingic yeni ebicfu emma arohoma winggema kiacbesandae.

¹⁵ Naso imohai Kebungo herebuya edzacngunuu ngeni ubaebic meficgema ubahodung negenggecde. Ngeni ebic kuneng memagec iwaingina hembarackema memanganebesande. Naso imohai kundung dzicnambacngo amabangec semeude amma hoeng dzadzuyombongngo sokodacbesande.

¹⁶ Anu wasaingic yeni taongnginaac hocodatoatoa hembarackema imocac tuturungau kicfifiac amaherecngina nangande imoc kpedzacmegecdeac dzikacac tomeng fifibesandae.

¹⁷ Kebungo yofi dede: Ngeni neac yoac kpegecac ni angemmeba ngeni ubahodung negemma kicpisic isoc kpanggung kpebesandae. Sacnginango yube isoc kpakeu sebifusinginango kerac isoc bangecfu mama febesande.

¹⁸ Kebuac herebuac nasou gol nga silwanginango naric mi onggongngunuude. Ngeni nga ngicngac bangeha bangeha kecdae naso imohai yeac herebuac gerecngo bangeha bangeha borang tima ngicngac sasawa bangecfu naso imohai kecgecde, ngeni sasawa ngonohodacbesande.