Ruti 3 - Deduamiti

Bocadzingo Ruti wosoefac kpemiec

¹ Anu Nacomingo erangia yofi edeec, “Naroanna ni naric geac sing mong tobanggema meficguba tatacga gombunga ambac.

² Ge Bocadziac uangacfora yenigoc kecnec, ngic imoc ye nerang arennirangoc ande. Ye tofocnac yomohaingoc bali nga wit kpekpesobennu baligbomea firannu ukuma kefude.

³ Imocac ge naric doku nadzicma wambaga gombunga heima sebiga kerecngo nadzicmima bali nga wit kpekpesobennu kembesena. Ifi anna, yeng ine mi gembeso. Amma ge, ngic imoc henna ye nenedokuya nedaru wisickeu kemma dahai feude,

⁴ imoc hennegeng ambesena. Amma ge imohai kemma kperaceme fefea haniau fede, imoc miacma emma febesena. Anu ge noc ua menade, imoc yengenaoc edeguude.”

⁵ Ifi deu Rutingo yofi meremmiec, “Ge yoac edenunec, imoc sasawa andacbade.”

⁶ Ifi dema ye bali nga wit kpekpesobennu kemma erangiango edeec, imocac sirihau sasawa anec.

⁷ Anu Bocadzi ye nenedoku nedacma songogoc feac feac kemma bali guruya guruya tackenec imocac wegenahau wisic wisickeau mama gaufeec. Gaufemanu Ruti ye akikic kemma haniau kperaceme fefea miacma emma feec.

⁸ Femanu tofocnac dzongiau ngic ye kpidohoma meremma henu ngac mongngo yeac haniau feec.

⁹ Feu hemma kpesimiec, “Ge merac?” Ifi deu yeng yoara meremmima deec, “Ni Ruti, geac wanacnaroangga. Ge neac ewenaac sacarennunac memeficngicna annecac amma ngakpiga toseango wanacnaroangga ni naric kperacnuna.”

¹⁰ Ifi deu Bocadzingo deec, “Naroanna, Kebuac kenecngo gegoc febeso. Eweheiheiga yaguc annec imocngo warac annec imoc ferahede. Ge ngicmedac finahagoc me finaha kpac kecdae, ifia yenearu kemba dema mi kendang.

¹¹ Imocac, naroanna, ge kengec mi ambesena. Ge noc wiacac derecgenennade imocac sirihaungoc ambade. Amma neac tosofocna taong yomohai kecdae, yeni geac ngac gombunga imoc bic hennegeng anggecac amma ifi ambade.

¹² Anu ni geac ewegaac sacarennunac memeficngicga, imoc fora. Amma memeficngicga mong geac sacarennunac wegenac ande, yeng kisicninau warainende.

¹³ Ge naric tofocnac yomoc yei torokpema kecmana. Yeng wereckenu memeficngic sinnina fede, imoc modacma songo negemma megubeso negenu naric anudeu megubeso. Anu ye memeficngic sinnina modacma naric mi anudeu isoc imohai ine neng megubade. Kebu ye fora kecde imoc negemma deduae. Imocac ge yei naric femana ama wereckembeso.”

¹⁴ Ifi edeu Rutingo Bocadziac haniau femanu ama wereckeng mau kundung femanu mi hemmagec kenec. Kembeso anu Bocadzingo deec, “Ge bali nga wit kpekpesobennu yei hadang, imoc mongngo mi negembeso.”

¹⁵ Ifi dema yofi deec, “Ge ngakpiga witiau hesima tiamemana!” Ifi deu ye ngakpia hesima tiameu Bocadzingo baligbomea teti kiloacsoc fimiec. Fimima miacma witiau faiu dzigene taunnu enec.

¹⁶ Emma erangiaaru kensikeu erangiango kpesimiec, “Naroanna, dafi fingecdac?” Deu ngicngo Ruti wiac sasawa ammiec, imocac siduc ammidarec.

¹⁷ Ammima torokpema deec, “Ye bali teti kiloasoc yomoc yofi dema finendac, ‘Ge entegeng erangigaaru naric mi kennade.’ ”

¹⁸ Anu Nacomingo edeec, “Naroanna, wiac dafi fingerude, ge imocac tomai kecmana imoc fingectegecbeso. Ye ua mede, imoc yagucngocnoc mesiudeac hatahede.”