Ruti 4 - Deduamiti

¹ Anu Bocadzi ye taonnu emma taonggac odatoaac naguyau kemma matarec. Tacmanu, Bocadzingo Ruti asoac ngic siduha ammiec, Rutiac eweaac sacarennunac memeficngic, ngic yenoc imohacsing hasikeec. Hasikeu Bocadzingo hemma kpacma deec, “Ogona, ge yoc hama matacna!” Ifi deu kemma matarec.

² Mataru Bocadzingo taonggac ngicenara yenearunac ngic ten heitaiyunuma deec, “Ngeni yei hama tacgec!” Ifi deu kemma matacgec.

³ Matacmagec Bocadzingo ngic imoc siduc yofi ammiec, “Sactosonina Elimelekac uabangec imoc Nacomingo Mocawbangecfunac dzigene hama bunggac sueudeac dede.

⁴ Ni dede imoc negenduaac dekperagigemba, Ge yoc tacdimbe nga habu nenanggac enarafocnina tacdae, yeneac kicfu sacarennunac memeficngic sinnina fede, imoc modacma bummebeso dema naric bummenade. Nga memeficngic sinnina fede, imocngoc modacma mi bummebeso denecfu, imoc naric edenuna negemba. Nocac yeac sacarennunac memeficngic ifia mong mi kecdae. Imoc geng warac warac nga ni geac ngadeu nerangsac kecdipe.” Ifi edeu memeficngicngo deec, “Ni naric memeficngic sinnina fede, imoc modacma bangec imoc bummebade.”

⁵ Ifi deu Bocadzingo torokpema deec, “Ge bangec Nacomi nga Rutiarunac bummenade imoc uayoaragoc. Ge imoc bummenadeu ge ifingoc ngic homeec yeac hotsec Ruti mocawngac ye menade. Ifi anna homecac bangecyombonga imocac mingina mong fingecma yeng bangec imoc tiu ennu kpara febeso.”

⁶ Yoac ifi edeu Ruti eweaac sacarennunac memeficngicngo yofi meremmiec, “Ifi anu ni sifu memeficngic sinnina, imoc naric mi modacbade. Ifi ambadeu neanna nga enennabaracfocna wiacnina memanganebaiac neng ambai isoc geng memeficngic sinnina modacma imoc bummena. Neng mebadeacsoc mi anduae.”

⁷ Warac Isracel bangecfu iwai emekpesi nga bummemeac faka mong yofi feec. Emekpesiac dzadzahac imoc meseriecdeac ngic mongngo hanitabea hesima ogea miude. Faka imocngo Isracel yenearu emekpesiac sing seria feec.

⁸ Dema torokpema memeficngicngo Bocadzi yofi edeec, “Imocac bangec imoc geanggaoc bummebesena!” Ifi dema hanitabea hesima miec.

⁹ Ifi anu Bocadzingo enarafora nga kpebung tacgec yofi edeyunuec, “Ngeni wenac yomohai hepuc anemmagec ni Nacomiac mariunac Elimelek, Kilyon nga Mahelon yeneac bangec nga wiac sasawa imoc bummeduae.

¹⁰ Amma ni Mahelonggac kpac heigboriba bangec yombonga nganoc engngoc feudeac hotseha mocawngac Ruti meba enenna anude. Amma yeac kpac daramunafora yenearu nga taonggac odanaguyau oho ohoya feude. Imocac ngeni yaguc hepuc annendaenoc.”

¹¹ Ifi deu ngicngac nga enarafocngina taonggac odanaguyau tacgec, yeni sasawango degec, “Rahel nga Leca yerearunac isracelhabu yadiseri anec. Ngac yomoc amagau erede ye yeri isoc anudeac Kebungo kenehebeso. Tatacga Efrata arennu monggoc torokpegemma meseribeso amma Bet-Lehem amau kpacsiducgango yadibeso.

¹² Anu Kebungo fingecsahega kenehebeso. Amma naroang yomoc genude yenearunac yeneng Tamarngo Yehudaac medac Perets meec yeac habu isoc yadibisia.”

¹³ Anu Bocadzingo Ruti ameau hesicke enu enema anec. Anu yegoc feyac anu Kebungo Ruti sabacgoc anudeac negemmiu ye medac mong meec.

¹⁴ Meu ngac yeneng Nacomi edegec, “Nenang Kebu keneheni! Ye mi waguec, yaguc ye ewegaac sacarennunac memeficngicga mong meficgegendac. Isracel bangecfu yeac kpacsiduha yadibeso.

¹⁵ Amma ngac kpengeng ammana yennoc mekiriguma karuga anude. Imoc yofiac erangiga geac songo homac negengkecdengo sabac medac. Nga geac medac seweng kecbau debac, erangigango sifu yeni feracyunude.”

¹⁶ Ifi degec Nacomi ye sabac imoc metabuhe ammima garenggekefec.

¹⁷ Kecmanu ngachabu wegenac kecgec yeneng degec, “Nacomi ye medac mong metacde.” Ifi dema yeneng kpara Owed kpacgec. Ye Yisayac mama anec nga Yisay ye Dawidac mama.

¹⁸ Peretsac kisicfora yeneac kpacareng yofi fede, Perets yearunac Hetsron fingerec.

¹⁹ Hetsronarunac Ram, Ramarunac Amminadaw fingerec.

²⁰ Amminadaw yearunac Nacson, Nacsonarunac Salma fingerec,

²¹ Salmaarunac Bocadzi, Bocadziarunac Owed fingerec.

²² Owedarunac Yisay fingerec amma Yisayarunac ine Dawid fingerec.