Nehemia 4 - Deduamiti

Deendema ayemmegec.

¹ Naso imohai Sanbalatngo oda memengere aning, imocac siduc negemma herea buyombonggeu Yehudangic deendema anemmeec.

² Anemmema yengena ogofora nga Samaria dzikacac ngic yeneac kicfu yofi deec, “Yehuda ngicgedannec noc ua mebesonga andae? Yeninec ifiango oda imoc naric mengeredacgecde me? Yeni oda imoc uameme mocguac manau naric medacma sesegerec ohogecde me? Amma hoc oda barackema singsararang kpeec imocngo mema oda naric mengeregecde me?”

³ Ifi deu Amongareng yenearunac mong Tobia, yeng yeac wegenahau namma yofi deec, “Yeni nocwiac mengeredae, imoc kate kasingo witiau enudeu hocodanecngina imoc barackedarude!”

⁴ Yeri ifi dema deendema anemmeec neng Anutuaru yofi dema numumiai, “O Anutunina, ge neneac nunumu yomoc negenna, deendema anemmedae imoc merengyemmena yenangarungoc kembeso nga geng ngaba yeneac mariu faiyununa yeneng iwaingina medacma witicamau bangec hereau meyunuma kembisia.

⁵ Yeni oda medimbe neneac kicfu deendema ammakecdae imocac ge manganangina mi semebesena nga kicgaunac kopocsicngina mi meickebesena.”

⁶ Anu neni heregoc seseemema ua meinggac amma naso mi hereemanu odango bic yombong dzongiau enec.

⁷ Anu neneng ine Yerusalaim oda monggoc mema titinga sasawa hedzickedacni Sanbalat nga Tobia, Arabareng, Amongareng amma Asodongic yeneng ine siduc imoc negemma herebu kuneng negenggec.

⁸ Negemma Yerusalaimnu hama nenigoc dzikac kpema ebic meficgegecdeac sasawango kpedzucnema yoac dedzege anggec.

⁹ Ifi anu neneng Anutuaru numuma nagugareng faiyununi, yeneng ine ebic fingecbacac hadzing nga toforec gareng nangkecgec.

¹⁰ Anu naso mi hereemanu Yehuda yeneng yofi degec, “Hocoda dzamema singsararang kpeec imocac seuha ebiriangoc fede nga enactofotofoho ngicfocnina kucngina mamanu dafi monggoc medzuacnide.”

¹¹ Anu ngabafocnina yeneng ine yofi degec, “Nenang sufusufu kemma mi nenemmagec botucnginau emma kpebucyunudacni ua imoc wagec febeso.”

¹² Ifi demade anggec, Yehudaareng goa ngaba yeneac wegenac kecgec yeneng imoc negemma hamasoc yoac imoc tatahoc edenunuma dekecgec, “Ngeni ua imoc wama nenearu monggoc dzigenegec, ifi mi anggecdeu yeni hama memanganengunugecde.”

¹³ Ifi anggec neng ngicngac arengnginasoc hendzicyunuma wasaibeang, tebe nga sangara yemmema, oda mi medzic medzickea imohai gareng nanggecdeac faiyunudarai.

¹⁴ Faiyunuma hemba ngicngac yeni wosodamugoc nanggec yacma gareng nga ngickiwafocngina amma ngicngac yofi dema edeyunuai, “Ngeni kengec mi anggec, Negendae Kebu ye Kuctoayagoc, imocac ngeni serima namma enengfocngina, naroangfocngina, medacfocngina nga dacmunafocngina amma amagerecngina imocac dzikaha ngenaoc kpebisia.”

¹⁵ Anu neneng ngabafocnina yeneac negengareng bic negening, imoc negenggec. Naso imohai Anutungo dedzegengina kpembarackeu dugungkpeec. Anu neneng monggoc dzigenema nananninasoc namma oda meing.

¹⁶ Ifi amma wenac imohaingoc ngicfocna noboha hendzicyunuba ua megec nga noboha yeni dzikacac mariku heigec kemeu, tebe kpandabu nga tebeac saiya mema nanggec. Ammanu ngickiwafocngina yeneng Yehuda ngicngac yeneac ngadeu nanggeyunuma tacmagec

¹⁷ goa yeneng ua megec. Ifi amma oda memeac iwai kisangha faiac ngic yeni maringina nobohango odaac iwai megec nga nobohango ine dzikacac wiac mema kecgec.

¹⁸ Anu oda memengic yeni wasaibeang fadengnginasoc tigec kemeu namma ua megec. Nga ngic merang tomeng fifiande, yeng ine nigoc wegenac kefec.

¹⁹ Ifi anu ngickiwa nga garengenara amma ngicngac tosea yofi edeyunuai, “Uango modohoma kenu nenang singsararang kpema kecdimbe.

²⁰ Imocac ngeni tomeng udumenga negenggecdeu nerearugeng hadacbisia. Hadacmagec Anutuninango nenang dzikac kpebeso!”

²¹ Anu neni ua torokpema yofi meing, asoac amanegemma ngic noboha yeni tebe mariku mema gareng nammagec noboha yeneng ua megec kecmina ama toforeu asomeng fingeckefec.

²² Anu naso imohai ngicngac yofi edeyunuyai, “Ngic sasawa nga memeficngicfocngina yeni tofocnacfu Yerusalaim manau nenang kaso amma kecbisia. Kecma hadzinu ine uangic amma ua mema kecgecde.”

²³ Ifi amma neanna nga dacmunafocna amma uangicfocna nga nagugareng, nenahafoc uaac ngakpi kporucnina mi hesihesi tebe marikuninagocngoc nangkefing. Amma dokuu kengha ambesonga dema dzikacac wiacnina mi wakefing.