Ruti 2 - Deduamiti

Rutingo Bocadziac uau bali mekpedzuc anec

¹ Nacomi ewea Elimelek, yeac arennunac ngic kpactoayagoc mong dzofinactoayagoc kefec, yeac kpara Bocadzi.

² Anu Mocawngac Ruti yeng Nacomi edema yofi deec, “Ni fakangina modacma uau naric kembai, me? Ihai kembare ngic mongngo naric deu isoc semeng kpedae, imohacnac fora mocgu mocgu mafeude imoc mekpedzuc ambade.” Ifi deu Nacomingo yofi edeec, “Naroanna, ge denec isoc naric annade.”

³ Ifi deu ye ua mong feec ihai kensikema kpememengic yeneac ngadenginau namma fora goa mafeec, imoc mekpedzuc anec. Ua imoc Bocadziac ua, Ruti ye imoc mi negemma engsac uau kenec. Amma Bocadzi ye ine Elimelekac arennunac.

⁴ Naso imohaingoc Bocadzi ye Bet-Lehem amaunac maec. Mama kpememengic yenemma yofi edeyunuec, “Kebungo ngenigoc kecbeso.” Ifi deu yeneng yofi degec, “Kebungo kenecgubeso.”

⁵ Anu Bocadzi ye uangiha kpememengic yeneac gareng, yearu kemma kpesimiec, “Ngacnaroang imoc meracac enactofoc tofohongac?”

⁶ Ifi deu kpememengic garengina yeng yofi meremmiec, “Ngacnaroang imoc Mocawbangecfunac.

⁷ Ye Nacomigoc haoc amma ye yaguc hama yofi dedac, ‘Ni naric kpememengic yeneac ngadeu kecma fora goa memedadang anggec mafeu imoc mekpedzuc ambai, me?’ Ifi dema asoacngoc yombong hama tacnegenga kpac mekpedzucne andac. Yagucnec bedzobedzou kapianec tacnegemma mama ua mede.”

⁸ Ifi deu Bocadzingo Ruti edeec, “Naroanna, ni edeguba negenna! Ge ua monnu bali me witfora mekpedzuc annadeac mi kembesena. Ge ua yomohaisac namma mekpedzuc ambesena amma neac uangacfocna yenigoc ua mebesena.

⁹ Amma kpememengic yeni dahai kecdae, imoc hemma uangacfocna yeni modacyunubesena. Nga ngic yeneng memanganegubauac kpaeyoac bic edeyunudua. Amma dokuac anggenu naric kemma doku enannunac fima nebesena. Imoc uangic yeneng fiha faidau.”

¹⁰ Ifi deu Rutingo fafoc heima ngonducnemima deec, “Ni ngac bangec monnunac imoc negennemmaguc sifu hoannunec, imoc faka siriha mong.”

¹¹ Ifi deu Bocadzingo deec, “Ge ewega bic homeu kecma erangiga henggareng ammiannec. Ammima nonggomangfocga nga amabangecga imoc wadacma ngicngac mi negennununec nenearu kuric hama kecnec, siducga imoc sasawa bic edenugec negenai.

¹² Wiac sasawa andacnec imocac turunga Kebungo ubangerec kpegembeso. Ge Kebunina Isracelac Anutu yeac kpegang bageau sufunadeac hanec, imocac yeng turunga sasawa kpougembeso.”

¹³ Ifi deu Rutingo deec, “Kunenna, gearunac bacngisi meficgeduae. Ni uangacfocga yeni isoc mi ambare ge sifu wanacngacga gombunga anennec.”

¹⁴ Anu yakanaso anu Bocadzingo Ruti edeec, “Ge yei hama icsogong goa mema wainnu nemuruckema nena.” Ifi deu Ruti ye kpememengicngac tacgecfu, yenigoc matarec. Taru Bocadzi ye baliac fora faigec gerecfu kpegbanggeec imoc goa miu mema neec. Neu gebeckpeu tosea fau tarec.

¹⁵ Taru Ruti ye baliac fora goa monggoc mekpedzuc anudeac yarec. Yacma kemmanu Bocadzingo uangicfora edeyunuma yofi deec, “Ye naric wagec kemma baliac fora dedeha dedehaac botucfunac mocgu mocgu mafeude, imoc mebeso nga ngeni sifu kpae mi heimibisia.

¹⁶ Amma ngeni dedecfunac yombong yeng meudeac negemma fora mocgu mocgu taiukuanggec mafeu ye hemma mebeso. Meu ngeni imocac mi kpetarimibisia.”

¹⁷ Bocadzingo ifi deu Ruti ye uau fora mekpedzuc angkecmanu ama toforeec. Toforeu mekpedzuc anec imoc mema seuha meickedacma forasac meec, imocac kpetea 36 lita, ifi isoc anec.

¹⁸ Anu seuha meickema fora mema serema taunnu enec. Enu erangiango dafiguc mekpedzuc anec, imoc henec. Nga Rutingo yaka neu gebeckpeu tosea mekemma widicma erangia miec.

¹⁹ Miu erangiango kpesimiec, “Ge yaguc dahai kecma wiac kuneng imoc mekpedzuc angkecma mehanec? Ngic damocngo genggareng anggendac ye kenehagoc.” Ifi deu Ruti ye meracac uau kemma ua meec, imocac siduc erangia yofi ammiec, “Ni yaguc ngic mong kpara Bocadzi, yeac uau kecdua.”

²⁰ Ifi deu Nacomingo erangia yofi edeec, “Kecdae nga homemea yenearu dedzegeaac haringa imoc mi segereyemmeande, Kebu yennoc ngic imoc kenehebeso.” Amma torokpema yofi deec, “Ye nerang sacarennunac yombong, ye memeficngicfocnira goa kecdae, yenearunac mong imoc yennoc ande.”

²¹ Ifi deu Rutingo deec, “Amma ngic imoc yofi dedac, ‘Ge neac enactofoc tofohongicngacfocna yenigoc kecbesena. Kecmana semenna sasawa mekpedzucanggec endacbeso.’ ”

²² Anu Nacomingo erangia Ruti yofi edeec, “Naroanna ge yeac uangacfora yenigoc kecnadengo naric ande. Nga ua monnu kembang debac imoc ine memanganegubau.”

²³ Anu Ruti ye erangiagoc kecma Bocadziac uangacfora yenigoc bali nga wit mekpedzucne amma kecmanu bali nga wit mekpedzucnaso imoc wisickeec.